Son dövrlər maraqlı tendensiya müşahidə edilir. Məsələ ondadır ki, Ermənistan Azərbaycanla çox yaxın əlaqələrə malik olan, Qarabağ məsələsində birmənalı olaraq rəsmi Bakının mövqeyindən çıxış edən ölkələrlə münasibət qurmağa girişib. Məlum olduğu kimi, Qarabağ məsələsinə görə Səudiyyə Ərəbistanı ilə Pakistanın Ermənistanla diplomatik əlaqələri yoxdur. Ermənistan prezidenti Armen Sarkisyan bu il bir neçə dəfə Səudiyyə Ərəbistanı rəsmiləri ilə təmas qurub. Həmçinin, bu ölkədə işgüzar səfərdə olub. O cümlədən, rəsmi Ər-Riyad da Ermənistanla münasibətlərin qurulmasında maraqlı görünür.
Bu arada prezident A.Sarkisyan bəyan edib ki, İrəvan Pakistanla da diplomatik əlaqələr qurmalıdır: “Mən belə fikirlərlə razı deyiləm ki, kimsə mənim rəqibimi və ya düşmənimi dəstəkləyirsə, o zaman onunla danışmamalıyıq. Bizim Pakistanla diplomatik münasibətlərimiz yoxdur. Ermənistan Pakistanla əlaqələr qurmaq prosesinə başladığı andan bəlkə də Qafqazla bağlı onların mövqeyi fərqli olacaq. Münasibətlərimizi necə qura biləcəyimizi düşünürəm. Çünki Pakistan diqqətdən kənarda qalmayan bir ölkədir. Baxmayaraq ki, bu ölkə Azərbaycan və Türkiyəyə açıq-aşkar dəstək verir. Biz dialoqa başlamağa çalışmalıyıq və bunun hara aparacağını görməliyik”.
Sarkisyan onu da qeyd edib ki, Pakistanla dialoqla Ermənistan və Hindistan arasında dərin, yaxşı münasibətlər arasında heç bir ziddiyyət görmür.
Maraqlıdır, Ermənistanın sözügedən siyasi gedişlərini ekspertlər necə dəyərləndirir?
“Düşünmürəm ki, Pakistan kimi böyük dövlət İrəvana xüsusi maraq göstərsin”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Ermənistanın bu yöndə siyasi reveransları bir sıra məqsədlərə hesablanıb: “Bu, çoxşaxəli bir prosesdir. Ermənistan gördü ki, 44 günlük müharibədə onun müttəfiqləri Ermənistandan çox Azərbaycana meyllənib. Xüsusən də Kollektiv Təhlükəsizlik Müqaviləsi Təşkilatında (KTMT) təmsil olunan Belarusla Qazaxıstan Azərbaycanı açıq dəstəklədilər. Ermənistan müharibədə uduzduqdan sonra Azərbaycanla yaxın olan müsəlman ölkələri ilə münasibətlər qurmağa çalışır. Məqsəd odur ki, gələcəkdə həmin ölkələrlə daha yaxın əlaqələr qursun. Həmin ölkələr Qarabağ məsələsində əvvəlki kimi Azərbaycanı dəstəkləməsin. Ermənistanın əsas siyasi istəyi bununla bağlıdır. Ancaq Ermənistan, bütün məsələlərdə olduğu kimi, Azərbaycanla müqayisədə bu məsələdə də zəifdir. Çünki qalib dövlət olaraq Azərbaycanın yeritdiyi xarici siyasət daha uğurludur. Bizim müttəfiqlərimiz, bizə dəstək verən dövlətlər günü-gündən artır. Ermənistan isə iki geosiyasi güc arasında vurnuxur. Bir tərəfdə Qərb, o biri tərəfdə Rusiya. Belə bir zəif ölkə ilə də ancaq diplomatik etik normalara uyğun hansısa dövlət münasibət quracaq. O baxımdan düşünmürəm ki, Pakistan kimi böyük dövlət İrəvana xüsusi maraq göstərsin. Çünki Pakistan Azərbaycanla yaxın olan ölkədir. Ermənistanın forpost ölkə olması, heç bir məsələdə söz sahibi olmaması dünya ölkələrinə məlumdur. Ona görə də belə siyasi gedişlərlə Ermənistan nəyəsə nail ola bilməyəcək. Bununla onlar görüntü yaradırlar. Guya müstəqil dövlətdilər, yeni ölkələrlə münasibətlər qurur və s. Bunların heç birinin əsası yoxdur. Ermənistan nə qədər ki Rusiyanın yedəyində gedir, forpost olkə olaraq qalacaq”.
Bu baxımdan professor hesab edir ki, Ermənistanın xarici siyasətində ciddi uğurların olacağı real görünmür.
Vidadi ORDAHALLI
