Britaniyanın “The Guardian” qəzeti 2018-ci ildə İstanbulda səudiyyəli jurnalist və “Washington Post” qəzetinin yazarı Camal Qaşıqçını öldürən komandanın üzvü olmaqda təqsirli bilinən 3 nəfərin Səudiyyə Ərəbistanının paytaxtı Ər-Riyadda dövlət məmurlarının işlətdiyi dəbdəbəli villalarda yaşadığını ortaya çıxarıb.
Səudiyyə kəşfiyyatına bağlı mənbə qəzetə bildirib ki, qatillər həbs cəzalarını dövlətə məxsus dəbdəbəli villa və binalarda çəkirlər. Ailə üzvləri tez-tez qatilləri sərbəst şəkildə ziyarət edə, məhbuslar iş otaqlarından və idman zallarından istifadə edə bilirlər. Mənbə iddia edib ki, məhəllə sakinlərindən biri İstanbuldakı konsulluqda Qaşıqçının cəsədini parçalara ayıran məhkəmə-tibb eksperti Salah əl-Tubaiqidir. Bildirilib ki, Qaşıqçının konsulluqdan sağ çıxdığı qənaətini yaratmaq üçün İstanbula gələn Mustafa əl-Madani və əməliyyata rəhbərlik edən Mənsur Əbahüseyn də burada qalır.
Qəzetin başqa bir iddiasına görə, ötən həftələrdə Türkiyənin tələbi ilə Fransada saxlanan və Qaşıqçı cinayətində şübhəli olduğu bildirilən Halid Alotaibi sonradan sərbəst buraxılıb. Qəzetin yazdığına görə, Alotaibinin axtarılan şəxs olduğu, lakin Ər-Riyadın təşəbbüsü ilə sərbəst buraxıldığı iddia edilib. Qəzet Səudiyyə Ərəbistanının vəliəhd şahzadəsi Məhəmməd bin Salmanın bunun mühüm məlumatların üzə çıxmasına səbəb olacağına inandığı üçün saxlanan şəxsin Türkiyəyə göndərilməsini istəmədiyini iddia edib.
Göründüyü kimi, Fransanın Qaşıqçının qatillərindən birini sərbəst buraxması diqqəti cəlb edir. Heç şübhəsiz, ölkədəki siyasi hakimiyyətin razılığı olmadan H.Alotaibi sərbəst buraxılmazdı. O baxımdan maraqlıdır, Fransa prezidenti Emmanuel Makron Qaşıqçının qatilini himayə etməklə nə məqsəd güdür?
“Məqsəd odur ki, Türkiyə pis vəziyyətdə qalsın”
Sözügedən məsələ ilə bağlı fikirlərini “Bakı-Xəbər”lə bölüşən sabiq diplomat, politoloq Fikrət Sadıqovun fikrincə, Fransanın H.Alotaibini sərbəst buraxması hüquqi yox, sırf siyasi motivli məsələdir: “Fransa rəhbərliyi bunu dəfələrlə sübut edib. Məqsəd odur ki, Türkiyə pis vəziyyətdə qalsın. Bu həmin Fransadır ki, dəfələrlə hüquqi əsas olmadan erməni terrorçularını həbsdən buraxdırıb. Nəticədə məlum oldu ki, erməni terrorçuların arxasında dayanan elə Fransa imiş. Fransa türk diplomatlarını qətlə yetirən ASALA terrorçularını həbsdən azad edərək Ermənistana göndərib. Bütün bunlar Türkiyəyə bəslənən düşmənçiliyin göstəricisidir. Məlum olduğu kimi, Qaşıqçı Səudiyyə Ərəbistanının Türkiyədəki səfirliyində qətlə yetirilib. Türkiyə dövləti istəyir ki, cinayət bu ölkədə baş verdiyi üçün bütün qatillər cəzalandırılsın. Ancaq Fransa Türkiyə çətin duruma düşsün deyə, məqsədyönlü şəkildə buna mane olur. Lakin qatili himayə etmək Fransa hakimiyyətinə xal qazandırmır. Hesab edirəm ki, ölkədə keçiriləcək prezident seçkilərində bu, Emmanuel Makronun əleyhinə işləyəcək”.
Politoloq onu da qeyd etdi ki, Fransa bu kimi vasitələrlə Türkiyəni zəflədə bilməz.
Vidadi ORDAHALLI
