Gürcüstanın Baş naziri İrakli Qaribaşvili “İmedi” televiziyasına müsahibəsində Azərbaycan-Ermənistan münasibətlərinin normallaşmasından bəhs edib. Qaribaşvili qeyd edib ki, bu, ölkəsi üçün regionda yeni reallıqlar yaratmaq baxımından gözəl fürsətdir: “Azərbaycanın 15 erməni əsiri mina xəritələri müqabilində Ermənistana verməsində vasitəçi olduğumdan məmnunam. Ermənistan və Azərbaycan liderləri regionda sülhün bərqərar olmasında maraqlıdırlar. Region ölkələri bu cür presedentlərdən ancaq faydalanacaqlar. Bu mühüm presedent idi”.
Qəribədir ki, Qaribaşvilinin səsləndirdiyi məlum fikirləri erməni mətbuatı süngü ilə qarşılayıb: “Ermənistan-Azərbaycan münasibətlərinin necə olacağına qərar vermək İrakli Qaribaşvilinin işi deyil. Bu məsələ həmişə erməni xalqının səlahiyyətində olub və olmaqda davam edəcək. Bəzən başqasının ağzından gələn təriflər məhkəmələrin ölüm hökmündən daha təhlükəli və daha dəhşətli səslənir. Əslində onların paytaxtı Tiflis də erməni şəhəridir. Üstəlik, bir çox erməni kilsələri indi “gürcü” kimi qəbul edilir. Gürcülər müəyyən mənada Azərbaycan və Türkiyədən də təhlükəlidirlər. Müharibə vaxtı Gürcüstan bizimlə nəinki çiyin-çiyinə durmadı, əksinə, düşmənlərimizin hərbi cinayətinə hər cür dəstək verdi”.
Görünən odur ki, ermənilərə yaxşılıq heç bir halda yaramır. Bunlar hətta Gürcüstanla olan qonşuluq münasibətlərini də nəzərə almaq istəmir və gürcülərə belə düşmən gözü ilə baxırlar.
“Cavaxetiyada yaşayan 160 min əhalinin yarısı erməni olsa da, erməni millətçiləri hesab edir ki, ora xüsusi muxtariyyət statusu verilməlidir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, erməni tərəfinin Gürcüstanın vasitəçilik təşəbbüsünə belə aqressiv yanaşmaları bir sıra məsələlərlə bağlıdır: “Əvvəla, bu onu göstərir ki, 44 günlük müharibədə ermənilərin başı əzilsə də, onlar daxilən bununla barışmaq istəmir. Ermənilər reallıqlardan çıxış edib qonşularla xoş münasibətlər qurmaq istəyində deyil. Bu, həm də onu göstərir ki, ermənilərin Qarabağla bağlı iddiaları dəyişməyib. Gürcüstanla bağlı məsələyə gəldikdə isə, ermənilərin istəyi odur ki, gürcülər birmənalı olaraq onları dəstəkləsin. Halbuki, Gürcüstan hər iki ölkə ilə münasibətlərə malik olduğu üçün Qarabağ məsələsində neytral mövqedən çıxış edir. Baxmayaraq ki, Gürcüstanın özü də 30 ildən çoxdur separatizmdən əziyyət çəkir. Ərazisinin 20 faizinə nəzarət edə bilmir. Ancaq o da var ki, İkinci Qarabağ müharibəsi zamanı Gürcüstan öz ərazisindən Ermənistana hərbi yüklərin daşınmasına razılıq vermədi. Çünki Azərbaycanla olan münasibətlər nəzərə alındı. Ermənilərin Gürcüstana mənfi münasibətinin digər səbəbi bu ölkəyə olan ərazi iddiaları ilə bağlıdır. Məlum olduğu kimi, ermənilər uzun illərdir Gürcüstanın Cavaxetiya bölgəsinə iddia edirlər. Cavaxetiyada yaşayan 160 min əhalinin yarısı erməni olsa da, erməni millətçiləri hesab edir ki, ora xüsusi muxtariyyət statusu verilməlidir. Daha sonra həmin ərazi Ermənistana birləşdirilməlidir. Bu səbəbdən Gürcüstanla bağlı belə aqressivdilər”.
Bu baxımdan partiya sədri hesab edir ki, ermənilərlə hər zaman sərt dildə danışmaq daha məqsədəuyğundur.
Vidadi ORDAHALLI
