Dünya azərbaycanlılarının həmrəyliyi, onların təşkilatlanması prosesini daim diqqət mərkəzində saxlayan Ulu Öndər Heydər Əliyevin səyləri ilə dekabrın 31-i Dünya Azərbaycanlılarının Həmrəylik Günü elan edildi. Bu barədə 1991-ci ilin 16 dekabrında Naxçıvan Muxtar Respublikasının Ali Məclisi 6 bənddən ibarət qərar qəbul edib, həmin günün bayram kimi qeyd olunması elan edilib.
Dekabrın 25-də isə Ali Sovetin Milli Şurası müraciəti nəzərə alaraq, dekabrın 31-nin Dünya azərbaycanlılarının həmrəyliyi günü elan olunması barədə qanun qəbul edib və artıq bundan sonraki illərdə bütün respublika ərazisində 31 dekabr Dünya Azərbaycanlılarının Həmrəyliyi Günü kimi qeyd olunmağa başlanıldı. Dünya Azərbaycanlılarının Həmrəyliyi Gününü növbəti dəfə qeyd etməyimizə iki gündən də az müddət qalıb. Bununla, ikinci ildir ki, xalqımız bu dəyərli günü müzəffər xalq, qalib ölkənin ləyaqətli vətəndaşları kimi qeyd edir. İlin hesabatına baxdıqda görürük ki, əgər ötən il tariximizə şanlı qələbə ili kimi düşmüşdüsə, bu il artıq bu qələbənin daha da möhkəmləndiyi, diplomatik müstəvidə saysız-hesabsız uğurların əldə olunduğu, azad olunmuş torpaqlarda yenidənqurma və bərpa işlərinin geniş vüsət aldığı bir il olaraq həkk olunub. Əminik ki, 2020 və 2021-ci illərdə olduğu kimi 2022-ci il və bundan sonra qarşıdan gələn bütün illər ölkəmiz üçün uğurlarla, qürur dolu günlərlə səciyyəvi olacaq.
Yalnız güclü birliyə malik xalqlar xarici siyasətdə mühüm uğurlar qazana, dünya miqyasında mənafelərini hər zaman layiqincə qoruya, ümummilli problemlərinin həllinə nail ola, öz dilini, mədəniyyətini, incəsənətini, tarixini lazımi səviyyədə təbliğ edə bilirlər. Beləliklə, haqq işimizin dünyaya çatdırılması, Azərbaycan həqiqətlərinin təbliğ olunması və xüsusilə erməni yalanlarının ifşası dövlət siyasətinin ən prioritet vəzifələrindən biri olmaqla yanaşı, həm də bütün azərbaycanlıların, o cümlədən dünyanın müxtəlif ölkələrində yaşayan, çalışan, təhsil alan azərbaycanlıların ən qabaqcıl vəzifələrindən biridir. Son illərdə soydaşlarımızın bu istiqamətdəki fəaliyyətləri bizə onu deməyə əsas verir ki, Azərbaycan bu mənada istədiyinə nail olub. Çünki, Vətəndən nə qədər uzaq olsa da lazım olduqda, ehtiyac yarandıqda hər bir vətəndaşımız, hər bir soydaşımız ortaq amal naminə birləşərək Vətənin müdafiəsinə qalxır, onun maraqlarını təmin etmək üçün heç bir təzyiqə, təhdidə boyun əymədən birləşərək canı bahasına milli maraqlarımıza xidmət edir.
Dünya Azərbaycanlılarının Həmrəyliyi Günü artıq 2-ci dəfə ölkəmizin ərazi bütövlüyü şəraitində qeyd olunacaq
Yaxın tarixə diqqət edək. 12-17 iyul tarixlərində baş verən Tovuz döyüşləri və 44 gün davam edən Vətən müharibəsi günlərində biz daim böyük dövlətlərdə yaşayan azərbaycanlıların birləşərək aksiyalar keçirdiyinin, mitinqlər təşkil etdiyinin şahidi olurduq. Hətta bir çox dəfə bu aksiyalar ermənilər tərəfindən hücumlara məruz qalsa da, soydaşlarımıza xəsarətlər yetirilsə də onlar olduqları mövqeləri tərk etmir, ermənilərin hücumundan təsirlənərək geri çəkilmirdilər. Əlbəttə ki, bu da xalqımızda özünə əminliyi daha da artırır, böyük Zəfərin qaçılmazlığına olan inamı gücləndirirdi. Nəticədə dəmir yumruq kimi birləşən dünya azərbaycanlılarının fədakar xidmətləri Qələbəmizə öz töhfəsini bəxş edərək tariximizə həkk olundu. Bu gün əminliklə demək olar ki, xarici ölkələrdə məskunlaşıb yaşayan milyonlarla soydaşımızın Azərbaycançılıq məfkurəsi ətrafında sarsılmaz birliyi və Vətənə sədaqəti tarixin sınağından ləyaqətlə çıxmağı bacardı. Xalq-iqtidar birliyini inkişafının, xalqımızın möhkəm həmrəyliyinin məntiqi nəticəsi kimi Qarabağda erməni işğalına son qoymaq üçün 2020-ci il 27 sentyabrda başlayan və 44 gün davam edən Vətən müharibəsində qazanılan Qələbə ilə işğala birdəfəlik son qoyuldu. Prezident, Ali Baş Komandan İlham Əliyev Qarabağın ürəyi sayılan Şuşanın azad olunması xəbərini verdikdən sonra bu xəbər nəinki ölkəmizdə, dünyanın istənilən yerində yaşayan hər bir azərbaycanlının böyük sevinc və bayramına cevrildi. Ön cəbhədə ordumuzun, arxa cəbhədə mülki vətəndaşlarımızın əzmkarlığı bu Vətən müharibəsində böyük bir dastanın yazılmasına gətirib çıxartdı. Bu dastanın müəllifi isə heç şübhəsiz, Prezident İlham Əliyevdir. Bu il 31 dekabr - Dünya Azərbaycanlılarının Həmrəyliyi Günü artıq 2-ci dəfə ölkəmizin ərazi bütövlüyü şəraitində qeyd olunacaq. Fürsətdən istifadə edib, bu əlamətdar gün münasibətilə bütün dünya azərbaycanlılarını ürəkdən təbrik edirik.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
