Ermənistanın Baş naziri Nikol Paşinyan TASS-ın sualını cavablandırarkən deyib ki, əgər regionun dinc inkişafına töhfə verəcəksə, Ermənistan Azərbaycanın Avrasiya İqtisadi İttifaqına qoşulmasının əleyhinə olmayacaq:
"Əgər görsək ki, bu addım regionun dinc inkişafı üçün era açacaq, təbii ki, buna qarşı olmayacağıq. Bir sıra məsələlər üzrə danışıqlarda yeni münaqişə mənbəyi yaratmaq məntiqsiz olardı”.
Qeyd edək ki, dekabrın 10-da Avrasiya İqtisadi İttifaqının fəxri sədri, Qazaxıstanın birinci prezidenti Nursultan Nazarbayev bildirib ki, Azərbaycan qurumda müşahidəçi statusu ala bilər.
Rusiya Xarici İşlər Nazirliyinin rəsmi nümayəndəsi Mariya Zaxarova qeyd edib ki, Azərbaycan ilə Avrasiya İqtisadi İttifaqı arasında qarşılıqlı fəaliyyət ticarətin intensivləşməsinə və irimiqyaslı infrastruktur layihələrinin həyata keçirilməsinə töhfə verəcək.
Görünür, Paşinyan anlayıb ki, Azərbaycanın Avrasiya İqtisadi İttifaqına üzvlüyü reallaşmaq üzrədir, bu səbəbdən də guya bizə jest etdiyi görüntüsünü yaradır.
Politoloq Qabil Hüseynli “Bakı-Xəbər”ə açıqlamasında bildirdi ki, bu təklifi irəli sürən Nazarbayev Azərbaycanı sevən çox müdrik bir siyasətçidir: “Bu baxımdan da, onun tövsiyələrini nəzərə almaq lazımdır. Açığını deyim ki, Ermənistanla bütün problemlərimiz həll edilməyincə Avrasiya İB-yə getməyinə dəyməz. Hətta müşahidəçi statusunda olsa belə. Əgər Ermənistanla kommunikasiyalar açılarsa, sərhədlərin demarkasiya və delimitasiyası başa çatarsa, böyük sülh sazişi imzalanarsa, bu məsələ gündəliyə gələ bilər. Çünki həmin təşkilatda Qazaxıstan, Özbəkistan kimi türkdilli ölkələr təmsil olunur. Ola bilsin ki, Türkmənistanı da neytrallıqdan çıxarıb ora daxil etsinlər. Hər halda, bu məsələ gündəmə gələ bilər. Mən Azərbaycanın siyasi rəhbərliyinin mövqeyinin necə olduğunu deyə bilmərəm. Şəxsi fikrim budur ki, Azərbaycan Ermənistanla sərhədlərin dəqiqləşdirilməsini başa çatdırsa və onlar bizim ərazi bütövlüyümüzü tanısa bu müracəti etmək yerinə düşər. Əminəm ki, məsələ müsbət həllini tapar. Postsovet məkanındakı ölkələrlə iqtisadi əlaqələri genişləndirmək baxımından Avrasiya İttifaqı tribunasının bizə müsbət təsiri ola bilər. Təklifin Nazarbayevdən gəlməsinin başqa vacib tərəfi də var. Məsələ ondadır ki, 2014-cü ildə Ermənistan Aİİ-yə üzv olanda Prezident İlham Əliyevin göndərdiyi məktubu o zaman Qazaxıstan prezidenti olan Nursultan Nazarbayev tədbir iştirakçılarının diqqətinə çatdırdı. Məktubun məzmunu belə idi ki, Ermənistanı quruma qəbul edərkən Azərbaycanın ərazi bütövlüyü prinsipinə əməl olunmalıdır. Deməli, Nazarbayev hər zaman bizim mövqeyimizi həmin təsisatda ifadə edibsə, onun verdiyi təklif də tam səmimidir. Paşinyan bilir ki, bu prosesin qarşısını almaq onun gücü daxilində deyil. Bu səbəbdən belə manevr edir”.
Məhəmmədəli QƏRİBLİ
