Azərbaycan ordusu Ermənistanın hərbi birləşmələrini, terrorçu qruplaşmalarını torpaqlarımızdan qovarkən ermənilər bizim ərazilərimizdə saysız-hesabsız silah-sursat atıb qaçıblar. Məlum olduğu kimi, Azərbaycanın aidiyyəti dövlət qurumları 44 günlük müharibə bitəndən indiyə qədər azad olunmuş bölgələrimizdə ermənilərin atdığı silah-sursatı aşkarlayır, onları zərəsizləşdirir.
Bəzən bu silah-sursat toplu halında, cəbbəxana kimi üzə çıxarılır. Heç şübhəsiz, ermənilərin əsasən bu silahları bizim ərazilərimizdə məqsədli şəkildə atıb getdikləri barədə də məqamlar var. Yəni onlar bu silahları məqsədli şəkildə atıb gediblər ki, o silahlardan Azərbaycanın daxilində kimlərsə hansısa təxribat əməllərində istifadə etsin.
Ermənilərin xüsusi məqsədlə Azərbaycanda qoyub qaçdıqları o silah-sursatın hamısını zərərsizləşdirə bilirikmi? Hesab etmək olarmı ki, zərərsizləşdirilməmiş silahlar ermənilərin planlarına uyğun olan ünvanlara gedib çatır? Belə bir düşüncə varmı ki, ermənilərin planlaşdırdığı kimi, bu silahlar Azərbaycan dövlətçiliyinin əleyhinə olan qüvvələrin əlinə düşə bilər, belə bir ehtimal varmı? Düzdür, Azərbaycanın hüquq-mühafizə orqanları çox ciddi şəkildə bu istiqamətdə işləyirlər, bu silah-sursatı axtarıb tapırlar, amma ehtimal var ki, ermənilərin atıb qaçdığı silahların müəyyən bir hissəsi onu Azərbaycan dövlətçiliyinə qarşı çevirmək üçün məqam gözləyən qüvvələrin də əlinə düşə bilər. Bu ehtimalın qarşısını almaq nə dərəcədə mümkündür?
“İndidən bu halların qarşısı alınır ki, gələcəkdə böyük fəsadlara səbəb olmasın”
Tanınmış hərbi ekspert Tərlan Eyvazov bizimlə söhbətində bildirdi ki, ermənilərin məkrli məqsədləri aydındır və Azərbaycanın güc qurumları, hüquq-mühafizə orqanları onların bütün planlarını alt-üst etmək əzmindədir. T.Eyvazovun sözlərinə görə, erməni silahlıları bizim ərazilərdən qaçarkən azad torpaqlarımızda külli miqdarda silah-sursat atıb gediblər, onların hamısı ardıcıl olaraq aşkarlanır və zərərsizləşdirilir. Erməni terror və təxribatlarının miqyasının geniş olduğunu deyən T.Eyvazov qeyd etdiyinə görə, onlar bu silahları burada məqsədli şəkildə atıb gedib ki, bundan vətəndaşlar bir-birinə qarşı istifadə etsin, eyni zamanda da bəzi qüvvələr öz çirkin məqsədlərini həyata keçirmək istəyərkən “silah korluğu çəkməsin”. Bununla belə, ekspert deyir ki, ermənilərin bizim ərazilərimizdə qoyub getdiyi ən böyük təhlükə minalardır və bunun da təmizlənməsi illər tələb edir: “Ermənilərin bizim ərazidə qoyub getdiyi ən təhlükəli silah basdırdıqları minalardır ki, onu da çox qısa müddətdə təmizləmək mümkün deyil, bunu hamı bilir. Hazırda bu istiqamətdə təmizləmə prosesi gedir. Qaldı ki, ermənilərin bizim ərazilərdən gedərkən burada məqsədli şəkildə atıb getdikləri silah-sursata, onlar istər müharibənin gedişində, istərsə də qaçıb gedərkən burada müxtəlif növ silahlar, bombalar, mərmilər və sair qoyublar. Biz onları düşməndən həm salamat şəkildə almışıq, həm də döyüş prosesində onlar zərərsizləşdirilib. Təbii, salamat ələ keçirilən silahlar aidiyyəti üzrə təhvil