Kollektiv Təhlükəsizlik Müqaviləsi Təşkilatının Qazaxıstana göndərdiyi sülhməramlı qüvvələr arasında 70 erməni hərbçisinin olması Ermənistanda böyük etirazla qarşılanır. Ermənistanın baş naziri Nikol Paşinyanın Kollektiv Təhlükəsizlik Müqaviləsi Təşkilatının sədri olaraq Qazaxıstana təşkilatın "sülhməramlı kontingentini" göndərmək qərarı haqqında “Facebook” hesabında qeydinə sosial şəbəkələrin ermənidilli seqmentində reaksiyalar mənfi olub.
Sosial şəbəkə istifadəçiləri İrəvanı başqa ölkənin daxili işlərinə müdaxilə etməkdən çəkinməyə, hadisələri şərh edərkən və ya onlara qiymət verərkən ehtiyatlı olmağa və öz bəyanat və hərəkətləri ilə Qazaxıstanda yaşayan "minlərlə soydaşlarının dinc həyatını təhlükə altına" qoymamağa çağırırlar. Ermənistanın Qazaxıstanda keçmiş səfiri Arman Melikyan xəbərdar edir ki, belə qərar qəbul etməzdən əvvəl yaxşıca fikirləşmək lazımdır: "Nəzərə alın ki, rus, belarus və erməni silahlı qüvvələrinin Qazaxıstana yeridilməsi bu ölkənin rus əsilli və rusdilli, həmçinin erməni vətəndaşlarına qarşı kütləvi zorakılığa, hətta qırğınlara səbəb ola bilər". Jurnalist Gayane Arustamyan olduqca kobud ifadələrlə Ermənistan baş nazirini Qazaxıstanda yaşayan "minlərlə erməniyə qarşı poqromlar təhrik etməkdə" günahlandırır. Paşinyana xitabən Gayane Arustamyan yazır: "Erməniləri bütün dünyada qırdırmaq qərarınamı gəlmisən?!". Hüquq müdafiəçisi Artur Sakunts isə hesab edir ki, Ermənistan KTMT himayəsi altında Qazaxıstanda, necə deyərlər, sabitliyi bərpa etmək məqsədilə Putin avantürasına qatılmamalıdır: "Belə bir addım beynəlxalq instansiyalarda Ermənistanın təhlükəsizliyini təhdid edər. Xalqın belə bir müdrik sözü var: ayağını yorğanına görə uzat. Ermənistan qoşunları yalnız parlamentin icazəsi ilə göndərilə bilər".
Jurnalist, siyasi icmalçı Tatul Hakobyan isə “Facebook” hesabında yazır: "Paşinyanın Qazaxıstana KTMT, o cümlədən Ermənistan qüvvələrini göndərmək haqqında bəyanatı belə hiddət, qəzəb, həqarət, ayıb və bacarıqsızlıq, acizlik hissləri doğurmazdı, əgər: A - KTMT Azərbaycanın Ermənistan Respublikası ərazisinə soxulmasına reaksiya vermiş olsaydı; B - Tokayev İkinci Qarabağ müharibəsində qələbə münasibətilə nümayişkaranə Əliyevi təbrik etmiş olmasaydı". İstifadəçi Vahram Atanesyan “Facebook” hesabında postunu suallarla başlayır və özü də cavab verir: "Qazaxıstan bizə dost ölkədir? Xeyr. Biz bilirik orada nə baş verir? Yox, bilmirik. Lakin deyəsən, bir şey aydın olur: bu, diktaturaya qarşı xalq üsyanı deyil, milli-ümumtürk ideyaları ilə silahlı dövlət çevrilişi cəhdidir. Belə olan halda bizim orada nə maraqlarımız var? "Türk dünyası" layihəsinin gerçəkləşməsinə dəstək vermək, yoxsa onun baş tutmamasına yardım etmək? Bu cür anlaşılmaz vəziyyətdir Ermənistanda. Paşinyanı türk maraqlarına xidmət etməkdə günahlandıranlar indi də onu Qazaxıstanın daxili işlərinə qarışdığına görə qınayır".
Bundan başqa, bir sıra erməni ictimai təşkilatları İrəvanı Qazaxıstandakı daxili siyasi proseslərə qarışmaqdan çəkinməyə çağırıb. Həmin təşkilatlar Ermənistan hökumətinin son günlər iğtişaşların baş verdiyi Qazaxıstana Ermənistan hərbi qulluqçularını göndərmək niyyəti ilə bağlı birgə bəyanat yayıb. Bəyanatda bu fikirlər yer alıb: “2022-ci il yanvarın 2-də təbii qazın qiymətinin kəskin artması ilə əlaqədar Qazaxıstanda başlayan etirazlar bütün ölkəyə yayılaraq xalq hərəkatına çevrilib. Həmin gün KTMT-nin Kollektiv Təhlükəsizlik Şurası bu ölkəyə hərbi kontingentlərin göndərilməsi barədə qərar qəbul edib. KTMT-yə sədrlik edən Ermənistanın baş naziri Nikol Paşinyan bunun müjdəçisi olub və Şuranın qərarını Ermənistanla əlaqələndirərək şəxsi internet səhifələrində yayıb. Artıq Ermənistan daxili siyasi proseslərə cəlb olunmaq üçün Qazaxıstana hərbi personal göndərib. Həmin KTMT Ermənistan Respublikasına qarşı xarici təcavüzün aradan qaldırılması üçün heç bir təsirli addım atmayıb. Ola bilsin ki, Ermənistan hakimiyyəti dövlət təhlükəsizliyinin zəifliyinə görə avtoritar dövlətlər tərəfindən istifadə olunur, lakin bu onların düşünülməmiş davranışlarına heç bir şəkildə haqq qazandırmır və onların demokratik dövlətlər ailəsində olmaq niyyətlərini şübhə altına alır. Bu ölkə əhalisinin haqlı qəzəbinə qarşı hərəkətlərdə və mümkün insan hüquqlarının pozulmasında iştirak etməklə KTMT-yə üzv dövlətlərin tərkibində Qazaxıstanın daxili işlərinə müdaxilə Ermənistanın beynəlxalq imicinə əhəmiyyətli dərəcədə düzəlməz ziyan vuracaq. Digər tərəfdən, bu, Qazaxıstanda və qonşu ölkələrdə yaşayan minlərlə erməni üçün hadisələrin inkişafının istənilən ssenarisində son dərəcə təhlükəli vəziyyət yaradacaq. İstənilən ölkənin xalqı öz hakimiyyətini özü seçməlidir və heç bir başqa ölkənin daxili siyasi həyatına qarışmağa qanuni haqqı yoxdur. Bu gün Ermənistan Silahlı Qüvvələri ölkəmizin sərhədlərini qorumaq missiyasını daşıyır və Ermənistanın təhlükəsizliyinə təhdidlərə biganə qalan xarici diktatorların maraqlarına xidmət etməməlidir. Biz Ermənistan hökumətinin düşünülməmiş və məsuliyyətsiz addımlarını pisləyirik. Biz Ermənistan hökumətindən öz qərarlarında ehtiyatlı davranmağı və Ermənistanın reytinqini risqə atmaqdan, işğalçı dövlətə çevrilməkdən, Qazaxıstandakı etnik ermənilərin taleyini təhlükəyə atmaqdan çəkinməyi tələb edirik. Biz Ermənistan hökumətindən Qazaxıstana ordu birləşmələri göndərməkdən çəkinməyi tələb edirik”. Bəzi siyasi partiyalar da erməni qüvvələrinin Qazaxıstana göndərilməsinə etiraz edir.
Tahir TAĞIYEV
