“Biz heç vaxt Ermənistanda indiki hakimiyyətin xoş sözlərinə aldanmamalıyıq”. Bunu Prezident İlham Əliyev yerli televiziya kanallarına müsahibəsində deyib.
Ölkə başçısının fikrincə, onu da biz unutmamalıyıq ki, indiki hakimiyyət bu gün özünü daha konstruktiv aparırsa, faktiki olaraq müharibədən əvvəlki dövrdə müharibənin qaçılmaz olmasını şərtləndirdi: “Axı “Qarabağ Ermənistandır və nöqtə” deyən indiki hakimiyyətin təmsilçisidir, “Yeni torpaqlar uğrunda yeni müharibə” ilə bizi hədələyən indiki hakimiyyətin təmsilçisidir. Cıdır düzündə oynayan, Azərbaycan xalqının heysiyyətinə toxunan indiki hakimiyyətin təmsilçisidir. Yəni indi biz indiki hakimiyyətin davranışına baxmamalıyıq, özümüzü aldatmamalıyıq. Məhz onlar Azərbaycan ərazilərini daim işğal altında saxlamaq fikrində idilər, məhz indiki hakimiyyət dırnaqarası qondarma “Dağlıq Qarabağ respublikası”nın parlamentini Şuşaya köçürmək istəyirdi və hətta orada binanın daş işləri də artıq tamamlanmışdı. Biz onu yerlə bir etdik. İndiki hakimiyyət nümayəndələri deyirdi ki, biz dırnaqarası “Dağlıq Qarabağ respublikası” ilə danışıqlar aparmalıyıq və dırnaqarası “Dağlıq Qarabağ respublikası” danışıqlar masasında olmalıdır. Yəni Koçaryan-Sarkisyan yox, məhz indiki hakimiyyət. Ona görə də biz heç vaxt indiki hakimiyyətin xoş sözlərinə aldanmamalıyıq. Heç vaxt unutmamalıyıq ki, biz hansı qonşu ilə qonşuluqda yaşayırıq. Sərhəddə törədilmiş təxribatlar da bundan qaynaqlanır”.
Belə məlum olur ki, hakimiyyətdə mötədil və ya revanşist qüvvələrin olmasından asılı olmayaraq, heç vaxt Ermənistana inanmaq olmaz.
“Ermənistanda hansı qüvvələrin hakimiyyətdə olmasından asılı olmayaraq, qarşı tərəfə inanmaq olmaz”
Sözügedən məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayev dövlət başçısının məlum yanaşmasını dəstəklədiyini qeyd etdi. Onun fukrincə, Ermənistanda hansı qüvvələrin hakimiyyətdə olmasından asılı olmayaraq, qarşı tərəfə inanmaq olmaz: “Əvvəla, prezidentin yerli mediaya geniş müsahibə verməsi müsbət haldır. Çünki müsahibədə bir sıra məsələlərə aydınlıq gətirildi. O baxımdan hesab edirəm ki, bu proses davamlı xarakter almalıdır. Prezidentin Ermənistan-Azərbaycan münasibətləri ilə bağlı səsləndirdiyi fikirlər reallığı əks etdirir. O cümlədən, bir sıra məsələlərə aydınlıq gətirdi. Məsələ ondadır ki, cəmiyyətdə müəyyən bir ehtiyatlılıq var. O mənada ki, ermənilər hər dəfə bir söz deyir və sonra bundan qaçırlar. Sərhədlərin delimitasiyası və demarkasiyası ilə bağlı bir qeyri-müəyyənlik var. Proses praktiki olaraq yubanır. Bu baxımdan son günlər baş verən hadisələr bir daha göstərdi ki, ermənilərə inanmaq olmaz. Prezidentin timsalında bunu bir daha eşitdik və əmin olduq ki, ölkə başçısı bütün bunların fərqindədir. Yəni bu o deməkdir ki, Paşinyan hakimiyyətinin ara-sıra verdiyi bəzi müsbət mesajlar reallıqla uzlaşmır və Azərbaycan tərəfi aldanmır. Hər zaman olduğu kimi, yenə də erməni xislətinə xas olaraq hiyləgər oyun oynayırlar. Bu səbəbdən Ermənistanla müəyyən danışıqlar getsə də, Azərbaycan ehtiyatı əldən vermir. Necə deyərlər, Azərbaycan “itlə dost ol, amma çomağı əldən qoyma” prinsipi ilə hərəkət edir. Bu baxımdan hesab edirəm ki, dövlət başçısının yanaşması düzgündür”.
Partiya sədri onu da əlavə etdi ki, Azərbaycan bütün sahələrdə Ermənistandan üstün mövqedə olmalıdır.
Vidadi ORDAHALLI
