“...Gərək olarsa, bizə edilən hədə-qorxularla bağlı aidiyyəti qurumlara müraciət edəcəyik”
“Bakı-Xəbər” TV-nin “Çoxluqdan 1-liyə” proqramının müəllifi və aparıcısı, politoloq Mehman İsmayılov növbəti dəfə ermənilərin təhdidləri ilə üzləşib. Youtube üzərindən yayımlanan proqramın rus dilindəki variantında müəllifin mütəmadi olaraq rəsmi İrəvanın paxırını açması, erməni toplumunun saxtakarlğını ifşa etməsi İrəvanda və dünyanın ayrı-ayrı yerlərində yaşayan erməniləri möhkəm qıcıqlandırıb.
Bu səbəbdən də “Bakı-Xəbər”in əməkdaşına özlərini “müsəlman erməni” adlandıran şəxslər və başqaları vatsap üzərindən zəng vurur, onu hədələyirlər. Əməkdaşımıza zəng vuran ermənilər onu təhdid edərək deyirlər ki, bizim Bakıda adamlarımız var, onlar sizin başınıza oyun açacaqlar.
- Mehman müəllim, “Bakı-Xəbər” TV-nin efirində yayımlanan “Çoxluqdan 1-liyə” verilişinin rus dilindəki variantı daha geniş auditoriyanı əhatə edir və efirə çıxdığı gündən indiyə qədər özünə saysız tamaşaçı toplayıb. Verilişi bəyənib təqdir edənlərlə yanaşı, onu qıcıqla qarşılayanlar da, sizi təhdid edənlər də var. Kimlərdi onlar və niyə qıcıqlanırlar?
- Bizim “Çoxluqdan 1-liyə” proqramının rus dilində olan versiyası efirə çıxdığı gündən indiyə qədər çox ciddi reaksiyalar verilir. İlk efirimizdəki hədəfimiz Azərbaycan, Qarabağ həqiqətlərini dünyaya yaymaq idi və biz bu istiqamətdə çabalar göstəririk. Biz bu həqiqətləri dünyaya yaydıqca və tarixi sənədlər əsasında həqiqətlər üzə çıxdıqca erməni cəmiyyəti tərəfindən çox böyük müqavimətlə qarşılaşırıq. Bizə vatsapdan və birbaşa telefon zəngləri olur, onlar zəng edib hədə-qorxu gəlirlər, təhqirlər göndərirlər və sair. Xüsusən də Rusiyadan çoxlu zənglər gəlir, Krasnodardan, Rostovdan, Stavropol vilayətindən, Fransadan, ABŞ-dan, bir sözlə, ermənilərin kompakt yaşadığı yerlərdən, ölkələrdən zənglər edilir. Yəni bunlar bütün gücləri ilə bizim televiziyanın götürdüyü xəttə müqavimət göstərirlər. Ermənilər bizə qarşı hədə-qorxular səsləndirməklə öz aləmlərində bizi qorxudacaqlarını zənn edirlər, amma yanılırlar. Çünki belə hədələr bizi qətiyyən yolumuzdan döndərə bilməz.
- Maraqlıdır ki, sizə zəng vurub “Bakıda bizim adamlarımız var, sizin başınıza oyun açarıq” kimi təhdid edənlər də var...
- Bəli, belə sözlər də deyənlər var ki, Bakıda bizim adamlarımız var və sair. Yəni onların göndərdikləri hədə mesajlarını biz “skrinşot” edib saxlayırıq. Zəng vuranlar bizi Rusiya hökuməti ilə, Zatulinlə hədələyirlər. Bu da ermənilərin hər zaman istifadə etdiyi metodlardır. Təbii, bütün bunlar onu göstərir ki, bizim televiziya onların sinir nöqtələrinə çox ağır zərbələr vurur.
- Belə demək olarmı ki, hədəfləri dəqiq vurmağa nail olmusunuz?
- Əslində, hədəfimiz həqiqətləri dünyaya çatdırmaqdır, ermənilər nə düşünür, bu bizi maraqlandırmır. Azərbaycanın beş min illik dövlətçilik tarixindən, Qarabağın tarixindən danışırıq və bunların zəhərlənmiş beynində bir fikir var ki, guya Azərbaycan 1918-ci ildə yaranıb. Belə deyək, erməni cəmiyyəti bolşevik təbliğatını müdafiə etməklə özlərinin bütün yalanlarını, saxtakarlıq siyasətini ört-basdır etməyə çalışır. “Bakı-Xəbər” TV-də xüsusilə də Qazaxıstanla bağlı hazırladığımız verilişdən sonra lap qıcıqlanıblar. Çünki biz verilişdə açıqladıq ki, erməni daşnakları Qazaxıstanda 3 milyon adamın ölümünə səbəb olublar. 1932-1933-cü illərdə Levon Mirzoyan Qazaxıstanın birinci katibi olduğu dövrdə qazaxlara qarşı soyqırım törədib. 1918-1920-ci illərdə Özbəkistanda soyqırım cinayətləri həyata keçiriblər. Ermənilərin cinayətlərini ifşa etdikcə, bu onların hikkəsinin, qəzəbinin artmasına səbəb olur. Biz ermənilərin törətdiyi cinayətləri açdıqca onlar daha da aqressivləşir. Bütün bunlar göstərir ki, biz doğru yoldayıq, bizim televiziya bu tarixi araşdırmaları davam etdirəcək. Biz Qazaxıstanda, Özbəkistanda, Rusiyadakı və başqa ölkələrdəki televiziya tamaçılarımıza bu həqiqətləri çatdırmaqda davam edəcəyik. Ermənilərin hədə-qorxuları bizi qəti şəkildə narahat etmir.
