Rusiya prezidenti Vladimir Putin Ermənistanın iki keçmiş prezidenti - Robert Köçəryan və Serj Sarkisyanı da Milad bayramı və qarşıdan gələn Yeni il münasibətilə təbrik edib. Bu barədə Kremlin saytında bildirilib.
Qeyd edək ki, Rusiya prezidenti Ermənistan prezidenti və baş naziri Armen Sarkisyanla Nikol Paşinyana da təbrik mesajı göndərib. Putin həmin təbriklərdə bildirib ki, birgə səylər nəticəsində ölkələr müxtəlif sahələrdə ikitərəfli əməkdaşlığın, həmçinin Avrasiya İqtisadi Birliyi, KTMT, MDB və digər çoxtərəfli strukturlar çərçivəsində qarşılıqlı tərəfdaşlıq fəaliyyətinin gələcək dinamik inkişafını təmin edə biləcək.
Robert Köçəryan və Serj Sarkisyana ünvanlanmış təbriklərə gəlincə, rəsmi Kreml bildirib ki, Putin Rusiyaya dost olan ölkələrin hazırkı liderlərindən əlavə, yaxşı münasibətləri olan xarici dövlətlərin və hökumətlərin keçmiş başçılarını da təbrik edir.
Göründüyü kimi, Rusiya dövlət başçısı Ermənistanda faktiki olaraq müxalifətdə olan iki siyasətçini təbrik edib. Maraqlıdır, bəs bizim müxalifətin niyə dövlət başçısı olan dostları yoxdur?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bunun səbəbini heç də Ermənistandakı müxalifətin güclü, bizdəkinin zəif olmasında axtarmaq lazım deyil: “Bilirsiniz ki, Putinin təbrik etdiyi hər iki erməni siyasətçinin həm də eks-prezident statusu var. Kremlin saytında bildirilir ki, Putin başqa ölkələrin də eks-prezidentlərinə təbriklər ünvanlayır. Elə buradan görünür ki, Sarkisyan və Köçəryan həmin təbriki müxalif siyasətçi kimi deyil, eks ölkə başçıları kimi alıblar. Sual oluna bilər, bəs bizdə bu statusda olan siyasətçi yoxdur? Bizdə də eks-prezident var, ancaq o, aktiv siyasətlə məşğul deyil. Buradan daha bir məntiqi nəticə çıxır ki, Putini cəzb edən həm də onların siyasətçi, müxalif olmalarıdır. Bunun da bir səbəbi Ermənistanda Paşinyan rejiminə Rusiyanın güvəninin olmaması ilə bağlıdır. Yəni bununla Rusiya həm də Paşinyana ona alternativlərin olduğu ilə bağlı mesaj verir.
Rusiya prezidenti Ermənistanın keçmiş prezidenti Robert Köçəryanı 65 yaşının tamam olması münasibətilə təbrik etmişdi. Həmin təbrikin ünvanlanması ilə bağlı səbəb belə izah olunurdu ki, Ermənistan və Rusiya arasında müttəfiq münasibətlərinin möhkəmləndirilməsində keçmiş prezidentin böyük rolu olub. Bu təbrik ünvanlananda Köçəryan həbsdə idi. Rusiya İrəvandan onun azad edilməsini istəsə də, baş nazir Nikol Paşinyan hakimiyyəti Putinin istəyini yerinə yetirməkdən imtina edirdi. Həmin vaxt siyasi müşahidəçilər Putinin təbrikinin Paşinyan üçün ciddi siqnal olduğunu bildirirdilər. Düşünürəm ki, bu təbrikdə də ciddi mesajlar var”.
Məhəmmədəli QƏRİBLİ
