Məlum olduğu kimi, Ermənistanın Kollektiv Təhlükəsizlik Müqaviləsi Təşkilatının sədri kimi Qazaxıstana kütləvi aksiyaların yatırılması, strateji obyektlərin mühafizəsinin təmin edilməsi üçün 100 əsgər göndərməsini ölkə sakinləri birmənalı qarşılamır. Kimisi Ermənistanın bu addımının gərəksiz, kimisi isə məğlub ordunun Qazaxıstana göndərilməsinin gülünc olduğunu deyir. Bundan başqa, sosial şəbəkələrin erməni seqmentlərində Qazaxıstana gedən erməni hərbçilərin bu dəfə də qazaxlara əsir düşəcəkləri barədə ironik paylaşımlar edilib.
Məsələnin maraqlı tərəfi həm də odur ki, Ermənistan KTMT çərçivəsində Qazaxıstanda iştirak etsə də, Rusiya telekanalının efirində erməni ordusu ələ salınır. Ermənistanın sülhyaratma əməliyyatlarında iştirakı gülüşlə qarşılanır. Qeyd olunub ki, ermənilərdən ibarət cüzi bir hissəyə Qazaxıstanda əslində ehtiyac yoxdur, erməni hərbçiləri orada uzaqbaşı bazara nəzarət edə biləcəklər: “Erməni ordusu, internetdə deyildiyi kimi, ancaq bazara nəzarət edə bilər. Bu onlara xas bir şeydir. Maddi və mənəvi cəhətdən böyük əhəmiyyəti var, bir az ruhlanar və vəziyyətlərini düzəldərlər”.
Görünən odur ki, Ermənistanın KTMT çərçivəsində canfəşanlığı nəinki ölkə daxilində, o cümlədən ölkə xaricində də gülüşlə qarşılanır. Bu həm də onu göstərir ki, kimin hakimiyyətdə olmasından asılı olmayaraq, Rusiya Ermənistana morionet ölkə kimi yanaşır.
“Ermənistana lağlağı münasibətin bir səbəbi də Paşinyanın yeritdiyi ziddiyyətli siyasətlə bağlıdır”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Rusiya üçün müttəfiq anlayışı yoxdur: “Ermənistan isə tarixən Rusiyanın yedəyində gedib. Ermənilərə Rusiya müttəfiq kimi yox, kiməsə təsir etmək üçün alət kimi baxır. O cümlədən, yaxşı bilirlər ki, Ermənistan əsgərləri Qazaxıstanda nəyisə dəyişmək iqtidarında deyil. Rusiyanın KTMT çəçivəsində Ermənistan əsgərlərini Qazaxıstana aparması formal baxımdan Kremlə lazım idi. O mənada ki, Rusiya beynəlxalq qınağa məruz qalmasın. Deməsinlər ki, Rusiya ordusu təkbaşına Qazaxıstana daxil olub. Guya ki, kollektiv qərar əsasında qoşunlar sülhyaratma əməliyyatlarında iştirak edirlər. Hamı yaxşı bilir ki, KTMT-nin başında Rusiya dayanır və bu ölkənin istəklərinə uyğun olaraq qərar qəbul edilir. Rusiyada yaxşı bilirlər ki, ermənilərdən onlara müttəfiq olmaz. Ermənistana lağlağı münasibətin bir səbəbi də Paşinyanın yeritdiyi ziddiyətli siyasətlə bağlıdır. Kreml görür ki, əslində o, Qərbə üz tutmağa çalışır, amma bəzi reallıqlar buna imkan vermir. Çünki Ermənistanın Rusiyadan asılılığı böyükdür. Bütövlükdə Paşinyan hakimiyyətə gələndən sonra Rusiyada Ermənistana etibar etmirlər. Çox yaxşı bilirlər ki, Rusiya zəyifləyən kimi, onlara birinci xəyanət edən ermənilər olacaq. Bir tarixi məqamı qeyd edim ki, SSRİ-nin dağılması 1986-cı ildə Qazaxıstanda baş verən hadisələrdən başladı. O baxımdan Rusiyanın KTMT çərçivəsində Qazaxıstana qoşun yeritməsinin perspektivi yoxdur. Çünki Rusiya daxilində ciddi problemlər mövcuddur”.
Professor onu da qeyd etdi ki, ermənilər hər zaman böyük dövlətlərin əlində alət olublar.
Vidadi ORDAHALLI
