Ermənistanın keçmiş prezidenti, müxalif Hayastan blokunun lideri Robert Köçəryan ilin yekinlarına həsr olunmuş mətbuat konfransında hökumətin bütün sahələrdəki fəaliyyətini, o cümlədən Qarabağ məsələsindəki mövqeyini kəskin tənqid edib. Köçəryanın fikrincə, hakimiyyət təhlükəsizlikdən tutmuş xarici siyasət, təbliğat, iqtisadiyyat və sosial məsələlərədək Qarabağ tənzimləməsinin bütün sferalarını iflasa uğradıb. Əslən qarabağlı keçmiş prezident deyib ki, Qarabağ məsələsində Ermənistan əlini üzüb.
Bununla belə, R.Köçəryanın keçirdiyi mətbuat konfransında belə məlum oldu ki, o özü də Qarabağla bağlı proseslərin geridönməz olduğunun fərqindədir. Mətbuat konfransında R.Köçəryan hakimiyyətə gəldiyi halda Qarabağla bağlı 10 noyabr 2020-ci il tarixli üçtərəfli bəyanata yenidən baxmayacağını bildirib: “Çünki bu sənədin əsas bəndləri artıq icra olunub. Bütün ən pis şeylər artıq baş verib. Üstəlik, denonsasiya əsirlərin qaytarılmasına olan ümidləri də puça çıxaracaq. Mən heç olmasa keçmiş DQMV-nin sərhədlərini bərpa etməyə, Hadrut və Şuşanı geri qaytarmağa çalışacağam. Bəzi sahələrdə nəyisə düzəldə bilərik, o cümlədən, “artsax”ın statusu ilə bağlı məsələni”.
Görünən odur ki, əslində R.Köçəryanın özü də dediklərinə inanmır. O, sadəcə ictimai rəyə hesablanmış açıqlamalarla çıxış edir.
“Bölgədəki yeni geosiyasi realliqlar hazırda Rusiyanı qane etdiyindən, Kreml...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafovun fikrincə, Ermənistanın sabiq prezidentinin məlum fikirləri əslində konyunktur maraqlara hesablanıb: “Ermənistanın sabiq prezidentinin hakimiyyətə gələcəyi halda DQMV-nin sərhədlərini bərpa edəcəyi, Hadrut və Şuşanı geri qaytaracagı ilə bağlı verdiyi vədlər ictimai rəyə hesablanıb. Ermənistanda parlament seçkiləri ərəfəsində R.Köçəryan belə konyunktur maraqlara hesablanmış vədlər verdi, amma buna inanan olmadı. Çünki reallıq tamam başqadır. Azərbaycan Birinci Qarabağ müharibəsində məğlub olduğu halda Qarabağdan imtina etmədi. İkinci müharibədə qalib olduğu halda Qarabağı güzəştə gedərmi? Təbii ki, yox. Bunu hamıdan yaxşı R.Köçəryan bilir. Sabiq prezident bu sayaq açıqlamaları ilə seçkilərdə millətçi kəsimin, etiraz elektoratının səslərini qazanacağına umid edirdi. Lakin Ermənistandakı seçkilər artıq arxada qalıb. Məlum olduğu kimi, həmin seçkilərdə Paşinyan və tərəfdarları böyük üstünlüklə qalib gələrək hazırkı hökuməti formalaşdırıblar. Erməni müxalifəti isə, üst-üstə göturüldükdə, parlamentdəki yerlərin təxminən 5/1-ni qazandı. Deməli, icra hakimiyyətinin səlahiyyətləri Paşinyanın komandasının əlində cəmləşib. Ölkənin müqəddəratı üçün bütün məsul qərarların qəbul edilməsi səlahiyyətləri də Paşinyan iqtidarına aiddir. Parlamentdə azlıqda qalan erməni müxalifətinin hökumət qərarlarına, habelə qanunvericilik proseslərinə təsir imkanları kifayət qədər məhduddur. Müxalifət vahid cəbhədən çıxış etmədiyindən etiraz elektoratı da pərakəndə haldadir. İctimai rəyə yetərincə təsir imkanlarına malik deyil. Məğlubiyyətin erməni cəmiyyətində doğurduğu ciddi rezonansa baxmayaraq, ölkə seçicilərinin mütləq əksəriyyətinin Paşinyana olan etimadı sarsılmayib. Görünür, erməni cəmiyyəti məğlubiyyətin əsas səbəbini Paşinyan iqtidarına sabiq prezidentlərdən miras qalan və dövlətçiliyi içəridən didib-dağıdan korrupsiyada, kölgə iqtisadiyyatında, azad məhkəmə hakimiyyətinin zəif olmasında, işsizlik, miqrasiya, işçi və beyin qüvvəsinin axınında görür. Erməni müxalifətinin Paşinyan iqtidarına təsir imkanlari isə yalniz geosiyasi ampluada mövcuddur. Əsasən Rusiya iqtidari ilə bağlı olan, onun Ermənistandakı maraqlarının təmsilçisi olan məlum qüvvələr bunu edə bilər. Ermənistanda hakimiyyət uğrunda mübarizədə Rusiyadakı bəlli dairələr ötürücu qayış rolunda çıxış edirlər. Rusiya Ermənistan uğrunda onunla qlobal maliyyə mərkəzləri arasinda gedən geosiyasi mübarizədə məlum muxalif quvvələrdən hələlik əyləc mexanizmləri olaraq istifadə edir. Bölgədəki yeni geosiyasi realliqlar hazırda Rusiyanı qane etdiyindən, Kreml hələlik bu əyləclərdən tam mənada istifadə etməyə lüzum görmür”.
Bu mənada politoloq hesab edir ki, Ermənistan müxalifətinin mövcud reallıqları dəyişmək imkanları sıfıra bərabərdir.
Vidadi ORDAHALLI
