Ermənistanın baş naziri Nikol Paşinyan Facebook-da canlı yayımda mətbuat konfransı keçirib və bir sıra ciddi bəyanatlar verib. Xüsusilə, Ermənistan hökumətinin başçısı xatırladıb ki, 1993-cü ildə BMT Təhlükəsizlik Şurası Qarabağı Azərbaycanın ayrılmaz hissəsi kimi tanıyıb, lakin o vaxtdan bəri regionun statusu məsələsi ilə ATƏT-in Minsk Qrupu məşğul olub. 2016-cı ildə isə status məsələsi yenidən BMT Təhlükəsizlik Şurasına qaytarılıb və bu, Paşinyanın fikrincə, Ermənistan üçün “fəlakət” idi, çünki bu mötəbər beynəlxalq qurum çərçivəsində Qarabağın statusu ilə hesablaşmaq mümkün deyil. O vurğulayıb ki, Qarabağ nizamlanmasına ATƏT-in Minsk Qrupu formatında baxması rəsmi İrəvan üçün faydalıdır. Ermənistanın baş naziri onu da qeyd edib ki, “Qarabağda yaşayan azərbaycanlıların hüquqları ilə bağlı məsələ mübahisəli olmayıb və olmayacaq. Mən bu barədə dəfələrlə ictimaiyyət qarşısında çıxış etmişəm. Ən azı, bu hissədə əvvəllər danışıqlarda iştirak etmiş dairələrin nümayəndələri təsdiqlədilər ki, Dağlıq Qarabağ Muxtar Vilayəti danışıqlar prosesində heç vaxt sırf erməni birliyi kimi nəzərə alınmayıb”. Paşinyan xatırladır ki, “Dağlıq Qarabağ Muxtar Vilayəti heç vaxt sırf erməni birliyi hesab edilməyib. Bu, ən azı əhali baxımından erməni-azərbaycan birliyi kimi qəbul edilib, müşahidə edilib, qeydə alınıb”. Ermənistanın baş naziri həmçinin bəyan edib ki, əvvəlki hakimiyyətin “Qarabağ heç vaxt Azərbaycanın bir hissəsi olmayacaq və yalnız erməni olmalıdır” ifadəsi ilə heç vaxt razılaşmayıb. “Mən bu ifadə ilə razı deyiləm, çünki Qarabağ tamamilə erməni ola bilməzdi. Əhalinin demoqrafik tərkibini nəzərə alsaq, heç bir halda. Danışıqların məzmunundan aydın görünürdü ki, Dağlıq Qarabağ Muxtar Vilayətində erməni və azərbaycanlı əhali yaşayır. Aydındır ki, Qarabağdakı hakimiyyət də tam erməni ola bilməz”, - deyə o, məxfi məlumatları açıqlamalı olduğuna işarə edib.
Paşinyanın bu mövqeyi hansı mülahizələri irəli sürmək üçün əsas verir?
Politoloq Qabil Hüseynli “Bakı-Xəbər”ə açıqlamasında bildirdi ki, Paşinyan “Qarabağ klanı”na məxsus olan Serj Sarkisyandan, Robert Köçəryandan tam fərqli düşüncəyə sahibdir: “Hətta deyərdim ki, proseslərə realist yanaşmanı ortaya qoymağı bacarır. Bölgədə formalaşmış reallıqları nəzərə aldığı üçün düz danışmaq kimi məsuliyyəti öz üzərinə götürür. Başa düşür ki, Azərbaycanla münasibətləri qaydaya salmadan, Türkiyə ilə münasibətləri qaydaya sala bilməyəcək. Hər iki dövlətlə münasibətini nizama salmadan, heç İranla da işləri yoluna qoymağa müvəffəq olmayacaq. Reallıqlar ona diqtə edir ki, doğrunu danışsın. Bunun da nəticəsində bölgədə sülhyaratma daha da sürətlənəcək. Hətta sovet zamanında da əhalinin 55 faizi erməni, 45 faizi isə azərbaycanlı idi. Bu o qədər də uzaq keçmiş deyil ki, unudulsun. Paşinyan bilir ki, bölgədəki dövlətlərlə münasibətləri qaydaya salmadan Ermənistanda heç bir iqtisadi layihəni həyata keçirmək mümkün olmayacaq. Paşinyanın dedikləri göz önündə olan həqiqətlərdi. Paşinyan bunları nə vaxtsa etiraf etməliydi. O bu xətti davam etdirsə, bölgədə uzunmüddətli sülh təmin edilə bilər. Bunun da nəticəsində ən böyük faydanı elə Ermənistan götürmüş olacaq. Marqlıdır ki, Paşinyan müharibədə məğlub olsa da, bu şuarları səsləndirməklə yenidən hakimiyyətə gələ bildi. Paşinyan Ermənistanın əksəriyyətinin səsini qazanıb. Bu səbəbdən də həmin cəmiyyətin onunla tam həmfikir olması qənaətinə gələ bilərik. Görünən budur ki, onlar ən doğru yolu seçiblər. Azərbaycanla münasibətləri “Artsax”la bağlı lazımsız tələbi kənara qoyaraq normallaşdırmaq istəyirlər”.
Məhəmmədəli QƏRİBLİ
