Paytaxt Bakıda İordaniyanın mərhum kralı Kral Əl-Hüseyn bin Talalın adına küçə var. İordaniya müsəlman ölkəsi olsa da, Ermənistanla çox yaxşı münasibətlərdə olan bir ölkə kimi tanınır və əsasən də Ermənistanın maraqlarını müdafiə edən addımlar atır, Ermənistan dövləti ilə isti əlaqələrini davam etdirir. Məlum olduğu kimi, İordaniyanın indiki kralı da İrəvana səfər edib və bu səfərlə də Ermənistana öz dəstəyini göstərib. Belə demək mümkündürsə, bu ölkənin yalnız adı müsəlman dövlətidir. Sirr deyil ki, Ermənistanla xosunlaşan, can bir qəlbdə olan, “cici-bacı”lıq işlədən müsəlman dövlətlərindən biri məhz İordaniyadır. Ölkəmizin paytaxtındakı küçələrdən birinə İordaniyanın mərhum kralının adının verilməsi paytaxt sakinlərinin də təəccübünə səbəb olur, onlar sual verirlər ki, nə üçün Qarabağda müsəlman məscidlərinə donuz bağlayan, müqəddəs yerlərimizi murdarlayan Ermənistanla can bir qəlbdə olan bir ölkənin kralının adına Bakıda küçə olmalıdır. Bir halda ki, həmişə bizim düşmənimizə dəstək verib, nə olsun müsəlman dövlətidir, onun mərhum kralının adına Bakıda küçə olması yaxşı hal deyil. Sakinlər belə deyir. Azərbaycan Prezidenti İlham Əliyev də Ermənistanla dost olan, dostluğunu davam etdirən müsəlman ölkələrinə səslənib, onları bu münasibətdən çəkinməyə çağırıb. Prezident bir neçə dəfə Ermənistanla “cici-bacı” olan bəzi islam dövlətlərinə vacib bir mesaj verib ki, islam dinini təhqir edən Ermənistandan sizə dost olmaz, düşməninizi tanıyın. Amma, İordaniya da daxil olmaqla, bəzi müsəlman dövlətləri məscidlərinə donuz baglayan Ermənistanla dostluq münasibətlərindən əl çəkmir. Ölkə başçısının qeyd etdiyi kimi, məscidlərdə donuz və inək saxlayanlar müsəlmanlarla dost ola bilməz. Kimlərsə məscidlərdə donuz, inək saxlayanla dostluq edirsə, ya müsəlman deyil, ya da onun ümumiyyətlə dindən anlayışı yoxdur.
Dediyimiz kimi, bu həmin İordaniyadır ki, Ermənistandan əl çəkmir. Belə bir ölkənin kralının adına nə üçün Bakıda küçə olmalıdır?
“...İordaniya krallarının və yaxud başqalarının adına Ermənistanın şəhərlərində küçə verilsin...”
Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, BAO başqanının Türk Dünyası ilə əlaqələr üzrə müavini, siyasi şərhçi Faiq Ələkbərli baki-xeber.com-a şərhində bildirdi ki, bizim üçün hər şeydən yüksəkdə Azərbaycan dövlətinin maraqları dayanmalıdır və dövlət maraqlarına zidd addımlar atılmamalıdır. “Hər bir dövlətin özünün həm dövlət, həm də milli maraqları var. Bəzən bu milli və dövlətçilik maraqlarının dinlə nə dərəcədə üst-üstə düşüb-düşməməsi məsələsi bizi düşündürür. Bu mənada Ermənistanla yaxınlıq edən müsəlman dövləti yalnız İordaniya deyil, İran İslam Respublikası, Birləşmiş Ərəb Əmirlikləri və başqa müsəlman dövlətləridir ki, onlar Azərbaycan-Ermənistan münaqişəsində ya gizlin, ya da tamam aşkar şəkildə Ermənistana dəstək veriblər. Bəzən biz bunu həmin ölkələrdə erməni lobbisinin güclü olması ilə də əlaqələndiririk. Ancaq məncə, məsələ burada erməni lobbisinin güclü olması deyil, həm də həmin dövlətlərin və onların xalqlarının, yaxud da rəhbərlərinin də Azərbaycanla Ermənistana münasibətdə hansı mövqe tutması da müəyyən rol oynayır. Bu isə o deməkdir ki, İordaniya rəhbərliyi də, müsəlman dövlətinin başçısı olmasına baxmayaraq, əsasən Ermənistana bu və digər şəkildə dəstək verir. Hətta müsəlman dövləti olmasına rəğmən Ermənistanla münasibətlərini daha yüksək səviyyədə qurub və davam etdirir. Belə olduğu təqdirdə də Azərbaycan İordaniyaya layiq olduğu cavabı verməlidir. Təkcə İordaniyaya deyil, onun kimi Ermənistanla dostluq edən İran, Birləşmiş Ərəb Əmirliklərinə və başqa belə ölkələrə də həmçinin. Ermənistanla dostluq edən ölkənin kralının adına Azərbaycanın istənilən yerində küçə verilməsi qəbuledilməzdir. Yenə də deyirəm, bu, müsəlman məscidlərinə donuz bağlayan Ermənistanla dostluq edən müsəlman ölkələrinin hər birinə aiddir”.
F.Ələkbərlinin fikrincə, doğrudan da rəsmi Əmman Azərbaycana münasibətdə səmimi münasibət nümayiş etdirib müsəlman məscidlərini donuzxanaya çevirib təhqir edən Ermənistanla əlaqələrinə yenidən baxsa, bu ölkə ilə münasibətlərini soyutsa, islam həmrəyliyi prinsipindən çıxış etsə, o zaman Bakıda, yaxud ölkəmizin başqa yerində onun kralının adına küçənin olması normal qarşılanar. “Ancaq bu səmimiyyət Azərbaycana deyil, Ermənistana yönəlibsə, o zaman İordaniya krallarının və yaxud başqalarının adına Ermənistanın şəhərlərində küçə verilsin, bu onların mahiyyətinə daha uyğun olar. Bizim də Azərbaycan olaraq yalnız İordaniya məsələsində deyil, digər bu kimi adının yanına “müsəlman” sözü qoşan, lakin islam dininə zidd hərəkət edən dövlətlərə münasibətdə qəti və sistemli bir mövqeymiz olmalıdır. Onlar da görməlidir ki, məhz Azərbaycana yönəlik hansısa bir məsələdə qeyri-etik və qeyri-səmimi davranışlar nəticəsiz qalmayacaq. Əgər İordaniya müsəlman dövləti olmasına baxmayaraq Ermənistanı özünə daha yaxın bilirsə, Ermənistanla münasibətlərini inkişaf etdirirsə, o zaman Azərbaycanın da müvafiq addımlar atması təbii olardı. Milli və dövlət maraqlarına münasibətdə Azərbaycan daha da diqqətli olmalıdır, öz milli və dövlət maraqlarına uyğun hərəkət etməlidir. Yəni din məsələsində hansı dövlətlər öz həssaslığını qoruyur, onlarla da mübasibətlərimiz davam edə bilər. Ancaq kimlərsə bu məsələdən sui-istifadə edir, o zaman Azərbaycan da öz mövqeyini qəti şəkildə ortaya qoymalıdır və İordaniya, BƏƏ, İran, eləcə də başqa bu kimi islam ölkələri də görməlidirlər ki, Azərbaycanın da bu məsələdə öz mövqeyi var, bu mövqeyindən də heç bir zaman geri çəkilməyəcək, müvafiq addımları o da atacaq”.
“Biz bizimlə sözün həqiqi mənasında dost, qardaş olan ölkələrlə münasibət qururuq və onu daha da inkişaf etdirməliyik” - deyən F.Ələkbərli bildirdi ki, adını “müsəlman dövləti” qoyub Azərbaycanın ərazi bütövlyünü pozan dövlətə dəstək verənlərə qarşı, təbii, Azərbaycan da öz dövlət maraqlarına uyğun hərəkət etməlidir.
İradə SARIYEVA
