Ermənistan Kollektiv Təhlükəsizlik Müqaviləsi Təşkilatının (KTMT) sülhməramlı qüvvələrinin tərkibində Qazaxıstana 70 hərbçi göndərib. Söhbət Qazaxıstanda kütləvi etirazlar fonunda kontingentin tərkibində strateji obyektlərin mühafizəsini təmin edəcək 70 hərbi qulluqçudan gedir.
Ermənistanın Qazaxıstana sülhməramlı adı altında əsgər göndərməsi ikrah hissi yaradır. Ən azından ona görə ki, Qazaxıstan kimi böyük ölkədə sabitliyin yaradılmasında Ermənistanın hansısa müsbət rol oynaya biləcəyi gülünc təsir bağışlayır. Çünki Ermənistan KTMT üzvi olsa da, öz sərhədlərini mühafizə etməyə yetərli hərbi imkana malik deyil. Məsələnin başqa bir diqqəti çəkən tərəfi Rusiyanın bunu olduqca normal qarşılamasıdır. Çünki 10 noyabr 2020-ci ildə 44 günlük müharibə Azərbaycanın qələbəsi ilə yekunlaşandan sonra Qarabağda Türkiyə sülhməramlılarının da fəal iştirak etməsi gündəmə gəldi. Ancaq qəribədir ki, o vaxt daha çox Rusiya buna qarşı çıxdı. Rusiya prezidenti Vladimir Putin həmin vaxt verdiyi müsahibədə dedi ki, Qarabağa türk əsgəri göndərmək olmaz. Bunu onunla əsaslandırdı ki, bəs orada yaşayan ermənilər türk əsgərini görsə qıcıqlanacaqlar. 1915-ci ildə baş verən hadisələr və digər məsələlər bunun kökündə dayanır. Belə idisə, o zaman Azərbaycan türkləri ilə yenicə müharibədən çlxmış və məğlub olmuş 70 erməni əsgərini türk qazaxların üstünə göndərmık nə qədər doğrudur?
“Putinin sülhməramlı məsələsində sərgilədiyi mövqe Rusiyanın imperiya maraqlarını özündə ehtiva edir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Putinin məlum siyasəti Rusiyanın imperiya maraqlarından irəli gəlir: “Əvvəla, Qazaxıstan prezidentinin belə tez-tələsik KTMT-ni köməyə çağırması yanlış addım idi. Hesab edirəm ki, burada bir sıra qaranlıq məqamlar var. Çünki Qazaxıstan böyük və MDB məkanında iqtisadi göstəriciləri digərləri ilə müqayisədə yaxşı vəziyyətdə olan dövlətdir. Belə bir dövlətin məlum ixtişaşlar qarşısında aciz qalması normal görünmür. Üstəlik, KTMT-nin funksiyası üzv ölkələri xarici təcavüzdan qorumaqdır. O üzdən, təşkilat üzvlərinin sülhməramlı adı altında Qazaxıstana daxil olması qurumun nizamnaməsi ilə uzalaşmır. Putinin sülhməramlı məsələsində sərgilədiyi mövqe Rusiyanın imperiya maraqlarını özündə ehtiva edir. Məsələ ondadır ki, Rusiya heç vaxt Türkiyənin hərbi baxımdan Cənubi Qafqazda, o cümlədən Qarabağda təmsil olunmasında maraqlı olmayıb. Məhz bu səbəbdən hər vasitə ilə Türkiyə əsgərlərinin Qarabağa daxil olmasına imkan vermədi. Çünki yaxşı bilirdi ki, Türkiyənin orada olması erməni separatizminə birdəfəlik son qoyacaq. Bu da Kremlə sərf etmir. Ona görə ki, Moskva 30 ildən çoxdur separatizmdən alət kimi istifadə edərək postsovet ölkələrini təzyiq altında saxlayır. Qazaxıstan dəfələrlə Azərbaycanın mənafeyindən çıxış etdiyi üçün bu, ermənilər tərəfindən nifrətlə qarşılanıb. Heç kəsə sirr deyil ki, ermənilər türklərə düşmən gözü ilə baxır. O üzdən, Ermənistan KTMT üzvü olsa da, erməni əsgərlərinin Qazaxıstana getməsi doğru addım deyildi. Bu bir daha onu göstərir ki, Putin Türkiyənin Azərbaycanda hərbi mövcudluğunu əngəlləmək üçün məlum mövqedən çıxış edib. Eyni zamanda, türk dövlətlərinin birliyini sarsıtmaq üçün belə siyasət yeridir”.
Partiya sədri onu da qeyd etdi ki, erməni əsgərlərinin Qazaxıstanda mövcudluğu uzanarsa, mütləq bunun hansısa fəsadları özünü göstərəcək.
Vidadi ORDAHALLI
