Məlum olduğu kimi, Ermənistan silahlı qüvvələrinin yanvarın 11-i günorta saatlarından etibarən başlatdığı təxribat nəticəsində Azərbaycan-Ermənistan dövlət sərhədinin Kəlbəcər rayonu istiqamətində vəziyyət gərginləşib. Düşmən yaxın məsafədə olan postumuza hücum edib və bununla bağlı olaraq müvafiq tədbirlər görülüb.
Erməni tərəfi iddia edir ki, Azərbaycan guya artilleriya və aviasiya tətbiq edib. Lakin Müdafiə Nazirliyindən bildirilib ki, Azərbaycan ordusunun bölmələri qeyd olunan istiqamətdə heç bir aviasiya vasitəsi və artilleriyadan istifadə etmədən qarşı tərəfin susdurulması məqsədilə adekvat cavab tədbirləri həyata keçirib. Xatırladaq ki, Ermənistan silahlı qüvvələrinin törətdiyi təxribat nəticəsində hərbi qulluqçumuz, müddətdən artıq hərbi xidmət hərbi qulluqçusu əsgər Nəzərov Ayaz Azər oğlu şəhid olub. Bu fonda “caliber.az” saytı Kəlbəcərdəki gərginliyin bəzi detallarını açıqlayıb. Məlumata görə, atışma zamanı postlar arasında məsafə 50 metr olub və hərbçimiz snayperdən açılan atəşlə həlak olub. Bundan sonra Azərbaycan ordusu cavab atəşi açıb. Erməni postu məhv edilib. Düşmənin elə həmin postda ən azı 5 nəfərədək itkisi olub. Ermənilər yaralıları tərk edərək qaçıblar. Artıq erməni tərəfi rəsmən təsdiq edib ki, 2 itkisi və 3 yaralısı var. Məlumata görə, təxribata cəhd edən Artur Mxitaryan və Rudik Qaribyan adlı erməni hərbi qulluqçular məhv edilib. Qeyd edilir ki, təxribata cəhd edərkən məhv edilən Artur Mxitaryan sıravi, Rudik Qaribyan isə kiçik çavuş olub. Təsdiqlənməyən məlumatlara əsasən, ordumuz cavab tədbirləri ilə düşmənin iki postunu darmadağın edib, oradakı silah-sursatları, bir neçə hərbi texnika və hərbi avtomobil məhv edilib. Ekspertlərə görə, görünür, Nikol Paşinyanın KTMT sammitinə formal sədrlik etməsi və Qazaxıstana hərbçi göndərməsi onu yeni avantüraya həvəsləndirib. Amma bu avantüra baş tutmayıb və erməni hərbçilərin ölümünə görə bütün məsuliyyət Ermənistanın hərbi-siyasi rəhbərliyinin üzərinə düşür. Azərbaycan bundan sonra da erməni tərəfinin təxribatlarına ən sərt formada cavab veriləcəyini bildirir. Erməni tərəfinin isə Azərbaycan ordusuna qarşı hansısa uğur əldə etməsi mümkünsüzdür. Bu, 44 günlük savaş zamanı da təsdiqlənib. Məhz həmin savaşda erməni ordusu darmadağın edilib. İndi onun qalıqlarını da Azərbaycan tərəfi tam məhv etməyə hazırdır. Bunu rus hərbi ekspert İqor Strelkov da xüsusi olaraq qeyd edir. O, Qazaxıstanda Kollektiv Təhlükəsizlik Müqaviləsi Təşkilatı (KTMT) ordusunun 98% Rusiya hərbçilərindən ibarət olduğunu və bütün əsas vacib və strateji mövqelərə nəzarət etdiklərini bildirib. Qalan belarus, tacik, qırğız və ermənilərdən ibarət cüzi bir hissəyə Qazaxıstanda ehtiyac olmadığını deyib. İqor Strelkov, xüsusən erməni hərbçilərinin orada “uzaqbaşı bazara nəzarət edə biləcəklərini” bildirib: “Erməni ordusu, internetdə deyildiyi kimi, ancaq bazara nəzarət edə bilər. Bu onlara xas bir şeydir. Maddi və mənəvi cəhətdən böyük əhəmiyyəti var, bir az ruhlanar və vəziyyətlərini düzəldərlər”. Strelkovun sözləri tam həqiqəti əks etdirir. Çünki erməni ordusunun Azərbaycan ordusu tərəfindən məğlub və məhv edilmiş “ordu” olduğunu bütün dünya bilir. Bu fonda İrəvanın yenidən KTMT-ni sərhəd münaqişəsinə cəlb etmək niyyəti də yenə nəticəsiz qalacaq. Çünki ötən il ərzində də sərhəd təxribatları ilə Kollektiv Təhlükəsizlik Müqaviləsi Təşkilatını münaqişəyə cəlb etmək istəyən erməni tərəfinin niyyəti puç olmuşdu. Kollektiv Təhlükəsizlik Müqaviləsi Təşkilatının baş katibi Stanislav Zas dəfələrlə Ermənistanın Azərbaycanla yaşadığı sərhəd gərginliyinə qarışmayacaqlarını bildirib. O, bu cür hadisələrin KTMT nizamnaməsinin kollektiv müdafiə ilə bağlı müddəalarına aid edilmədiyini açıqlayıb: “Anlamaq lazımdır ki, KTMT-nin potensialı yalnız üzv ölkələrdən biri təcavüzə, hücuma məruz qaldıqda istifadə olunur. Burada biz əslində sərhəd hadisəsi ilə qarşılaşırıq. Bu, bir sərhəd insidentidir, insidenti isə aradan qaldırmaq lazımdır və bunun sülh yolu ilə həll edilməsinin tərəfdarıyıq”. KTMT-də yaxşı başa düşürlər ki, Ermənistan rəhbərliyi iki ölkə arasında sərhədlərin delimitasiyasi və demarkasiyası prosesində yaranmış gərginlikdən istifadə edərək yenidən Cənubi Qafqazı müharibə ocağına çevirmək istəyir. Ermənistanda bəzi qüvvələr isə sərhədlərin yenidən müəyyənləşməsini təcavüz kimi qiymətləndirir və KTMT-nin prosesə müdaxiləsi tələb olunur. İrəvanda Ermənistanın da daxil olduğu bu təşkilatın Azərbaycan qoşunlarının “Ermənistan ərazisinin dərinliklərinə getməsinə” reaksiya verilmədiyini deyirlər. Lakin bu cəhdlər həmişəki kimi iflasa məhkumdur. Çünki Azərbaycan sərhəd qüvvələri ölkəmizə aid mövqelərdə yerləşib. Bu mənada, Ermənistanın sərhəd məsələsi ilə bağlı KTMT-yə müraciətinin heç bir əsası yoxdur. Bunun Ermənistan rəhbər dairələrinin məsələni siyasiləşdirmək cəhdindən başqa bir şey olmadığı da bəllidir.
Nahid SALAYEV
