Azərbaycan Milli Məclisi dekabrın 14-də “Media haqqında” qanun layihəsini birinci oxunuşda qəbul edib. Qanunu mütərəqqi hesab edənlərlə yanaşı, onun bəzi müddəaları ilə razılaşmayanlar da var. Hətta xaricdə fəaliyyət göstərən media quruluşları ilə əlaqələri olan bəzi jurnalistlər qanun layihəsinə etiraz əlaməti olaraq kiçik aksiya da keçirməyə cəhd ediblər. Qanun layihəsinə etiraz edənlərin bəzi arqumentləri ictimai müzakirələr zamanı özünə ciddi tərəfdar toplaya bilməyib.
Qanun layihəsinin Milli Məclisdə müzakirəsi zamanı Medianın İnkişafı Agentliyinin (MEDİA) icraçı direktoru Əhməd İsmayılov bildirib ki, yeni qanun layihəsinin hazırlanmasında məqsəd informasiya təhlükəsizliyinin artırılması, medianın inkişafı və stimullaşdırılmasıdır.
Bəzi ekspertlər qeyd edib ki, yeni qanunda media ombudsmanı və onun səlahiyyətləri ilə bağlı maddə yoxdur: “Ona görə də yeni qanunun qəbulunun Azərbaycanda media müstəqilliyinin inkişafına töhfə verəcəyinə inanmırıq”.
Azərbaycanda media ilə münasibətləri tənzimləyən bir neçə təsisat var ki, aktiv fəaliyyət göstərir. Eyni zamnda, ölkənin Ombudsmanı var ki, media ilə bağlı məsələləri araşdırmaq onun tam səlahiyətinə aiddir. Belə olan təqdirdə, əlavə bir ombudsmana ehtiyac varmı və media ombudsmanının olmaması qanun layihəsinin obyektivliyinə şübhə sala bilərmi?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, qanun layihəsi ilə bağlı yaranan fikir ayrılığı təbiidir: “Bu özünü qanunlarla bağlı müzakirələrdə də göstərəcək. Media Haqqında Qanunda media ombudsmanının olmaması yeni qanunun qüvvəsini zəiflətməyəcək. Bununla bağlı səslənən iradlarla qəti razı deyiləm. Bir sahə ilə çox təşkilatın məşğul olması və ya qanunların çoxluğu xaos yarada bilər. Belə olanda ona qədər olan bütün qanunlar ləğv edilməlidir. Azərbaycan xalqının iradəsini ifadə edən Konstitusiyamızda kifayət qədər müddəalar var. Məsələn, yaradıcılıq, məlumat alma, fikir və söz azadlığı kifayət qədər bitkin və aydın şəkildə ifadə olunub. Hər kəsin söz azadlığı varsa, qanunların və ona nəzarət edən qurumların çoxluğuna ehtiyac yoxdur. Media sahəsində ikinci bir Ombudsmanın yaradılması doğru deyil. Bizdə bir Ombudsman var. Media sahəsində baş verənləri tənzimləmək üçün kifayət qədər başqa təsiasatlar da var. Yetər ki, biz Konstitusiyanın və yeni qəbul edilən qanunun müddəalarına riayət edək. Belə olan təqdirdə əlavə təsisata zərurət də duyulmayacaq. Dövlət KİV-lərin azadlığına təminat verir. Mediada senzura ləğv edilibsə, əlavə müvəkkil lazım deyil. MEDİA, Telaradio Şurası kimi qurumlar KİV-lərlə bağlı bir sıra prosedurları həyata keçirir. Belə bolluğa yeni nəyinsə əlavə edilməsini istəyənlər, görünür, qanunvericilik bazamızdan tam da xəbərdar deyillər”.
Məhəmmədəli QƏRİBLİ
