Qazaxıstanda son günlər baş verən hadisələr Azərbaycanda da həssaslıqla izlənir. Qarabağın işğaldan azad edilməsindən sonra ideologiyasız qalmış radikal siyasi müxalifət bu hadisələrin dolayı təsirindən bir qədər canlanmış görünür. Hətta vəziyyət o həddə çatıb ki, həmin dairələr Qazaxıstanda baş verənlərlə bağlı sosial mediada paylaşılan videoların üzərinə yazılar əlavə edərək, güya hadisələrin ölkəmizdə cərəyan etdiyinə dair yanlış rəy formalaşdırmağa çalışırlar. Üstəlik, əhaliyə müraciətlər edirlər ki, onlar da qazaxlar kimi küçələrə çıxıb, öz haqlarını tələb etsinlər. Ortaya acı bir mənzərə çıxır. Sübut olunur ki, bizim radikal müxalifətin dəyişməz simaları son 30 ildə yalnız hansısa ölkədə baş verən proseslərin bizə transformasiya olunması arzusundan başqa nəsə edə bilməyiblər. Arxivlərə müraciət etsəniz görərsiniz ki, bizim müxalifət bütün rəngli inqlablar zamanı belə davranıb, eyni sözləri və çağırışları “ərəb baharı” zamanı da səsləndirirdilər. Postsovet ölkələrində baş verən çevirilişlər, etiraz dalğaları zamanı da bənzər davranışları ortaya qoyublar. Bir sözlə, özlərinin hansısa siyasi hadisəni yaratmağa gücü çatmayıb. Ancaq onlar bilmirlər ki, hər bir ölkənin özünə məxsus spesifik xüsusiyyətləri var. Qazaxıstanda baş verən hadisələrin Azərbaycanda yaşanmamasının bir neçə səbəbi var və onlardan ən başlıcası heç də müxalifətin zəif olması ilə bağlı deyil. Bizdə xalq kütlələrinin müxalifət ətrafında birləşməsi mərhələsi çoxdandır tarixə qovuşub. Bəs başqa hansı amillər var ki, bizdə Qazaxıstandakı hadisələrin baş verməsinə imkan vermir? Ermənilər qarşısında qazandığımız qələbədən sonra hansı həssas bir dönəmə girdiyimizi unudanlar sanki anlamırlar ki, Azərbaycanda hər hansı bir siyasi qarşıdurma, küçə iğtişaşları 30 illik bir fasilədən sonra əldə etdiyimiz hərbi nəticələri sıfırlaya, Ermənistanı dirçəldə və revanşa təhrik edə bilər.
Radikal siyasi müxalifət öz mövqeyini büruzə verdi. Hətta bəzi partiya rəhbərləri Qazaxıstan iqtidarının öz ölkəsini böhrandan çıxartmaq addımlarına əsəbiləşdi, hakimiyyətin başında dayananları “qorxaq arvad”, “xain” və s. adlandırdı. Onların düşüncəsinə görə, Qazaxıstan iqtidarı dərhal istefaya getməli, hakimiyyəti də küçədə iğtişaş törədən başıpozuq etirazçılara verməlidir. Qazaxıstanda baş verən hadisələrin başqa ölkələrdə təkrarlanmaması üçün güclü lider və siyasi iradə olmalıdır. Azərbaycanda isə bu liderlik hazırda Prezident İlham Əliyevə məxsusdur. İlham Əliyev bütün siyasi proseslərdə uzaqgörənlik, siyasi iradə və qətiyyət nümayiş etdirir. Bir daha bəlli olur ki, yalnız düşünülmüş, praqmatik siyasət həyata keçirməklə, uğurlu sosial layihələrlə idarəçilikdə uğur qazanmaq olar. Qazaxıstanda sabitiyin pozulması, insanların qətlə yetirilməsi, talan və qarətlər, əlbəttə ki, təəssüf doğurur. Amma bu, eyni zamanda bir faktı növbəti dəfə üzə çıxarır. Bu, güclü lider faktorudur. Azərbaycan Prezidenti xalqdan ayrı düşən məmurlara qarşı barışmaz mövqe sərgiləyir. O dəfələrlə çıxışlarında məmur özbaşınalıqlarına toxunub və buna qarşı ən ciddi tədbirlər həyata keçirib. Dövlət başçısı, eyni zamanda, həddini aşan məmurlara qarşı sərt tədbirlər görüb, onları vəzifələrindən kənarlaşdırıb. Həmin məmurların ədalət mühakiməsi qarşısında cavab vermələri təmin edilib. Bundan başqa, dövlət başçısı oliqarxların özbaşınalıqlar etməsinə qarşı çox sərt mövqe tutub. Təbii ki, bütün bunlar da xalq tərəfindən yüksək dəyərləndirilir. Ölkədə xalq-iqtidar birliyi yüksək səviyyədədir. Prezident İlham Əliyev ölkəni böyük uzaqgörənliklə və müdrikliklə idarə edir. Ölkəmizdə neqativ hallara qarşı davamlı ciddi mübarizə aparılır. Bütün bunlara görə də, Qazaxıstanda baş verən proseslərin ölkəmizdə təkrarlanması mümkün sayılmır.
Məhəmmədəli QƏRİBLİ
