Məlum olduğu kimi, Qazaxıstana KTMT kollektiv sülhməramlı qüvvələrinin yeridilməsi barədə qərarı Ermənistanın baş naziri Nikol Paşinyan qəbul edib. Məsələ bundadır ki, Paşinyan indi Ermənistanın baş naziri qismində KTMT-yə sədrlik edir. Onun sədrliyi 2022-ci il yanvarın 1-dən başlayıb və işə bax ki, bu hərbi blokun mövcudluğu tarixində ilk dəfə kollektiv qüvvələrin üzv ölkələrin köməyinə göndərilməsi barədə qərarı qəbul etmək də onun üzərinə düşüb.
Paşinyan bu haqda qərarı yanvarın 5-də gecə saatlarında özünün Facebook səhifəsində elan edib. Bildirib ki, KTMT-nin kollektiv Təhlükəsizlik Şurasının sədri olaraq Qazaxıstana kollektiv sülhməramlı qüvvələrin yeridilməsi barədə qərar qəbul edib. Onun bildirdiyinə görə, KTMT hərbi qüvvələri məhdud zaman çərçivəsində ölkədə vəziyyətin normallaşması və stabilləşməsi məqsədilə Qazaxıstana göndərilir. Paşinyanın bu qərarını çox keçmədən Kremlin rəsmi saytı dərc edib. Qərara veto qoyan olmadığından KTMT kollektiv qüvvələrinin Qazaxıstana yeridilməsi üçün maneə qalmayıb.
Bu arada yayılan məlumatlara görə, KTMT-nin Kollektiv Qüvvələrinin Qazaxıstana ezam olunmuş əsas bölmələri bu ölkədə öz vəzifələrini yerinə yetirməyə başlayıblar. Məlumata görə, KTMT-nin Qazaxıstandakı Kollektiv Qüvvələrinin əsas vəzifəsi dövlət və hərbi obyektlərin mühafizəsi, vəziyyətin sabitləşməsinə köməklik olacaq.
O da məlumdur ki, Qazaxıstan zaman-zaman KTMT-də, Avrasiya Birliyində Azərbaycanın maraqlarının qorunmasına yönəlik siyasət sərgiləyib. Bütün bunlar da Ermənistanın xoşuna gəlməyib. Dəfələrlə erməni mesiasında Qazaxıstanın sabiq prezidenti Nursultan Nazarbayev buna görə kəskin tənqid edilib. İş elə gətirdi ki, Qazaxıstanda baş verən hadisələr Ermənistanın KTMT-yə rəhbərlik etdiyi vaxtla üst-üstə düşdü. Bu baxımdan Paşinyanın bu postda türk qazaxlardan bir erməni kimi qisas almaq imkanları varmı? Söhbət sülhyaratma əməliyyatı zamanı Ermənistanın fəaliyyətindən gedir.
“Ermənistanın hərbi təşkilata rəhbərliyi formal xarakterlidir”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayevin fikrincə, prinsipcə Ermənistanın bu məsələdə Qazaxıstandan hansısa qisas alması, ümumi işə zərər verə bilməsi real görünmür: “Ona görə ki, Ermənistan KTMT-yə rəhbərlik etsə də, praktiki olaraq marionet bir dövlətdir. Bu dövlətin rəhbərliyi formal xarakterlidir. Marionet dövlətin Qazaxıstana yönəlik hansısa addım atacağı real görünmür. Düzdür, ermənilər qazaxlardan hansısa qisas almaq istəyində ola bilərlər. Çünki faşist xislətinə sahibdirlər. Ancaq nəzərə almaq lazımdır ki, KTMT-nin əsas patronu Rusiyadır. Rusiya da pərdəarxası Qazaxıstanda prosesləri körükləyərək öz istəyinə çatdı. Çünki orada cərəyan edən hadisələrin axışı Rusiyaya sərf edir. Heç şübhəsiz, bütün bunlar yaxşı hal deyil. Digər tərəfdən məsələnin diqqəti çəkən tərəfi odur ki, Nursultan Nazarbayev danışmır. Hələlik baş verən hadisələrə münasibət bildirməyib. Hesab edirəm ki, Nazarbayev danışandan sonra çox şey bəlli olacaq. Görünən odur ki, Qazaxıstanda baş verən hadisələr təsadüf deyil. Rusiya bütün bunlardan istifadə edərək postsovet məkanında öz təsir dairəsini genişləndirir. Putin, faktiki olaraq, dünyaya meydan oxuyur. Ancaq onu da nəzərə almaq lazımdır ki, Qazaxıstan müstəqillik əldə edəndən sonra orada yeni cavan nəsil yetişib. Onlar ölkəni azad və müstəqil görmək istəyirlər. Bu baxımdan Rusiya üçün asan olmayacaq”.
Partiya sədri hesab edir ki, o üzdən ölkədə proseslər daha da mürəkkəb mərhələyə keçə bilər.
Vidadi ORDAHALLI
