Ermənistanda uşaqların azərbaycanlılara, bütövlükdə türk xalqına nifrət ruhunda “tərbiyə” edildiyi barədə dəfələrlə eşitmişik, bu barədə çox yazmışıq. Haqlı olaraq deyirlər ki, ermənilərin öz uşaqlarını necə yetişdirdiyini bilmək istəyirsinizsə, Ermənistan hökümətinin uşaq bağçaları və orta məktəblər üçün hazırladığı dərsliklərə, vəsaitlərə baxmaq kifayətdir.
Sosial şəbəkələrdə, xüsusən də Teleqram kanallarında Ermənisanda ibtidai siniflərdə tədris edilən dərs vəsaitləri yayılıb. O vəsaitlərin içərisindəki şəkillər və yazılar sözün həqiqi mənasında insanı dəhşətə gətirir. Kitabda türklərə qarşı qəddarlıq səhnələri əks olunur və türkofobiya aşılanır. Bir sözlə, sülh bağlamaq istədiyimiz Ermənistanda erməni uşaqları üçün dərsliklər azərbaycanlılara və türklərə qarşı nifrətlə doludur. Ermənistanda bütün təhsil sistemi uşaqlara nifrət və türkofobiya aşılamaq üzərində qurulub. İbtidai sinif dərsliklərində “paşanı güllələyən erməni qoçu” təsvir edilib və bu da erməni uşaqlarına əbədi türk düşmənçiliyi aşılayır.
“...Türk düşmənçiliyini təbliğ edən dərsliklərə aidiyyəti beynəlxalq təşkilatlar da susqunluq göstərir”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, uzun illərdir Ermənistanda cəmiyyətin bütün sferalarında, o cümlədən də orta məktəblərdə türkfobiya təbliğ edilir, bu, dərsliklərə salınır və erməni uşaqlara xüsusi öyrədilir. Bunun isə çox yanlış bir tendensiya olduğunu və ermənilərin özləri üçün növbəti faciələr vəd etdiyini deyən Q.Hacıyevin fikrincə, erməni uşaqlarına türk düşmənçiliyinin bu şəkildə öyrədilməsi yolverilməzdir: “Bu doğrudan da çox ciddi məsələdir. Bu, Ermənistanın uzun illərdir yürütdüyü antitürk, antiazərbaycanlı siyasətinin əyani təzahürüdür. Ermənilərin antitürk, antiazərbaycan siyasəti ilə mübarizə aparmaq bizim taleyüklü məsələlərdən biridir. Ermənilər iki əsrdir bizim ərazilərdə məskunlaşıblar, burada yaşayırlar, buna görə bizə minnətdar olmaq əvəzinə, 200 ildir ki, düşmənçilik aparırlar, indiki nəsli də türkofobiya ruhunda tərbiyə edirlər. Ara-sıra öz mənafelərinə uyğun olaraq göstərdikləri “yaxşı münasibətlərə” oxşar cəhətlərdə də saxtakarlıqdan, riyakarlıqdan başqa bir şey görmədik. Nə qonşular, nə də qonşu olmayanlar ermənilərdən hər hansı bir səmimiyyət gördü, indi də görmür. Ermənilər uşaqlarını bütövlükdə başqa xalqlara, xüsusən də türklərə qarşı illərdir hazırlayır, onları türk düşməni kimi yetişdirir. Halbuki, uşaqlarını normal qaydalarla da böyüdə bilərlər. Onlar isə bunun əvəzinə övladlarının beynini körpəlikdən zəhərləyirlər, bağçadan başlayaraq onlara türk düşmənçiliyini öyrədirlər. Son 30 ildə də türkofobiyanı, Azərbaycanafobiyanı dərsliklərə daşıylblar və uşaqlarını bağçadan, ibtidai siniflərdən türk xalqına nifrət ruhunda tərbiyə edib, onları yanlış, zərərli istiqamətə yönəldirlər. Düşmənçilik yaratmaq, uşaqları da bu ziyanlı prosesə qoşmaq, onlardan alət kimi istifadə etmək heç bir dövlətə, xalqa xeyir gətirməyib, gətirə bilməz də. Özü də bu proses süni yaradılmış münaqişələrin ətrafında aparılır, uşaqlara həqiqət olmayan şeylər öyrədilir”.
Q.Hacıyevin sözlərinə görə, bu məsələnin xüsusilə də dərsliklərə salınması, uşaqlara yalançı ideologiya təlqin edilməsi ermənilərin və Ermənistanın faciəsini daha da dərinləşdirir. Ermənistanda dərsliklərin çox aqressiv olduğunu deyən Q.Hacıyevin fikrincə, dərsliklərə çəkilən illüstrasiyalar bu aqressiyanı daha qabarıq görsədir və bu uşaqların beyninə daha çox təsir edir. “Ermənilərin dərsliklərində, kitablarında Azərbaycana, türk dünyasına bütün istiqamətlərdə böhtan, şər atılır. Bu neqativ proses çoxdan başlanıb, indi də davam edir. Ermənistanın heç bir rəhbərliyi indiyə qədər buna son qoymaq istəməyib. Halbuki, onlar bu dərslikləri yığışdırıb ortaya normal dərsliklər qoymalıdırlar ki, heç olmasa yeni nəsil normal böyüsün, amma etmirlər. Çünki onlar antitürk siyasəti aparırlar və dərsliklərdə də uşaqlara “türk sənin düşmənindir, harda türk gördün öldürməlisən” kimi təbliğatlar aparılır. Çox təəssüf ki, Ermənistanda məktəblərdə türk düşmənçiliyini təbliğ edən dərsliklərə aidiyyəti beynəlxalq təşkilatlar da susqunluq göstərir. Baxmayaraq ki, illər əvvəl bəzi hesabatlarda erməni uşaqlarına orta məktəbdə tədris edilən dərsliklərin məzmunu kəskin tənqid edilmişdi, amma bu məsələ ört-basdır edildi. Bu isə onu göstərir ki, bəzi beynəlxalq təşkilatlar erməni şagirdlərin türkofobiya ruhunda böyüdülməsinə qəsdən göz yumur. Yəni onlar da istəyir ki, erməni uşaqları türk millətinə qorxu ilə düşmən kimi yanaşsın və iki xalq arasında sülh olmasın, əbədi düşmənçilik olsun. Ermənistan dərslik siyasətini dəyişməli və dərsliklərindən bu çirkinliklərini yığışdırmalıdır. Əks halda bunun zərərini erməni xalqı çəkəcək, necə ki, illərdir çəkir” - deyə professor Hacıyev bildirdi.
İradə SARIYEVA
