Ərəb ölkələrinin müsəlman irsinin qənimi olan, məscidləri məhv edən Ermənistanla yaxınlaşmaq tendensiyası səngimək bilmir. Bir müddət əvvəl Ermənistan İordaniya, Birləşmiş Ərəb Əmirlikləri, Qətər və Səudiyyə Ərəbistanı ilə təmasları genişləndirdi. Uzun illər Ermənistanı tanımayan Səudiyyə Ərəbistanı əlaqələrin qurulmasına xüsusi önəm verməyə başlayıb.
İndi də Misir qabağa düşərək Ermənistanla münasibətlərin miqyasını genişləndirir. İki ölkənin turizm qurumları arasında əlaqələrin qurulması ilə bağlı memorandum imzalanıb. Qeyd edilir ki, bu, Misir və Ermənistan arasında qarşılıqlı turist səfərlərinin artmasına ciddi təkan verəcək. Bundan başqa, iki ölkə arasında biznes forumun keçirilməsinə hazırlıq görülür.
Beynəlxalq Biznes Münasibətlərinə Dəstək Şurasının sədri Mariam Manukyan deyib ki, tərəflər arasında turizmlə bağlı razılaşmanın əldə edilməsi xüsusi əhəmiyyət kəsb edir: “Misir unikal müsəlman ölkələrindən biridir ki, əhalisinin on faizi xristian ərəblərdir. Bu, əhəmiyyətli rəqəmdir. Ermənistan xristian ölkəsi kimi xristian ərəblər üçün müstəsna ziyarət yeri sayıla bilər”.
Göründüyü kimi, ərəb dövlətləri Ermənistanla əlaqələrin qurulmasında və bunun daha da genişləndirilməsində qərarlıdır.
“30 il ərazilərimizin işğal altında olmasına sözdə qarşı çıxsalar da, reallıqda Ermənistana qarşı sərt siyasi mövqe ortaya qoymayıblar”
Sözügedən məsələ ilə bağlı fikirlərini “Bakı-Xəbər”lə bölüşən politoloq Tural İsmayılovun fikrincə, ərəb ölkələrinin Ermənistana belə diqqət göstərmələri təəssüf doğurur: “Təəssüfləndirici məqam ondan ibarətdir ki, İslam Əməkdaşlıq Təşkilatında təmsil olunan və bir sıra məsələlərdə Azərbaycanla həmrəy olduğunu vurğulayan ərəb ölkələri fərqli siyasət yürüdürlər. Yəni 30 il Azərbaycan ərazilərinin işğal altında olmasına sözdə qarşı çıxsalar da, reallıqda Ermənistana qarşı ciddi basqı və sərt siyasi mövqe ortaya qoymayıblar. Təəssüf ki, bu siyasət bu gün də davam edir. Bütövlükdə Azərbaycanın Misirlə siyasi və humanitar əlaqələri yüksək səviyyədə olub. Tərəflər bir sıra önəmli mədəni tədbirlər keçiriblər. Türkiyə-Misir münasibətlərinin hələ də normallaşmaması Ermənistanın maraqlarına uyğundur. Bu səbəbdən Ermənistan Misirlə yaxın əlaqələrin qurulmasına xüsusi önəm verir. Təəssüflər olsun ki, əhalisinin əksəriyyəti müsəlman olan Misir Ermənistandan Türkiyəyə qarşı istifadə etmək üçün İrəvanla əlaqələri daha da dərinləşdirir. Hesab edirəm belə yanaşma mənfi fəsadlara yol aça bilər. Misir rəhbərliyi nəzərə almalıdır ki, Qarabağ işğal altında olanda oradaki müsəlman abidələri erməni vandalları tərəfindən dağıdılıb. Azərbaycanın Misir mədəniyyətinə, ədəbiyyatına verdiyi xüsusi önəm fonunda bu ölkənin Ermənistanla əlaqələri dərinləşdirməsi yaxşı tendensiya deyil. İƏT üzvü olan Misir islam həmrəyliyindən çıxış edərək Azərbaycanın maraqlarını nəzərə almalıdır. Çünki hansısa iqtisadi önəmi olmayan Ermənistanla əlaqələrin genişləndirilməsi narazılıq yaradan faktorlardan biridir. Nəzərə alınmalıdır ki, ərazilər işğaldan azad edilsə də, Ermənistan Azərbaycana yönəlik ərazi iddialarından əl çəkməyib”.
Politoloqun fikrincə, bir sıra ərəb dövlətləri üçün dini həmrəylik, tarixi bağlar önəm kəsb etmir. Bu zaman daha çox siyasi maraqlardan çıxış edib, Ermənistandan istifadə edirlər.
Vidadi ORDAHALLI