- Təbii, bu. erməni həyasızlığının göstəricilərindən biridir və Siz həqiqəti gün işığına çıxardıqca onlar daha da aqressiv olurlar...
- Erməni həyasızlığı ortadadır və onlar televiziyamıza qarşı təzyiqlər göstərməyə çalışırlar ki, biz susaq.
- Sizinlə birgə Sizə zəng edənlərin nömrələrinə baxdıq. Xüsusi proqramlarla o nömrələri axtarışa verdik və açıq görsəndi ki, bunların çoxu müsəlman adları ilə zəng vurur, özlərini belə təqdim edirlər.
- Bu, erməni xislətinə xas xüsusiyyətdir. Onlar azərbaycanlı, rus və başqa millətlərin adı və soyadları arxasında gizlənib bizə qarşı bu cür təxribatlara əl atırlar. Amma hansı milli kimlik arxasında gizlənməsindən asılı olmayaraq, biz bir kəlməsindən anlayırıq ki, bu ermənidir. Çünki erməninin dəsti-xətti hər yerdə eynidir. Mənə sonuncu dəfə Rusiyadan və Fransadan paralel olaraq zəng edənlər özlərini müsəlmanlığı qəbul etmiş erməni kimi qələmə verirdilər.
- Nə deyirdi onlar, nə istəyirdilər?
- Onların əsas narazılığı ondan ibarət idi ki, siz niyə bu fikirləri bütün ermənilər barədə söyləyirsiniz...
- Belə çıxır ki, Sizi milli ayrıseçkilikdə ittiham etməyə cəhd ediblər?
- Bu adamların nə deməsindən asılı olmayaraq, təbii ki, bizdə elə hiss yoxdur. Mən ermənilərə həmişə bir arqumentlə cavab verirəm. Erməni daşnaklarının 1918-ci ildə törətdiyi qırğınlara, 1914-1920-ci illərdə Zəngəzurda, ardınca Cənubi Azərbaycanda azərbaycanlılara qarşı soyqırımlara, Xocalı genosidinə hələ də bir erməni etiraz bildirilməyib. Zori Balayana, Silva Kaputikyana, Sarkisyana, Köçəryana və digər sürü üzvlərinə bir nəfər də olsun erməni sual verməyib ki, siz nə üçün azərbaycanlı körpələri öldürmüsünüz, nə üçün Azərbaycan tarixini saxtalaşdırırsınız, niyə işğalla məşğul olmusunuz? Belə bir erməni yox ikən biz hesab edirik ki, bunlar ana bətnində zəhərlənmiş toplumdur.
- Mehman müəllim, bu zənglərlə bağlı, xüsusən də “Bakıda bizim adamlarımız var” kimi hədə-qorxu gələnlərlə bağlı Dövlət Təhlükəsizlik Xidmətinə və digər aidiyyəti qurumlara müraciət ediləcəkmi?
- Əvvəla, onların bizə göstərdiyi bütün müqavimətlər bizim doğru yolda irəlilədiyimizi göstərir. Müraciətə gəlincə, gərək olarsa, bizə edilən hədə-qorxularla bağlı aidiyyəti qurumlara müraciət edəcəyik. Digər tərəfdən də, bu cür hədə-qorxular bizi çəkindirmir, sözsüz ki, bunlar bizi yolumuzdan döndərmək üçün qurulan basqılardır. Biz də onların yazdıqlarını, dediklərini izləyirik. Amma biz öz Vətənimizdə yaşayırıq və öz ölkəmizdə özümüzü əmin hiss edirik. Ermənilərin Bakıda adamlarının olduğuna gəlincə, ola bilər, burada erməniyə, rusa, farsa işləyən beşinci kolonun nümayəndələri var. Amma bu bizi çəkindirmir. Vətənimizin bütövlüyü və azadlığı uğrunda görüdüyümüz işlərdə Allahdan başqa bizi heç bir qüvvə dayandıra bilməz.
İradə SARIYEVA
