Əliyev Xankəndiyə gedib-gələnlərə nəzarət məsələsində sülhməramlıların böyük qəbahətini ifşa etdi...

Rövşən Rəsulov: “...Cənab İlham Əliyev Rusiya sülhməramlılarının fəaliyyətini sərt tənqid edərkən əlində olan dəqiq rəqəmli faktları da təqdim edib”

img

Yanvarın 12-də Prezident İlham Əliyev yerli telekanallara geniş və məzmunlu müsahibə verib. Prezident müsahibəsində bir sıra məsələlərə toxunub, o cümlədən də Azərbaycanın Qarabağ bölgəsinin bir hissəsində müvəqqəti olaraq yerləşdirilən Rusiya sülhməramlılarının fəaliyyətinə toxunub.

“...Digər qıcıq doğuran məsələ odur ki, biz görürük Qarabağa, Xankəndiyə və Rusiya sülhməramlı qüvvələrinin nəzarətində olan digər yerlərə gələnlərin sayı gedənlərin sayı ilə böyük fərq təşkil edir. Daha çox insan oradan gedir. Biz bunu izləyirik. Bir şeyi də izləyirik ki, gedən maşınların 91 faizi, - bax, 91 faiz deməklə, o cümlədən mən bildirirəm ki, biz bunu nə dərəcədə dəqiqliklə bilirik, - yoxlanılmır. Oradan çıxan maşınların cəmi 46 faizi yoxlanılmır. Yəni bu nəyi göstərir? Onu göstərir ki, Rusiya sülhməramlı qüvvələri çalışırlar, giriş sərbəst olsun, çıxışda isə müəyyən problemlər olsun. Yəni o maşını dayandırırlar, sorğu-suala tuturlar və sair. Yəni istəyirlər ki, insanlar oradan getməsinlər. Bu isə təsadüfən ola bilməz...” Ölkə başçısı öz müsahibəsində Rusiya sülhməramlılarının fəaliyyətini sərt təndiq edib.

  • “...Rusiya tərəfə mesaj ötürüb ki, müvəqqəti olaraq Qarabağda yerləşdirilmiş sülhməramlıları zaman-zaman öz hədlərini aşırlar və belə davam edə bilməz”

Siyasi ekspert Rövşən Rəsulov “Bakı-Xəbər”ə bildirdi ki, ölkə başçısı sülhməramlıların fəaliyyətini tənqid etməklə onların fəaliyyətinin ciddi nəzarət altında olduğunu diqqətə çatdırıb: “Cənab Prezident İlham Əliyevin media nümayəndələrinə verdiyi müsahibəsi zamanı Laçın dəhlizi və orada müvəqqəti yerləşdirilən Rusiya sülhməramlı kontingentinin fəaliyyəti barədə fikirləri həm də bir mesaj oldu. Hansılar idi bu mesajlar? Baxın, dövlət başçımız sülhməramlıların fəaliyyətlərində müsbət amillərin də olduğunu vurğuladı və həmin amilləri qeyd etməməyi ədalətsizlik hesab etdi, ancaq çatışmayan, hətta Azərbaycan dövlətində və xalqında qıcıq yaradan olayların da baş verdiyini xüsusilə vurğuladı. İstər xarici ölkələri təmsil edən şəxslərin Xankəndiyə gizli yolla getmələri, istər Rusiya sülhməramlıları komandanlığının bu olayları ciddi-cəhdlə öz məsuliyyətləri üzərindən atmağa cəhd göstərmələri – bunların hər biri, əlbəttə ki, birbaşa Bakının diqqət mərkəzindədir. Əbəs deyil ki, cənab İlham Əliyev Rusiya sülhməramlılarının fəaliyyətini sərt tənqid edərkən əlində olan dəqiq rəqəmli faktları da təqdim edib. Bu belə qənaətə gəlməyə zəmin yaradır ki, artıq dövlət başçımız yalnız mövcud faktları gətirməyib, həm də Rusiya tərəfə mesaj ötürüb ki, müvəqqəti olaraq Qarabağda yerləşdirilmiş sülhməramlıları zaman-zaman öz hədlərini aşırlar və belə davam edə bilməz. Dövlət başçımız belə davam edilməyəcəyini isə birbaşa Azərbaycanın Laçın dəhlizindən keçən istənilən maşınları yoxlaya biləcəyi ilə əlaqələndirdi. Yəni səbrimiz tükənir və Laçın dəhlizində post qurmağımız heç də çətin proses deyil. Deyərdim ki, bu bir ismarıc idi və ümid edək ki, qeyd edilən bəlli dairələr bu mesajları alaraq tələb olunan qaydada öz üzərlərinə düşən missiyalarını doğru-dürüstlüklə icra edəcəklər”.

R.Rəsulovun sözlərinə görə, o cümlədən, Prezident rus sülhməramlılarının Laçın dəhlizinə girişinin sərbəst, çıxışının isə problemli olduğunu qeyd etməklə ona eyham vurub ki, ruslar Xankəndidəki ermənilərin bacardıqca çox qalmalarına, ya da bu əraziləri tərk etməmələrinə çalışırlar. “Çünki belə olacağı halda “müsbətlər” rus sülhməramlılarının səmərələrinə yazılır və onlar “ermənilərin çoxluğunu əsas gətirməklə” növbəti illərə olan planlarını realizə etməyi düşünürlər. Ölkə başçımız isə bütün bunların təsadüfi olmadığını xüsusilə vurğuladı. Bənzər təxribatçı hallar davam edərsə, artıq Laçina vizual deyil, həm də real nəzarət mexanizmləri tətbiq ediləcək. Bu torpaqlar Azərbaycanın ərazi bütövlüyünün tərkib hissəsidir və kimlərəsə izn verilməz ki, orada özbaşınalıqlarla məşğul olunsun. Yəni Prezidentimiz ismarıc göndərdi ki, Azərbaycan zamanında sülhməramlılara etimad göstərdisə, onlar həmin qiymətləndirməni dəyərləndirməyi bacarmalıdırlar, yox, bacarmırlarsa, yaxud bunu qəsdən edirlərsə, onda günahı da özlərində axtarmalıdırlar” - deyə R.Rəsulov bildirdi.

İradə SARIYEVA

Son xəbərlər