Qazaxıstan prezidenti Qasım-Comərd Tokayevin Kollektiv Təhlükəsizlik Müqaviləsi Təşkilatına (KTMT) etdiyi çağırışla, digər üzv ölkələrlə yanaşı, Ermənistan da KTMT üzvü olaraq Qazaxıstana hərbçi göndərib. 70 nəfərlik Ermənistan hərbçiləri Qazaxıstana çatar-çatmaz, ermənilər sosial şəbəkələrdə açıq yazdılar ki, erməni hərbçiləri ora qazaxlara divan tutmağa gedib.
“Sülhməramlı” libasında Qazaxıstana gedən erməni hərbçilərinin qazax türklərinə qarşı soyqırım törətmək niyyətində olduqlarını erməni sosial şəbəkə istifadəçiləri özləri açıq deyir. Araik Abramyan adlı erməni “tezliklə qazaxlara öz Xocalılarını təşkil edəcəyik”- deyə sosial şəbəkələrdəki erməni seqmentində yazıb. Bunu təkcə o yazmayıb, başqa ermənilər də ona “züy” tutaraq, 70 nəfər erməni hərbçisinin ora qisas üçün getdiyini yazıblar. Arsen Babayan adlı erməni də “qoy o vəhşiləri cəzalandırsınlar, bu qazaxlar mahiyyətcə elə azərbaycanlılar və türklərdir, yalnız onların gözləri qıyıqdır, ona görə də işləyin qardaşlar” deyə çağırış edib.
“Qazaxıstan cəmiyyətinə mesaj göndərirlər ki...”
Məsələni “Bakı-Xəbər”ə şərh edən Qarabağ Azadlıq Təşkilatının (QAT) sədri Akif Nağının fikrincə, Ermənistanın faşist niyyəti və davranışı özünü burada da büruzə verəcək. QAT sədrinin sözlərinə görə, bu kimi çağırışlar Ermənistan hərbçilərinin cinayətkar mahiyyətini bəyan edir. “KTMT-nin Qazaxıstana hərbi qüvvə yeritməsi ümumiyyətlə xoşagələn və qəbuledilən hal deyil. Bu gərək baş verməyəydi. Bütövlükdə, KTMT ölü bir qurum kimi ortada idi və bu onun ilk hərbi aksiyasıdır ki, hansısa məsələyə bu şəkildə müdaxilə edir. KTMT-nin Qazaxıstana göndərdiyi hərbi kontingentin tərkibinin müəyyənləşdirilməsi məsələsi də göz qabağındadır. Ermənistanın KTMT-yə sədrlik etdiyi sözdə deyilsə də, onun sədrliyinin heç bir mənası yoxdur, çünki reallıqda ora Rusiya rəhbərlik edir. Bu baxımdan, Qazaxıstana hərbi kontingent göndərərkən Rusiya onun tərkibi barədə də düşünməli idi. Ola bilsin ki, ümimi hərbi qüvvə görüntüsü yaratmaq istəyirlər, bu quruma daxil olan ölkələrin hər birindən müəyyən sayda hərbçi cəlb edirlər, amma əsas qüvvə yenə də Rusiyanın silahlı qüvvələridir. Ancaq yenə də vurğulamaq istəyirəm ki, Qazaxıstan gərək öz problemini özü həll edəydi”.
