Ermənistan hökuməti Arazdəyən-Culfa-Ordubad-Mehri-Horadiz dəmir yolunun Mehri hissəsinin tikintisi üçün hazırlıq işlərinə başlayır. Ermənistan Nazirlər Kabinetinin mətbuat xidmətinin verdiyi məlumata görə, bu barədə ölkənin baş naziri Nikol Paşinyan bildirib. Bu xüsusda Paşinyan bildirib: “Biz artıq elan etmişik ki, Arazdəyən-Culfa-Ordubad-Mehri-Horadiz dəmir yolunun Mehri hissəsinin tikintisinə hazırlıq işlərinə başlayırıq”.
Bundan əvvəl baş nazirin müavini Mher Qriqoryan demişdi ki, 45 kilometrlik dəmiryolunun tikintisi təxminən 200 milyon dollara başa gələcək və yol üç ildən sonra istifadəyə veriləcək. Lakin o, dəmir yolunun Ermənistan sektorunun tikintisinə nə vaxt başlanacağını deməmişdi. Amma artıq Paşinyan vurğulayıb ki, regional kommunikasiyaların açılması Zəngəzur vilayətinin inkişaf etdirilməsinin əhəmiyyətli faktoru sayılır. Baş nazir əlavə edib ki, bu işdə müəyyən problem və təhlükələr, amma həm də böyük imkanlar var: “Biz gərək ürəkdən və səbrlə işləyək ki, təhlükələri idarə edə, imkanları yarada, Ermənistan Respublikasının, o cümlədən Zəngəzur vilayətinin gələcək inkişafına xidmət edə bilək”. O əlavə edib ki, vilayətdə alternativ yolların tikintisi tam sürətlə davam etdirilir. Rusiyanın TASS xəbər agentliyi yazır ki, Ermənistan və Azərbaycanı birləşdirəcək Arazdəyən-Culfa-Ordubad-Mehri-Horadiz dəmir yolunun tikilməsi barədə razılaşmanı Azərbaycan və Ermənistan liderləri İlham Əliyev və Nikol Paşinyan dekabrın 15-də Brüsseldə keçirilən görüşdə təsdiqləyib. Rusiyanın “iarex.ru” nəşri də yazır ki, Bakı Zəngəzur dəhlizinin açılmasına nail olur: “İlham Əliyev və Nikol Paşinyanın əvvəlcə Rusiya prezidenti Vladimir Putinin təşəbbüsü ilə Soçidə, daha sonra Avropa Şurası İttifaqının prezidenti Şarl Mişelin iştirakı ilə Brüsseldə Qərb platformasında, daha sonra isə Fransa prezidenti Emanuel Makronun iştirakı ilə keçirdiyi görüş və danışıqlar müasir siyasi tamaşaları xatırladır. Hər şey bir növ şouya çevrilib, burada birdən-birə pərdə arxasından yeni aktyorlar çıxır, köhnələr isə ikinci, hətta üçüncü planlara düşürlər. Və süjetin inkişafı zamanı hər kəs birtəhər belə bir gizli ssenarinin girovu olur, ilkin hadisə baş verən davamı müəyyən etmir. Özünüz mühakimə edin. İlham Əliyev və Nikol Paşinyan Brüsseldə “Şərq Tərəfdaşlığı” sammiti formatında danışıqlar aparıb. Bundan əvvəl iki ölkə liderləri Mişellə ayrı-ayrılıqda görüşüblər. Eyni zamanda, Avropa İttifaqı Şurasının prezidentinin dediyi kimi, bir müddət İlham Əliyev və Nikol Paşinyan arasında təkbətək söhbət olub. Bir çox əlamətlərə görə, hər şey Ermənistan üçün ağrılı olan münaqişədən sonrakı nizamlanma məsələsi, daha dəqiq desək, Azərbaycanın əsas hissəsindən Naxçıvana gedən, Bakıda Zəngəzur dəhlizi adlandırılan yolun yaradılması ətrafında gedib. Üstəlik, İlham Əliyev və Nikol Paşinyan arasında baş tutan Soçi sammitindən sonra bu məsələ ilə bağlı qızğın ziddiyyətlərdən çıxış etsək, az adam gözləyirdi ki, tərəflər sürətlə irəliləyə biləcəklər. Və birdən Brüsseldə məlum oldu ki, tərəflər “bu məsələdə razılığa gələ biliblər”, “müvafiq sərhəd və gömrük nəzarəti vasitələri ilə dəmir yolunun bərpasını qarşılıqlı əsasda həyata keçirməyə” hazırdırlar. Bu da o deməkdir ki, Bakı Zəngəzur məsələsində də qələbəyə imza atıb”.
Məsələ ilə bağlı Türkiyənin “Haber Global” televiziyası bildirir ki, Azərbaycanın türk dünyasını birləşdirəcək Zəngəzur dəhlizinin açılması üçün diplomatik səyləri öz nəticəsini verməyə başlayıb. Ermənistan Azərbaycanla dəmir yolunun tikintisi üçün hazırlıqlara başlayır. Türkiyə kanalı Zəngəzur dəhlizinin açılışı ilə bağlı
"İlham Əliyev Cənubi Qafqazda proseslərin sahibi, Ərdoğan, Putin və AB müşahidəçi, Paşinyan isə südəmərdir..."
Ermənistanın baş naziri Nikol Paşinyan açıqlamasını xatırladıb: “Paşinyan bildirib ki, Ermənistan hökuməti dəmir yolunun Arazdəyən və Horadiz arasında uzanacaq Mehri hissəsinin tikintisi üçün hazırlıqlara başlayıb. Paşinyan bəyan edib ki, nəqliyyat marşrutlarının açılması müəyyən problemlər və təhlükələr ehtiva etməklə yanaşı, həm də böyük imkanlar bəxş edir və Ermənistan üçün faydalı olacaq”. Dəmir yolu istismara verildikdən sonra Ermənistanın Rusiya və İranla, Naxçıvan Muxtar Respublikasının isə Azərbaycanın əsas hissəsi ilə əlaqə quracağı gözlənilir. Rusiyalı politoloq Stanislav Tarasov qeyd edir ki, Naxçıvanla əlaqənin bu forması Azərbaycan üçün çox vacibdir və Prezident İlham Əliyev bu dəfə də istədiyini alır: “Çünki İlham Əliyev Cənubi Qafqazda proseslərin sahibi, Ərdoğan, Putin və AB müşahidəçi, Paşinyan isə südəmərdir. Qarabağın bütün ərazisi Azərbaycanın nəzarətinə keçəcək və Ermənistan heç nə edə bilməyəcək. Söhbət Xankəndidən gedir. Bu ərazilər Ermənistandan tamamilə ayrılacaq və Azərbaycanın nəzarətinə keçəcək, Rusiyanın isə bu proseslərdə müşahidə missiyası olacaq. Bundan əlavə, İrəvan “1915-ci il soyqırımı” terminindən də imtina etməli olacaq”. Onun sözlərinə görə, Rusiya Ermənistana qarşı çox ehtiyatlı davranır: “Çünki İrəvan ikili oyun oynayır. Bir halda ki, Ermənistanda rus dili çoxdan unudulub. Bir ildən sonra İrəvanda heç ingilis dilində də yox, türk dilində danışacaqlar. Ermənilər pul qazanmaq üçün türk dilini öyrənməyə məcbur olacaqlar. Bu mənada Zəngəzur dəhlizinin açılması ilə bağlı görülən işlər də məntiqi xarakter daşıyır. Azərbaycan hədəfinə çatır”.
Nahid SALAYEV
