“ATƏT-in Minsk Qrupunun həmsədri olan Fransanın prezidentliyə namizədinin belə bir addım atması qətiyyən qəbul edilə bilməz”
Fransada prezidentliyə namizəd Valeri Perkess Ermənistanda səfərdə olarkən gizli şəkildə Azərbaycanın Xankəndi şəhərinə gedib orada separatçılarla görüşdükdən sonra İrəvanda da başqa bir qanunazidd hərəkətlə yadda qalıb. Perkess İrəvanda olarkən faşizmi təbliğ edən davranış sərgiləyib. V.Pekress Ermənistana səfəri zamanı “Erablur” panteonunda erməni separatçıların məzarını “ziyarət” edib. Onun burada qarşısına gül qoyduğu məzarlardan birinin üzərində faşizmin rəmzi hesab olunan svastika işarəsi olub. Onun İkinci Qarabağ müharibəsində ölən ermənilərin üzərində fasizm simvolu olan məzarlarını “ziyarət” etməsi dünya birliyi tərəfindən birmənalı qarşılanmamalıdır. Bilirik ki, Ermənistan faşistləri və faşizmin qəhrəmanlaşdırılması istiqamətində uzun illərdir təbliğat aparır və bunu da bütün dünya bilir. Fransa prezidentliyinə namizəd də faşizmə qarşı mübarizə aparmaq əvəzinə müasir faşistlərin məzarlarına gül qoyur. Bununla da Ermənistanın faşizm siyasətinə açıq dəstək göstərdiyini göstərir.
“Müasir İnkişaf” Birliyinin sədri, siyasi icmalçı Mübariz Göyüşlü “Bakı-Xəbər”ə şərhində bildirdi ki, Perkess bütün qanunazidd davranışları ilə öz mahiyyətini ortaya qoyub. M.Göyüşlünün sözlərinə görə, açıq görsənən odur ki, Fransa prezidentliyinə namizəd özü də Ermənistanda dövlət siyasətinə çevirilən neofaşizmə dəstək verdiyini gizlətmir. “Fransa prezidentliyinə namizədin Qarabağa qanunsuz səfərini kəskin şəkildə pisləyirəm. Bildiyim qədər onunla bərabər bəzi fransalı deputatlar da qanunsuz olaraq bizim ərazimizə gediblər. Bütün bunlar qanunazidd addımları yalnız biz deyil, Fransadakı soydaşlarımız da, bu ölkənin parlamentariləri də haqlı olaraq tənqid edib, pisləyib. Fransa dövləti həm müharibə dövründə, həm ondan əvvəl və sonra faşizmi öz dövlət siyasətinə çevirən Ermənistana dəstək verib, bu gün də ən müxtəlif formalarda bu ölkəni dəstəkləyir. Çox təəssüflər olsun ki, ATƏT-in Minsk Qrupunun həmsədri olan bir dövlət və onun vətəndaşları beynəlxalq hüquqa zidd addımlar atırlar. ATƏT-in Minsk qrupunun həmsədri olan Fransanın prezidentliyə namizdinin belə bir addım atması qətiyyən qəbul edilə bilməz. Fransalı prezidentliyə namizədin faşizmi təbliğ edən davranış sərgiləməsi düşünülməmiş ağılsız addımdır. Eyni zamanda həm faşizmi dövlət siyasəti olaraq təbliğ edən, həm də qonşu ölkənin ərazisinə təcavüz nəticəsində ölən ermənilərin məzarlarının ziyarət edilməsi yolverilməzdir. Fransalı prezidentliyə namizəd yaxşı bilir ki, “Erablur”dakı məzarlar təzavüzkar ölkənin hərbçiləridir və onların hər hansı formadasa qəhrəmanlaşdırılması bütün prinsiplərə ziddir. Hesab edirəm ki, Rusiya, Fransa və başqa belə dövlətlər, onların təmsilçiləri, Ermənistandakı revanşist qüvvələr, erməni Qriqoryan kilsəsi, xaricdəki erməni lobbisi və separatçılar imkan verməlidir ki, erməni xalqı özü öz müqəddaratını müəyyən etsin. Erməni xalqı bu dövlətlərin onların adından qərar verməyə, onları yeni avatüralara sürükləməsinə yox deməlidir. Çünki erməni xalqı bu avatüranın sonunun nə ilə nəticələnəcəyini 2020-ci ildə 44 gün müddətində gördü. Hələ də onlar revanşizmdən və qonşu torpağına göz dikməkdən əl çəkməsələr onları nə gözlədiyini yaxşı bilirlər”.
M.Göyüşlü deyir ki, erməni xalqı revanşistlərin və onları təcavüzkarlığa və müharibəyə sürükləyən qüvvələrin ucbatından gözüyaşlıdır və hələ də 44 günlük müharibədə ölən hərbiçilərin cəsədlərini, itkin düşənləri axtarırlar. Siyasi şərhçi hesab edir ki, Fransadan, Rusiyadan hər hansı bir siyasətçinin Qarabağa gəlməsi və orada qızışdırıcılıq mövqeyindən çıxış edilməsi hallarına son qoyulmalı və artıq bütün dünya reallıqla barışmalıdır. Azərbaycan dövləti və Azərbaycan ictimaiyyəti bu qanunsuz davranışları sərt reaksiya verib. “Hesab edirəm ki, erməni cəmiyyəti də qızışdırıcılıq mövqeyindən çıxış edənləri susdurmalıdır. Fransada belə bir tendensiya formalaşıb, prezidentliyə, deputatlığa və sair sahələrə namizədliyini verənlər erməni lobbisinin dəstəyini qazanmaq üçün dəridən-qabıqdan çıxırlar. Bu baxımdan, Perkess də özündən əvvəlki bəzi prezidentliyə namizədlərdən geri qalmayıb və onların ziyanlı yolu ilə gedib. Bütün hallarda isə bu mənfi haldır. Perkess üzərində faşizm nişanı olan qəbirləri “ziyarət” etməklə, əslində beynəlxalq aləmdə öz daxili mahiyyətini, niyyətini üzə çıxarıb”-deyə M.Göyüşlü qeyd etdi.
İradə SARIYEVA