verilir, onlara baxış keçirilir, ehtiyac varsa təmir edilir və ordumuzun arsenalına verilir. Amma qalan silahlar, partlamamış mərmilər, bombalar var ki, onlar da aidiyyəti üzrə zərərsizləşdirilir və poliqonlarda partladılıb sıradan çıxarılır. Burada bir problem yoxdur. Əsas problem, dediyim kimi, minalarla bağlıdır və əsas iş də Mina Təmizləmə Agentliyinin üstündədir. Həm bizim strukturlar, həm də qardaş Türkiyədən və başqa ölkələrdən gələn mütəxəssislər bu minaların zərərsizləşdirilməsi ilə məşğuldurlar. Sadəcə olaraq, onların zərərsizləşdirilməsi ona görə çətinlik törədir ki, əldə dəqiq mina xəritələri yoxdur…”
T.Eyvazovun sözlərinə görə, ermənilərin burada atıb qaçdıqları silah-sursatın vətəndaşların, Azərbaycanın daxilində ola biləcək təxribatçı qüvvələrin əlinə keçməməsi üçün də işlər görülür. O hesab edir ki, aidiyyəti qurumlar bu məsələyə çox ciddi yanaşır, amma bununla belə, hər bir vətəndaş da ayıq-sayıq olmalıdır. “Azad edilmiş ərazilərimizdə xüsusi olaraq komendantlıqların yaradılması, postların qoyulması, o postlardan yan keçib içəriyə keçən insanların saxlanaraq aidiyyəti üzrə cəzalandırılması, bütün bu proseslər ilk növbədə ona görədir ki, o insanların sağlamlıqları qorunsun. Digər bir tərəfdən, azad edilmiş ərazilərə icazəsiz olaraq keçən insanların əlinə ermənilərin məqsədli şəkildə atıb qaçdıqları silahlar da keçə bilər, bu təhlükə də qaçılmazdır. Bunlar kiçik atıcı silahlar da, böyük silahlar da ola bilər. Ona görə də, bu istqamətdə ciddi nəzarət həyata keçirilir. Təbii ki, o silahlar bəzən mülkü şəxslərin də əlinə keçir. Biz buna DİN-in verdiyi qısa məlumatlarda da rast gəlirik. Bu silahların vətəndaşların əlinə keçməsi yolverilməzdir. Bir sıra hallarda müharibələr vaxtı silahların vətəndaşların əlinə keçməsi halları da baş verir. Təbii ki, indidən bu halların qarşısı alınır ki, gələcəkdə böyük fəsadlara səbəb olmasın. Birinci Qarabağ savaşından sonra da bu silahların zərərsizləşdirilməsi üçün Daxili İşlər Nazirliyi böyük işlər apardı, əldə olan silahlar, demək olar ki, tamamən yığışdırıldı. Amma İkinci Qarabağ müharibəsindən sonra ermənilərin atıb qaçdığı silahların təxribatçı qüvvələrin əlinə keçmə ehtimalı ola bilər və bunun qarşısının alınması üçün bu istiqamətində işlər görülür. Bizim böyük təcrübəmiz var. Bu hallara qarşı daxili işlər orqanları və digər aidiyyəti qurumlar çox böyük iş aparır”.
T.Eyvazovun fikrincə, bu istqiamətdə KİV də maarifləndirici işlər aparmalıdır ki, düşmənin məqsədli şəkildə atıb getdiyi silahlar ölkəmizin daxilində hansısa şər qüvvələrin əlinə düşməsin, insanlar bu silahları aidiyyəti qurumlara təhvil versinlər. “Bu silahların mülki şəxslərin, ayrı-ayrı qüvvələrin, aidiyyəti olmayan adamların əlinə keçməsi çox böyük təhlükələr törədə bilər. Odur ki, bizim aidiyyəti qurumlar düşmənin atıb qaçdığı silahların zərərsizləşdirilməsi istiqamətində fəaliyyətlərini davam etdirirlər. Bu proses tam olaraq dövlətin aidiyyəti qurumlarının diqqətindədir, vətəndaşlar da məsuliyyətli olmalıdır”- deyə T.Eyvazov qeyd etdi.
İradə SARIYEVA
