Ermənilər elə ağılagəlməz iddialar irəli sürürlər ki, adam təəccüblənməyə bilmir. Məsələn, indi də iddia edirlər guya vaxtilə Şuşada “tikinti işləri aparıblar”, “binalar tikiblər” və Azərbaycan da indi o binaları sökməyi planlaşdırır. Erməni mediası yazır ki, guya ermənilər Şuşada “Arsax parlamenti” üçün bina inşa edibmiş və 2022-ci ildə “Arsax parlamenti” ora köçməli (?) imiş, amma Azərbaycan höküməti indi o “bina”nı sökməyə hazırlaşır.
Bundan başqa, bu media iddia edir ki, guya Azərbaycan hökuməti Şuşada “ermənilər tərəfindən tikilən” 6 ədəd 5 mərtəbəli binanı da sökməyi planlaşdırır.
Ermənilər Şuşada nə vaxt bina tikib, abadlıq işləri aparıblar ki, indi durub hansısa qondarma tikililərdən danışırlar? Ekspertlər deyir ki, ermənilər 28-30 il ərzində heç bir bina inşa etməyib, əskinə, binaları dağıdıb, evləri uçurub. Yəni ermənilər orada yalnız dağıtmaqla, uçurmaqla məşğul olub.
“Azərbaycanın tikdiyi, inşa etdiyi “xruşşovka” binalardır, onların ermənilərə heç bir aidiyyəti yoxdur”
Siyasi ekspert Rövşən Rəsulov “Bakı-Xəbər”ə bildirdi ki, ermənilər Şuşada həyata keçirlən tikinti-quruculuq işlərini həzm edə bilmirlər və bu səbəbdən də şər-böhtan atmaqla məşğul olurlar. Şuşanın azad edilməsinin ermənilərə böyük zərbə olduğunu deyən R.Rəsulovun dediyinə görə, indi onlar çıxış yolunu yenə özlərini bu cür əsassız məsələlərlə aldatmaqda görür. “Şuşa şəhərinin işğal altında olduğu müddətdə ermənilər orada ümumiyyətlə yıxıb-dağıtmaqdan, talançılıqla məşğul olmaqdan başqa heç nə etməyiblər. Şəhər işğaldan azad edildiyi zaman oranın hansı vəziyyətdə olduğunu da hər kəs gördü. Separatçıların “parlament” binasının Xankəndidən Şuşaya köçürülməsi “ideyası” isə, bildiyimiz kimi baş tutmadı, Vətən müharibəsində şanlı Ordumuz bu yöndəmsiz yarıtikilinin divarlarını onun içinə toplaşmış terrorçuların başına yıxdı. Həmin kadrları əks etdirən videonu, yəqin ki, bir çoxları izləyib. Qaldı ki, ermənilərin guya “tikdikləri” beşmərtəbəli binaların sökülməsinə, sizi inandırım ki, bu məsələdə də hay-küy qaldıran ermənilər sadəcə öz talançılıqlarını, varvarlıqlarını bu məsələ ətrafında gizlətməyə cəhdlər göstərirlər. Şuşada həmin o beşmərtəbəli binaların hər biri hələ sovetlər dönəmində Azərbaycanın tikdiyi, inşa etdiyi “xruşşovka” binalardır, onların ermənilərə heç bir aidiyyəti yoxdur. Bildiyimiz kimi, Şuşamızda təməlli rekonstruksiya işləri sürətlə aparılmaqdadır, həmin binalar isə şəhərin yeni yaranacaq görkəminə uyğun deyil. Bu binalar arxitektura baxımından uyğunsuz olduğuna görə sökülür. Təbii ki, bu binaların yerinə ən müasir, Şuşa memarlığına xas olan, daha dəqiq desək, qədimliklə müasirliyi sintezləşdirən binalar inşa olunacaq. Artıq baş planın da hazır olduğu məlumdur. Söz yox ki, sökülən binalarla yanaşı işğal dönəmində erməni oliqarxlarının müxtəlif yüksək mənzərəli yerlərdə tikdikləri villaları, iqamətgahları da məhv ediləcək və bu da çox doğru bir addımdır, çünki Şuşamızda bir dənə də olsun işğalçı düşmənə məxsus olmuş nişanə qalmamalıdır”.
R.Rəsulov qeyd etdi ki, bu gün ermənilər hələ də Şuşanı yenidən işğal edəcəklərini düşünürlərsə, bununla yalnız özlərinə təskinlik verirlər, onların xam xəyalları bundan sonra heç vaxt və əsla reallaşmayacaq. “Ümumiyyətlə, artıq onlar anlamağa məhkumdurlar ki, nəinki Şuşa, eləcə də digər azad edilmiş ərazilərimizə işğalçıların nəfəsi dəyməyəcək, buna izn verilməyəcək. O cümlədən, biz inanırıq və ümid edirik ki, Şuşamızla yanaşı, digər qədim şəhərimiz Xankəndi də qısa müddətdə Azərbaycanın yurusdiksiyası altına keçəcək və işğalçı, quldur, separatçı rejim torpaqlarımızdan rədd ediləcək, ondan sonra növbə Xankəndimizin erməni işğalçılarının nişanələrindən təmizlənməsinə çatacaq. Biz bu ümidlərimizin tezliklə doğrulacağına 44 günlük qələbəmizdə əldə etdiklərimiz qədər inanırıq”- deyə siyasi ekspert R. Rəsulov qeyd etdi.
İradə SARIYEVA
