Sovetlər Birliyi dövründə rayonlarda Komsomol Gənclər İttifaqları mövcud idi. Həmin o gənclər təşkilatlarının nəzdində Pioner evləri fəaliyyət göstərərdi. Sözügedən pioner evlərində pulsuz dərnəklər təşkil edilərdi.
Artıq müstəqil bir dövlətik. Həmin Lenin Komsomol Gənclər İttifaqı Rayon Gənclər və İdman İdarəsi, Pionerlər evi isə Gənclər evi ilə əvəz olunub. O dövrdə Gənclər evi köhnə, heç bir şəraiti olmayan təmirsiz, qapı və pəncərələri köhnə, sınıq-salxaq, bəsit otaqlarda fəaliyyət göstərirdi. Onları indiki Gənclər evi ilə müqayisə etmək çox çətin idi. Ona görə ki, indiki Gənclər Evi hər bir şəraiti olan yaraşıqlı, ikimərtəbəli binada fəaliyyət göstərir. Gənclər Evində kompüter, elektron kameralardan tutmuş, Akt zalınadək hər şey var. Ancaq həmin Gənclər Evinin fəaliyyəti görünmür.
Məlumat üçün bildirək ki, Bakı və regionlarda ümumilikdə 40-dan artıq Gənclər Evi inşa olunub. Həmin evlərin yaradılmasında məqsəd gənclər arasında vətənpərvərlik işinin gücləndirilməsi, onların ahəngdar inkişafı və asudə vaxtının təşkili, gənclərə psixoloji reabilitasiya, hüquqi, informasiya yardımlarının göstərilməsi və onların təşəbbüslərinin dəstəklənməsidir. Ancaq qeyd etdiyimiz kimi, bəzi Gənclər Evlərinin qapıları isə ümumiyyətlə gənclərin üzünə bağlıdır.
“Paytaxt və bölgələrdə Gənclər Evlərinin fəaliyyəti ilə bağlı monitorinqlər həyata keçirilməli və nəticələrlə bağlı konkret addımlar atılmalıdır”
Millət vəkili Müşfiq Cəfərov bildirdi ki, paytaxt və bölgələrdə Gənclər Evlərinin fəaliyyəti ilə bağlı monitorinqlər həyata keçirilməli və nəticələrlə bağlı konkret addımlar atılmalıdır: “Gənclər Evlərinin işinə, fəaliyyətinə, onların proqramlarına əsas nəzarət Gənclər və İdman Nazirliyi Tərəfindən həyata keçirilir. Konkret elə hallar olarsa, mütləq şəkildə Gənclər və İdman Nazirliyinə bildirilməlidir. Ümumiyyətlə, Prezidentin bununla bağlı bir bildirişi olmuşdu ki, “Gənclər Evləri, Olimpiya Kompleksləri, bu kimi binalardan bəzi hallarda səmərəli istifadə olunmur, hətta bağlı qalır”. Ona görə yenidən belə hallar varsa, nazirlik regionlarda bu işi canlandırmalıdır. Millət vəkili kimi təmsil etdiyim Gəncə şəhərində fəaliyyət göstərən Gənclər Evində mütəmadi tədbirlər, xidmətlər göstərilir. Yəni tədbirdən-tədbirə qapı açılmır, daimi işçi heyəti var. Qonşu Göygöl rayonunda olan Gənclər Evində də aktiv fəaliyyət müşahidə edirəm. Amma hansısa bir regionda belə bir problem varsa, təbii ki, həmin Gənclər Evində mütləq şəkildə monitorinq həyata keçirilməli və konkret addımlar atılmalıdır”.
Günel CƏLİLOVA
