Hadrutda quraşdırılan lövhə erməniləri dəli edib. Məsələ ondadır ki, Xocavənd rayonunun Hadrut qəsəbəsində qoyulmuş lövhədə Azərbaycan xəritəsi əks olunub və xəritədə Zəngəzur Azərbaycanın tərkibində göstərilib. Lövhədə “Müqəddəs sərhədlərimizin keşiyində” sözləri yazılıb.
Məhz bu səbəbdən ermənilər Zəngəzurun Azərbaycanın tərkibində göstərilməsindən qəzəblənərək Ermənistanın Xarici İşlər Nazirliyindən izahat tələb ediblər. Xoflanan ermənilər bunu belə əsaslandırıblar: “Azərbaycan tezliklə “Arsaxa” qaytaracağımız işğal olunmuş erməni şəhəri Hadrutda Sünikin bir hissəsinin Azərbaycan ərazisi kimi göstərildiyi xəritə asıb. Biz Ermənistan XİN-dən tələb edirik ki, Azərbaycanın Ermənistandakı səfirinə, yəni Paşinyana nota versin. Çünki bütün bunlar onun icazəsi ilə baş verir”.
Belə görünür ki, adi xəritəni belə həzm edə bilməyən ermənilər ciddi xof içindədirlər. Ermənistan dövlət olaraq KTMT-də təmsil olunsa da, onlar ölkənin etibarlı müdafiəsinə inanmır. Bütün bunlar həm də Ermənistan cəmiyyətində ciddi formada özünü göstərməkdə olan məğlubiyyət sindromundan irəli gəlir ki, bunun hələ uzun müddət cəmiyyəti xof içində saxlayacağı güman edilir.
“Aydın oldu ki, nəinki Qarabağda, o cümlədən Ermənistanda da ermənilərin qalması sual altındadır”
Hərbi ekspert Ramil Məmmədli hesab edir ki, Ermənistanla müharibə hərbi müstəvidə dayansa da, siyasi müstəvidə davam edir: “Nəzərə almaq lazımdır ki, bunlar bir-biri ilə üzvi şəkildə bağlıdır. Şanlı ordumuz ötən il təkcə ərazilərimizi işğaldan azad etmədi. Ordumuz hərbi qələbəsi ilə həm də erməni faşizminin belini qırdı. Hansı ki, uzun illər onlar Birinci Qarabağ müharibəsinin təsiri altında idilər. Kür çayına qədər Azərbaycan ərazilərini işğal etmək barədə düşünürdülər. Ancaq 44 günlük müharibə onların bütün miflərini puç etdi. Aydın oldu ki, nəinki Qarabağda, o cümlədən Ermənistanda ermənilərin qalması sual altındadır. Ermənilərin öz gələcəkləri barədə ümidsiz olmalarının nəticəsidir ki, müharibədən sonrakı bir il ərzində 103 min erməni Ermənistanı tərk edib. O cümlədən Qarabağı tərk edən ermənilərin sayı artır. Zəngəzur dəhlizi məsələsində Azərbaycanın qətiyyətli mövqe ortaya qoyması erməniləri daha çox narahat edir. Hesab edirlər ki, Zəngəzurdan miqrasiya daha da güclənəcək. Çünki yaxşı bilirlər ki, indiki Ermənistan tarixi Azərbaycan ərazilərində yaradılıb. Gec-tez haqq öz yerini tapacaq”.
Hərbi ekspert onu da əlavə etdi ki, Ermənistan regionda gedən prosesləri dayandıra bilməz.
Vidadi ORDAHALLI
