Kollektiv Təhlükəsizlik Müqaviləsi Təşkiatının Qazaxıstana qoşun göndərməsi Ermənistan hakimiyyət rəsmilərini şirnikləndirib. Ölkə rəsmiləri hesab edir ki, bənzər situasiya ilə Ermənistan da üzləşsə, hərbi təşkilat onların imdadına yetişəcək. Ermənistan Təhlükəsizlik Şurasının katibi Armen Qriqoryan KTMT-nin sülhməramlı missiyası çərçivəsində Qazaxıstana yüzlərlə erməni hərbçisinin göndərilməsi ilə bağlı İctimai Televiziyaya müsahibəsində ümid etdiyini bildirib ki, gələcəkdə oxşar vəziyyətdə Ermənistan da müvafiq yardım ala bilər: “Bilirsiniz, heç bir demokratiya və inqilabi ideallar və dəyərlər Ermənistanda təhlükəsizlik sisteminin bərpası və möhkəmləndirilməsinin dəyəri ilə müqayisə edilə bilməz. Rusiya Federasiyasının Qazaxıstan zonasına daxil olmasının böyük təsiri var. Ölkəmiz Moskvaya ciddi xidmət göstərdi. İndi də bunu etmək lazımdır. Bunun üçün ölkəmizin edə biləcəyi və almalı olduğu üstünlükləri hesablayın. Düşünürəm ki, Ermənistan rəhbərliyi bunu nəzərə almalı və yalnız ölkənin təhlükəsizliyini xarici təhdidlərdən qorumaq üçün həyata keçirməlidir. Təşkilata üzv ölkələr necə reaksiya vermək lazım gəldiyini əyani göstərdilər. Ümid edirik ki, oxşar durum yaranarsa, təşkilat Ermənistana da dəstək olacaq”.
Maraqlıdır, doğrudanmı hacansa Köçəryan və yaxud da digərləri Paşinyan hakimiyyətinə qarşı üsyan qaldırsa KTMT bənzər formada Ermənistana yardım edə bilər?
“Belə hadisə baş verərsə, onun arxasında Rusiya dayanacaq”
Məsələyə münasibət bildirən hərbi ekspert İbrahim Rüstəmli bunu istisna etdi: “Ən azından ona görə ki, Ermənistan Qazaxıstan qədər strateji əhəmiyyətə malik deyil. Bu gün çox ciddi və mürəkkəb siyasi proseslər gedir. Nəzərə almaq lazımdır ki, Ermənistanın hazırkı rəhbərliyi Rusiya ilə münasibətləri nizamlamaqda çox ciddi problemlər yaşayır. Paşinyan hakimiyyəti Kreml üçün arzuolunan komanda deyil. Bunun başlıca səbəbi ölkə hakimiyyətinə Qərbdən verilən dəstəklə bağlıdır. Məsələ ondadır ki, Qərb Ermənistanın Rusiyaya yaxınlaşmasını istəmir. Paşinyan hakimiyyəti də mümkün olan qədər bu istiqamətdə çalışır. Üstəlik, Ermənistan cəmiyyətində də Rusiyaya yönəlik güclü nifrət formalaşıb. Rusiyaya münasibətdə kəskin dəyişikliklər izlənilir. Bütün bunlar o fonda baş verir ki, guya Rusiya Ermənistanı satıb, onları köməksiz qoyub. Əslində Rusiya beynəlxalq tələblərə uyğun olaraq dünya ictimaiyyəti tərəfindən tanınan Azərbaycanın ərazi bütövlüyünü dəstəkləyib. Nəzərə alsaq ki, Paşinyan özü belə Putinlə olan münasibətləri nizamlaya bilmir, o zaman Ermənistanın gözləntiləri yersizdir. Çünki hadisələrin konfiqurasiyasında ciddi fərqlər var. Ona görə də haçansa Ermənistanda Qazaxıstana bənzər hadisə baş verərsə, KTMT analoji dəstək verməyəcək. Qurumun patronu olan Rusiya buna imkan verməz. Bunu Ermənistanda hakimiyyət rəsmiləri də yaxşı bilir. Əksinə, bənzər hadisələr olarsa, Rusiya çalışacaq ki, bu minvalla Paşinyanı devirsin. O cümlədən, belə hadisə baş verərsə, onun arxasında Rusiya dayanacaq”.
Hərbi ekspert onu da qeyd etdi ki, bu kimi məsələlər Ermənistanın xeyrinə olmayacaq.
Vidadi ORDAHALLI
