Prezident İlham Əliyev Dünya Azərbaycanlılarının Həmrəylik Günü və Yeni il münasibətilə müraciətində bildirib ki, İslam Əməkdaşlıq Təşkilatı ənənəvi olaraq Azərbaycanın haqlı mövqeyini dəstəkləyən beynəlxalq təşkilatdır:
“Bu dəstəyi biz hiss etmişik, müharibədən sonra müharibənin nəticələrinin qəbul etdirilməsi üçün İslam Əməkdaşlıq Təşkilatının fəaliyyətini mən yüksək qiymətləndirirəm. Eyni zamanda, dekabr ayında NATO və Avropa İttifaqına mənim uğurlu səfərlərim olub. NATO öz zirvə görüşlərində daim Azərbaycanın suverenliyini, ərazi bütövlüyünü dəstəkləyən qətnamələr qəbul etmişdir. Doqquz zirvə görüşündə bu qətnamələr qəbul edilmişdir. Bu dəfə də bu dəstək ifadə olundu. Avropa İttifaqının Şərq Tərəfdaşlığı Zirvə görüşünün yekununda qəbul edilmiş yekun sənəddə ölkələrin ərazi bütövlüyü, suverenliyi bir daha dəstəklənir”.
Bütün dünyanın İkinci Qarabağ müharibəsinin nəticələrini qəbul etdiyini vurğulayan Prezident İlham Əliyev deyib: “Hesab edirəm ki, müharibədən sonra cərəyan edən proseslər bizim haqlı olduğumuzu bütün dünyaya bir daha sübut etdi. Bunun çox böyük əhəmiyyəti var. Çünki İkinci Qarabağ müharibəsi dövründə bizə qarşı əsassız ittihamlar səsləndirilirdi. Bu əsassız ittihamların heç birinin real təsdiqi olmadı və müharibədən sonrakı dövr bunu bir daha göstərdi. Ona görə, müharibə reallıqlarını, müharibədən sonrakı reallıqları qəbul etdirmək, hesab edirəm ki, siyasi baxımdan çox önəmli hadisə kimi sayıla bilər”.
Göründüyü kimi, Prezident dünya birliyinin bizim qalib olduğumuz müharibənin nəticələrini qəbul etdiyini vurğulayır. Bu məsələyə fərqli siyasi düşərgələrdə təmsil olunan siyasi partiyaların mövqeyini öyrəndik.
Arzuman Abdulkərimov: “Heç bir ölkə Azərbaycanın apardığı haqq mübarizəsinə qarşı bəyanatlar səsləndirmədi”
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, əslində, Prezident bu məsələdə nəyə əsaslandığını faktlarla sadaladı: “Burada söhbət dünyanın nüfuzlu təsisatlarının ölkəmizin ərazi bütövlüyü ilə bağlı rəsmi sənədlər qəbul etməsindən gedə bilər. Eyni zamanda, ölkəmizin ərazi bütövlüyünü təmin etməsilə bağlı bizə çoxsaylı ölkələrin başçılarından təbriklər gəldi. Heç bir ölkə Azərbaycanın apardığı haqq mübarizəsinə qarşı bəyanatlar səsləndirmədi. Bu baxımdan da, əldə etdiyimiz qələbənin dünya miqyasında tanındığını iddia etməyə tam haqqımız çatır”.
Rəşad Bayramov: “Yaxşı olardı ki, Ermənistandan üzərinə götürdüyü öhdəliklərin yerinə yetirilməsini də tələb etsinlər”
Azərbaycan Milli İstiqlal Partiyasının funksioneri Rəşad Bayramov “Bakı-Xəbər”ə açıqlamasında dedi ki, dünya əslində doğru olanı qəbul edib: “ Biz haqq müharibəsi aparmışıq. Nəticədə işğalçıları öz torpağımızdan qovmuşuq. Ancaq biz həm də dünya birliyindən bir qədər obyektiv olmağı tələb edirik. Yaxşı olardı ki, Ermənistandan üzərinə götürdüyü öhdəliklərin yerinə yetirilməsini də tələb etsinlər. Minalanmış ərazilərin xəritələri ilə alver etmələrini pisləsinlər. Qarabağda qalan separatçı qalıqlarından silahı tam yerə qoymağı tələb etsinlər. Eyni zamanda, Azərbaycanın ermənilərin yaşadığı ərazilərdə də yurisdiksiyasının təmin edilməsinə dair çağırışlar etsinlər. Ümumən isə nəticə qənaətbəxşdir. Çünki bizim ərazi bütövlüyümüzlə bağlı mübahisəli fikirlərə rast gəlmirik”.
Məhəmmədəli QƏRİBLİ
