Hakim “Vahid Rusiya” partiyasının deputatı Vitali Milonov yenidən qanunsuz olaraq Qarabağa gəlib. Rusiya Dumasının deputatı səfər zamanı separatçıbaşı Araik Arutyunyan və digər separatçılarla görüşüb.
İlk dəfə V. Milonov Azərbaycanın suverenliyini pozaraq, 2020-ci ildə Qarabağa səfər edib. V.Milonov Azərbaycana qarşı müntəzəm olaraq hörmətsizlik nümayiş etdirir. Rusiya media orqanlarında birmənalı olaraq ermənipərəst mövqeyindən çıxış edir. Vladimir Jirinovskinin rəhbərlik etdiyi Liberal Demokrat Partiyasının Dumadakı hansısa deputatı Qarabağa qanunsuz səfər etsəydi, hardasa bunu müəyyən mənada başa düşmək olardı. Çünki Jirinovskinin əzəldən Azərbaycana münasibətdə sərgilədiyi şovinist mövqe hamıya bəllidir. Ancaq nəzərə alsaq ki, Azərbaycan-Rusiya dövlətlərarası münasibətləri yaxşı səviyyədədir, iki ölkə arasında iqtisadi-ticarət əlaqələri ilbəil genişlənir, o zaman hakim partiyanı təmsil edən deputatın Qarabağa qanunsuz səfəri nə deməkdir?
“Milonov Kremlin müəyyən qüvvələrindən sifarişlər alır, Bakıya qarşı təzyiq rıçaqı kimi istifadə olunur”
Sözügedən məsələ ilə bağlı fikirlərini “Bakı-Xəbər”lə bölüşən “Səs” Media Qrupunun rəhbəri, politoloq Bəhruz Quliyev buna bir neçə prizmadan yanaşdı: “Təəssüf ki, biz zaman-zaman Rusiyanın siyasi dairələrinin Azərbaycana qarşı qəbulolunmaz addımlarının şahidlərinə çevrilirik. Xüsusilə, strateji partnyor olmağımıza rəğmən, qonşu ölkənin hakim partiyasının - “Vahid Rusiya”nın nümayəndəsinin Milonovun Qarabağa qanunsuz səfər etməsi qəbulolunmazdır. Bu kimi qanunsuz səfərlərlə bağlı Azərbaycanın Xarici İşlər Nazirliyi müvafiq və qəti tədbirlər görür. Ancaq təəssüf ki, qara siyahıya salınan həmin şəxslər növbəti qanunsuz addımlarını atırlar. Biz fransızların, eləcə də digər ölkələrdən olan şəxslərin də qanunsuz səfərlərini nəzərə almalıyıq. Milonov da bu sıradandır, o daha əvvəl də Xankəndiyə səfər edərək separatçılarla görüşüb. Özünü rəsmi adam kimi təqdim edib. Bu yolverilməzdir və belə çıxır ki, Rusiya bölgədə sülhyaratma missiyasını üzərinə götürdüyünü bəyan etsə də, Azərbaycanın verdiyi qərarlara, ölkəmizin ərazi bütövlüyünə qarşı etinasız, saymazyana davranılır. Əgər düşünsək ki, belə qanunsuz səfərləri bilavasitə ölkələrimiz arasında yaxşı münasibətləri istəməyən siyasi qüvvələr, məsələn Jirinovski kimi radikal, şovinist düşüncəli şəxslər və onların əlaltıları həyata keçirir, bu zaman məntiqi olaraq belələrinin məqsədinin nədən ibarət olduğunu anlaya bilərik. Yəni deyə bilərik ki, məqsəd Rusiya-Azərbaycan münasibətlərinə xələl gətirməkdir. Ancaq görəndə ki, Rusiyanın hakim partiya nümayəndəsi həmin addımı atır və bu partiyanın rəhbərliyi ona qarşı hər hansı bir təzyiq göstərmir, onda məsələ ayrı səmtə doğru yönəlir”.
B.Quliyev açıqlamasında onu da qeyd etdi ki, Milonov bu yaxınlarda apardığı seçki marafonunda azərbaycanlıları təhqir edib, sosial şəbəkələrdəki Azərbaycan seqmentləri ona qarşı haqlı ittihamlar irəli sürüblər: “Bu şəxs birbaşa ermənipərəstliyi ilə tanınır və eyni zamanda, separatçı rejimə dəstəyini gizlətmir. Qondarma qurumun başçısı Araik Arutyunyan Moskvaya etdiyi səfəri zamanı da onu digər ermənipərəst deputatlarla yanaşı Milonov qarşılayıb. Bu gün həmin Milonov Arutyunyanla Xankəndidə görüşür. Əlbəttə, belə məsələlərin onun şəxsi təşəbbüsü olduğunu da deyə bilmərik. Hər halda o, Kremlin müəyyən qüvvələrindən sifarişlər alır, Bakıya qarşı təzyiq rıçaqı kimi istifadə olunur. Lakin hər şeyə rəğmən, Bakı belə məsələlərdə öz qəti mövqeyini bildirir. Hesab edirəm ki, bununla bağlı Rusiyanın Azərbaycandakı səfirliyinə də məlumat veriləcək. Etiraz notası göndəriləcək, hesabat tələb olunacaq. Əks halda, belə səfərlər edənlərin ayaqları yer ala bilər. Bu kimi olayların başvermə səbəblərindən biri də Rusiya sülhməramlılarının müvəqqəti nəzarətlərinə verilmiş Laçın dəhlizi və orada mövcud olan özbaşınalıqlardır. Artıq Azərbaycanın rəhbərliyi də bu barədə bəyanatlar səsləndirib, qanunsuz səfərlərin qarşısının alınması üçün isə dəhlizin girişində Azərbaycanın postlarının qurulması tələbi artmağa başlayıb. Əgər qəti addım atılmasa, bu, Rusiya sülhməramlılarına göstərilən etimadın kifayət qədər aşağı düşməsinə səbəb olacaq. Yəni fakt bu olacaq ki, onlar rəsmi Bakının etimadını doğrulda bilmədilər, bu isə Qarabağ münaqişəsinin həll olunmasında rolu olan Moskva üçün heç də müsbət amil kimi qiymətləndirilə bilməz. Bu gün onlar yaddan çıxarmamalıdır ki, Rusiya sülhməramlılarına mandat verilməyib və verilməməsi səbəbindən biri də məhz bu kimi hadisələrin baş verəcəyi ehtimallarının əvvəlcədən proqnozlaşdırılmasıdır. Təəssüf ki, biz həmin proqnozların doğrulduğunu müşahidə edirik. Ancaq Azərbaycanın ərazi bütövlüyünə, suverenliyinə qarşı atılan qeyri-qanuni addımların da qarşısının alınması üçün artıq müəyyən mexanizmlərin həyata keçirilməsinin vaxtı çatıb və inanırıq ki, onlar işlək olacaq”.
Politoloq onu da əlavə etdi ki, Rusiya Azərbaycanla strateji partnyorluq münasibətlərini inkişaf etdirmək məqsədini daşıyırsa, bu məsələdə səmimidirsə Kremlin müvafiq qurumları Milonovla bağlı və eləcə də ona bu sifarişi verən hakimiyyətə yaxın dairələrlə bağlı ciddi ölçü götürməyə borcludurlar.
Vidadi ORDAHALLI
