Ermənistan prezidenti Armen Sarkisyan “Asia Times” nəşrinə müsahibə verərkən qeyd edib ki, Azərbaycan hərbi güc amilindən indi də istifadə edir. Onun fikrincə, reallıq budur ki, hələ demarkasiya prosesindən əvvəl Azərbaycan tərəfi oyunu diqtə etmək və oynamaq üçün hərbi gücündən və ya qalib gələn mövqeyindən istifadə etməyə çalışır.
Bu zaman jurnalist onu çətin vəziyyətə salan sual verib: “Əgər tarix sizin tərəfdədirsə, niyə Ermənistan hökuməti, BMT-nin 822, 853, 874 və 884 nömrəli qətnamələrində deyildiyi kimi, Qarabağı Azərbaycan ərazisi hesab edən beyəlxalq ictimaiyyət və BMT Təhlükəsizlik Şurasının dəstəyini qazana bilməyib?”.
Bu zaman Sarkisyan suala konkret cavab verə bilməyib və həqiqəti təhrif edib: “Maraqlıdır, hesab edirəm ki, siz beynəlxalq münasibətləri tarixi ədalət əsasında qurmaq istəyən nə birinci, nə də sonuncusunuz. Amma real dünyada belə alınmır. Düzgün deyil?”.
Erməni prezident bildirib ki, onlar vaxtında daha dərin danışıqlara getməli və hər şeyi öz yerinə (?) qoymalı idilər: “Bundan sonra hekayə başqa istiqamətə 180 dərəcə dəyişməyə başladı. Azərbaycan daha da qüdrətlənirdi, Ermənistan isə əsasən və tədricən sanki inkişafdan geri qalırdı. Ümid edirəm ki, biz danışıqlara qayıdacağıq və yenidən yaratmağa, yaxud yeni format yaratmağa məcbur olmayacağıq”.
Görünən odur ki, beynəlxalq hüquq normalarından söhbət düşəndə Ermənistanın səsləndirə biləcəyi arqument olmur. Bu zaman, hər zaman olduğu kimi, məsələləri təhrif edirlər.
“Bunlar anlamaq istəmir ki, separatizm dünyanı təhdid edir”
Məsələyə münasibət bildirən AMİP funksioneri Əli Orucovun fikrincə, başda Armen Sarkisyan olmaqla, erməni rəsmiləri beynəlxalq hüququn Azərbaycanın tərəfində olduğunu yaxşı bilirlər: “Problem ondadır ki, dünyada mövcud olan ikili standartlar, BMT qətnamələrinin icra mexanizminin olmaması illərlə 4 qətnamənin kağız üzərində qalmasına səbəb oldu. O səbəbdən işğal bu qədər uzandı, ermənilərin azğın və beynəlxalq hüquqa zidd fəaliyyətinə dur deyən olmadı. Ancaq beynəlxalq hüququn de-yure bizim tərəfimizdə olması Ermənistanın de-fakto işğal etdiyi əraziləri özününküləşdirmək səylərinin qarşısını aldı. Yəni erməni işğalçıları Qarabağı və ətraf 7 rayonu işğal etsələr də, 30 ilə yaxın müddətdə hüquqi baxımdan uğur qazana bilmədilər. Nəinki BMT, o cümlədən digər beynəlxalq təşkilatlar həmin əraziləri Azərbaycanın ərazisi kimi tanıdılar. Azərbaycan da beynəlxalq hüquqa söykənərək 2020-ci ilin payızında hərb yolu ilə öz ərazi bütövlüyünü demək olar təmin etdi. Bütün bunları A.Sarkisyan çox yaxşı anlayır. Ən azından ona görə ki, onun kifayət qədər diplomatik təcrübəsi var. O yaxşı bilir ki, postsovet məkanında yaranan separatçı ocaqları beynəlxalq qurumlar dəstəkləmir. Həmin separatçı qurumların bundan sonra da nəyəsə nail olacaqları real deyil. Qarabağla bağlı isə BMT-nin məlum qətnamələri var. Hansı ki, nə Gürcüstanda, nə də Moldova və Ukraynada olan separatçı bölgələrlə bağlı belə konkret qətnamələr yoxdur. Düzdür, Qərb və bir sıra qurumlar sözügedən ölkələrin ərazi bütövlüyünə birmənalı dəstək verir. Ancaq Qarabağla bağlı məlum qətnamələr var idi. Həmin qətnamələr uzun illər kağız üzərində qalsa da hüquqi baxımdan bizim xeyrimizə idi. A.Sarkisyan “Qarabağ klanı” hakimiyyətdə olan zaman prezident kürsüsünə yiyələndiyi üçün, bir nov, məsələlərə o quldurların təfəkkürü ilə yanaşır. Bunlar anlamaq istəmir ki, separatizm dünyanı təhdid edir. Belə olan halda Qarabağdakı erməni separatizminin dəstək əldə etmək perspektivi yoxdur”.
O baxımdan partiya funksioneri hesab edir ki, Azərbaycan müharibədə uğur qazandığı üçün diplomatik müstəvidə səylərini artırmalıdır.
Vidadi ORDAHALLI