A.Nağı qeyd etdi ki, bir müddət əvvəl Türk Dövlətləri Birliyi yaranıb və artıq onun da hərbi qüvvələrinin olması lazımdır, türk ölkələrinin hansındasa bu cür iğtişaşlar baş verərsə, harada təhlükə yaranarsa həmin əraziyə Türk Dövlətləri Birliyinin hərbi qüvvələri daxil olmalıdır. “Türk ölkələrində baş verən hər hansı bir xoşagəlməz hadisəni bizim öz silahlı qüvvələrimiz həll etməlidir” - deyən A.Nağı bildirir ki, yaxın gələcəkdə türk birliyinin belə bir silahlı qüvvələri də olacaq, çünki ona doğru gedirik. “Amma indiki şəraitdə gözlənilməz hadisə baş verdi, KTMT-nin silahlı qüvvələri ora daxil oldu. Hesab edirəm ki, Ermənistan hərbçilərinin də Qazaxıstana daxil olması formal xarakter daşıyır. Amma bütün hallarda 70 nəfər erməni hərbçisinin Qazaxıstana daxil olmasına Rusiya rəhbərliyi yol verməməli idi. Rusiya rəhbərliyi yaxşı bilir ki, ermənilər türklərə qarşı hansı qəddarlıqlar törədiblər. Bizim qan yaddaşımızda 20 yanvar, Xocalı və başqa qanlı hadisələr var. 20 Yanvar hadisələri zamanı Sovet ordusunun tərkibindəki erməni hərbçilərinin azərbaycanlılara necə divan tutduğu, qanına qəltan etdiyi, öldürdüyü məlumdur. Eyni zamanda da Xocalı faciəsi göz önündədir ki, Rusiyanın adı ilə bağlı olan 366-cı alay Xocalı soyqırımını törətdi. 366-cı alayın adı Rusiyanındır, amma tərkibinin əksəriyyəti erməni hərbçilərindən ibarət idi və onlar da Azərbaycan xalqına qarşı soyqırım cinayəti törətdilər. Bu faktı Rusiya rəhbərliyi Ermənistan hərbçilərini Qazaxıstana göndərərkən nəzərə almalı idi. Amma çox təəssüf ki, daxil etdilər. Ermənilərə qarşı bir etibarsızlıq mövqeyi olmalıdır. Erməni hərbçiləri qayda-qanunlara əməl etmirlər, imkan düşən kimi türklərə, müsəlmanlara qarşı öz həqiqi simalarını göstərirlər, vəhşiliklər edirlər, qırğınlar törədirlər. Bunu bütün dünya bilməlidir, xüsusən də Rusiya bilməlidir ki, ermənilərə bu şəkildə şərait yaratmamalıdır, çünki erməni hərbçilərinin əsas məqsədi türk xalqına qarşı qırğınlar törətməkdir”.
A.Nağı hesab edir ki, ermənilər sosial şəbəkələrdə Ermənistan hərbçilərinin faşist mahiyyətini açmaqla öz hərbçilərini ifşa edirlər: “Ermənilər Ermənistan hərbçilərinin Qazaxıstanda Xocalı qırğını kimi qırğın təşkil edəcəyini deməklə öz hərbçilərinin cinayətkar mahiyyətini etiraf edirlər. Həm də Xocalı soyqırımını törətdiklərini etiraf edirlər. Biz ermənilərin sosial şəbəkələrdəki “fəallığını”, çağırış və fikirlərini, etiraflarını bütün dünyaya yaymalıyıq. Bu o deməkdir ki, ermənilər özləri Xocalı soyqırımınmı belə açıq şəkildə boyunlarına alıb etiraf edirlər. Dünya Xocalı soyqırımını törədənləri qınayır və bunu insanlığa qarşı cinayət kimi qiymətləndirir. Belə olan şəraitdə onlar Xocalı soyqırımını özlərinin “qəhrəmanlığı” kimi təqdim edirlərsə bununla özləri özlərini ifşa edirlər. Digər tərəfdən, Qazaxıstan cəmiyyətinə mesaj göndərirlər ki, ora gələn Ermənistan hərbçilərinin niyyəti soyqırım törətməkdir. Bu mesaja Qazaxıstran dövləti də, cəmiyyəti də diqqətlə yanaşmalı və Ermənistan hərbçilərinin hərəkətlərini izləməli, təxribatlarının qarşısını almaq üçün tədbirlər görməlidir. Artıq Ermənistan hərbçilərinin Qazaxıstana hansı məqsədlə getdiyi üzə çıxır, Qazaxıstan cəmiyyəti və dövləti ehtiyatı əldən verməməlidir. Bütün hallarda faşist xislətli Ermənistan hərbçilərinin Qazaxıstanda olması mənfi haldır”- deyə A.Nağı vurğuladı.
İradə SARIYEVA
