İran Ermənistanın Zəngəzur bölgəsinin Qafan rayonunda konsulluq açmağı planlaşdırır. İran hökuməti dekabrın 29-da keçirilən iclasda Xarici İşlər Nazirliyinin Qafan şəhərində konsulluğun açılması ilə bağlı təklifini bəyənib.
Bu barədə məlumat İran prezidentinin rəsmi saytında dərc olunub.
Sözügedən məsələ ilə bağlı yayılan məlumatda deyilir: “Konstitusiyanın 138-ci maddəsinə əsasən, Nazirlər Şurası Xarici İşlər Nazirliyinin Ermənistanın Kafan şəhərində baş konsulluğunun açılması təklifini təsdiqləyib”.
Ermənistan Xarici İşlər Nazirliyi rəsmisi Vahan Hunanyan İran hökumətinin Qafanda baş konsulluq açmaq qərarına toxunaraq qeyd edib ki, Ermənistan da İranda baş konsulluğun açılması üzərində işləyir: “Biz həmçinin qarşılıqlı əsasda İran İslam Respublikasında Ermənistan Respublikasının Baş Konsulluğunun açılması üzərində işləyirik”.
Təbii ki, İranın harda səfirlik, konsulluq açması bu ölkənin öz daxili işidir. Ancaq məsələ ondadır ki, Qafan rayonu Azərbaycanla sərhəddə yerləşir. Üstəlik, adıçəkilən rayon Qarabağa çoğrafi baxımdan yaxın olan ərazidə yerləşir. O üzdən, İran niyə məhz Qafanda konsulluq açır? Bu təsadüfdürmü?
“İranın bu günlərdə Azərbaycanla imzaladığı qaz sazişi Ermənistan siyasi elitasında narazılıq doğurub”
Məsələyə münasibət bildirən politoloq Tural İsmayılov buna bir neçə prizmadan yanaşdı: “Əvvəla, İranın hansısa şəhərdə konsulluq açması onun müstəsna suveren hüququdur. Eyni zamanda, Azərbaycan İrandan fərqli olaraq heç vaxt bu ölkənin daxili işinə qarışmır. Ancaq təəssüflər olsun ki, bir müddət əvvəl İran Azərbaycanın öz suveren xarici siyasət kursundan narahat olaraq müxtəlif səviyyəli açıqlamalar verirdi. Lakin artıq o proses geridə qalıb. Azərbaycanla İran arasındakı münasibətlər normallaşma mərhələsindədir. Bundan əlavə, Aşqabaddakı İqtisadi Əməkdaşlıq Təşkilatı nəzdində Azərbaycan, İran və Türkmənistan üçtərəfli qaz sazişi imzalanıb. Həmçinin bu günlərdə Bakıda səfərdə olan İran xarici işlər naziri də gələcəkdə iki ölkə arasında münasibətlərin inkişaf etdirilməsi və yeni layihələrin həyata keçirilməsində maraqlı olduğunu vurğuladı. Bundan əlavə Prezident İlham Əliyev tərəfindən irəli sürülən 3+3 platforması həm də İran üçün siyasi-iqtisadi dividentlər vəd edir. Bu baxımdan hesab edirəm ki, Azərbaycanla İran arasında münasibətlər normallaşmağa doğru gedir. İstənilən bir halda İranın Kafanda səfirlik açması düşünmürəm ki, iki ölkə münasibətlərini zədələyə bilər. Kafan tarixi Azərbaycan torpağıdır və İranın Ermənistanda açacağı istənilən bir konsulluq bizim münasibətləri korluya bilməz. Hesab edirəm ki, İranın bu günlərdə Azərbaycanla imzaladığı qaz sazişi və münasibətlərin normallaşması Ermənistan siyasi elitasında narazılıq doğurub. Bundan əvvəl İrana dostluq mesajları verən erməni siyasətçilər indi Tehranı tənqid edirlər. İran da bütün bu faktorları nəzərə alaraq erməniləri sakitləşdirməkdən ötrü bu addımı atıb. Yəni əvvəlki münasibətlər korlanmasın deyə belə bir siyasi jest edib”.
Politoloq onu da əlavə etdi ki, İran bu addımı atmaqla, guya balanslı siyasət yeritdiyini göstərir.
Vidadi ORDAHALLI
