Qazaxıstan prezidenti Kasım-Jomart Tokayev ölkədəki vəziyyətlə bağlı KTMT-yə müraciət edib. Qazaxıstanın dövlət başçısı Təhlükəsizlik Şurasının fövqəladə iclasında bildirib ki, bu “terrorçu dəstələri” beynəlxalq xarakter daşıyır, xaricdə ciddi təlim keçiblər və onların Qazaxıstana hücumu təcavüz aktı kimi qiymətləndirilə bilər və edilməlidir: "Bununla əlaqədar, Kollektiv Təhlükəsizlik Müqaviləsi əsasında bu gün KTMT rəhbərlərinə müraciət etdim ki, bu terror təhlükəsinin aradan qaldırılmasında Qazaxıstana yardım etsinlər. Əslində bu, təhlükə deyil, ərazi bütövlüyünə zərbə vurmaqdır”.
Göründyü kimi, KTMT Qazağıstanda antiterror əməliyyatlarına başlamaq üçün əlində əsasın olduğunu bildirərək həmin ölkəyə daxil olub. Bu məntiqlə, Azərbaycanın da Qarabağdakı terrorçu qalıqlarını təmizləməsi üçün tam əsasın olduğu qənaəti ortaya çıxır.
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Kollektiv Təhlükəsizlik Müqaviləsi Təşkilatının sülhməramlı qüvvələri Qazaxıstana göndərilib: “Yanvarın 6-da qəbul edilmiş qərara uyğun olaraq, vəziyyəti sabitləşdirmək və normal məcraya yönəlmək üçün Kollektiv Təhlükəsizlik Müqaviləsi Təşkilatının Kollektiv Sülhməramlı Qüvvələri məhdud müddətə Qazaxıstan Respublikasına göndərilib. Hərbi qurumun tərkibinə Rusiya, Belarus, Ermənistan, Tacikistan və Qırğızıstanın silahlı qüvvələrinin bölmələri daxildir. Bildirilir ki, KTMT-nin Kollektiv Sülhməramlı Qüvvələrinin əsas vəzifələri mühüm dövlət və hərbi obyektlərin mühafizəsi, vəziyyətin sabitləşdirilməsi və hüquqi müstəviyə qaytarılmasında Qazaxıstan Respublikasının hüquq-mühafizə qüvvələrinə köməklik göstərməkdir. Rusiya Federasiyasından Kollektiv Sülhməramlı Qüvvələrinin tərkibinə Hava Desant Qüvvələrinin bölmələri və hərbi hissələri daxil edilib. Qazaxıstandakı kütləvi iğtişaşların təşkilində ölkə ərazisinə sızmış hansısa radikal islamçı təşkilatın, xüsusən də “İŞİD-Xorasan” qruplaşmasının ittiham ediləcəyi daha çox gözləniləndir. Çünki bu, Tokayevə həm KTMT-ni ölkəsinə çağırışının qanuniliyini əsaslandırmaq üçün gərək olacaq, həm də Rusiyanın Özbəkistan, Qırğızıstan, Tacikistan və Türkmənistan sərhədlərinin təhlükəsizliyini birgə qorumaq təşəbbüsünü legitimləşdirəcək. Rusiya xüsusi xidmət orqanları da 2014-cü ildən bəri İraq və Suriyadan qayıdan İŞİD döyüşçülərinin Mərkəzi Asiyada cəmləşdiklərini və növbəti terror xaosunun Mərkəzi Asiyada yaşanacağını elan etmişdilər. İndi Qazaxıstandakı hadisələrdə də radikal islamçılar suçlu elan ediləcəksə, hadisələrin hansı ssenari üzrə inkişaf edəcəyi haqda artıq aydın təsəvvür yaranacaq. Bu baxımdan da, Azərbaycanın Qarabağda anti-terror əməliyyatlarını keçirməyə tam hüququ çatır. Hələ Qazağıstanda terrorçuların olub-olmadığı tam təsdiqini tapmayıb. Ancaq Qarabağın ermənilər yaşayan hissəsində mərkəzi hakimiyyətə itaətsizlik var, silahlı terrorçular mövcuddur. Eyni zamanda, Ermənistan öz üzərinə götürdüyü öhdəlikləri yerinə yetirmir. Bütün bunlar bizə antiterror əməliyyatlarına başlamağa tam əsas verir”.
Məhəmmədəli QƏRİBLİ
