Azərbaycan ordusu tərəfindən məhv edilmiş qondarma rejimin tör-töküntüləri arasında hələ də reallıqla barışmaq istəməyənlər var və onlar bir-biriləri ilə “evcik-evcik” oynayırlar. Qarabağdakı separatçı qalıqları öz oyuncaqlarından -“idarə” və “təşkilat”larından əl çəkmək istəmirlər. Halbuki, onların varlığına çoxdan son qoyulub. Amma yenə də dediyimiz kimi boş xülyalarla yaşayanlar var.
Qondarma rejimin qalıqları olan separatçıların daxilində artıq təbii olaraq qarşıdurmalar yaranmağa başlayıb. Belə ki, separatçıların “Müdafiə Ordusu” separatçı rejimə qarşı qiyam qaldıracağını bəyan edib və separatçıbaşı Araik Artunyunyanı “hakimiyyət” çevrilişi ilə hədələyib. Qondarma rejim tərəfindən “ehtiyatda olan zabitlər”in hələ də pensiyalarının ödənilməməsi səbəbindən Xankəndidə keçmiş “hərbçi”lər qondarma rejimin “Müdafiə Ordusu”nun binası qarşısında etiraz aksiyası keçirərək, bu günə qədər ödənilməmiş hərbi təqaüdlərinin qısa zamanda verilməsini tələb ediblər. KİV-lərin yaydığı məlumata görə, bu barədə separatçıların “Qarabağ Ehtiyatda olan Zabitlər İttifaqı”nın bəyanatında deyilir. “Hərbçilər” tələbləri yerinə yetirilməyəcəyi halda daha radikal addımlar atacaqlarını bildiriblər. Məsələ ilə bağlı təcili reaksiya verən “Müdafiə Ordusu”nun “rəsmiləri” bildiriblər ki, həqiqətən də belə bir problem var, lakin onun həlli “Müdafiə Ordusu”nun imkanlarından kənarda olduğundan bu istiqamətdə konkret addımlar ata bilməyəcəklər. “Qarabağ Ehtiyatda olan Zabitlər İttifaqı” üzvlərinə bu formada verilən cavabdan hiddətlənən keçmiş “hərbçilər” qondarma qurumun rəsmilərinə qısa müddətdə pensiyaların təmin edilmədiyi halda hərbi çevriliş edəcəkləri ilə bağlı xəbərdarlıq ediblər.
Medianın yazdığına görə, təşvişə düşən “Müdafiə Ordusu” maliyyə idarəsi rəisini və qurumun komandanlığını təcili həll yolları axtarmağa məcbur edib və “hərbçilər”ə problemin diqqət mərkəzində olacağını, problemin qısa zamanda həll ediləcəyinə söz verib.
Siyasi ekspert Rövşən Rəsulov baki-xeber.com-a bildirdi ki, separatçılar hazırda çox ciddi maliyyə problemi ilə üzləşiblər. R.Rəsulovun sozlərinə görə, çünki separatçıların maliyyəsi əsasən Ermənistandan təmin olunurdu və baş verənlər bu təminatın kəsildiyini göstərir: “Gerçəklik odur ki, artıq Ermənistan separatçıların maliyyə təminatını kəsib. Çünki Ermənistan 44 günlük müharibədə məğlubiyyətə uğradıqdan sonra onsuz da zəif olan iqtisadi resurslarını və maliyyə bazasını tamamilə itirib. Bildiyiniz kimi bu yaxınlarda separatçılar yenə də dilənçilik kampaniyası apardılar. Ermənistandan və xaricdəki erməni lobbisindən pul qoparmaq məqsədilə apardıqları dilənçilik kampaniyasının da adını qoydular ki, guya onlar dilənçi payı ilə qondarma rejimin “inkişafını təmin etmək” istəyirlər. Amma gördüyünüz kimi bu dilənçilik kampaniyaları da doğru-dürüst nəticə vermədi və istədikləri məbləği yığa bilmədilər. Artıq separatçıların heç bir maliyyə resursları, özlərini ayaqda saxlamaq imkanları yoxdur, tükənib. Belə olan halda, Qarabağda yaşayan ermənilərə böyük vədlər verən quldur rejimin başçısı Artunyunyanın vədləri özünü doğrultmur və bu da narazılığa səbəb olur”.
R.Rəsulovun sözlərinə görə, Artunyunyanın yalan vədlərindən bezən “Müdafiə Ordusu”nun “zabit”ləri ayağa qalxıblar və qondarma rejimə qarşı qiyam qaldıracaqlarını deyirlər. “Əslində, separatçı rejimə qarşı qiyam qaldırılacağı ilə bağlı bəyanatın səsləndirilməsi gözlənilən idi və qarşıda biz daha tez-tez belə halların şahidi olacağıq. Azərbaycanın Qarabağ bölgəsində yaşayan ermənilər artıq məsələnin bitdiyini anlayırlar. Bir məsələni xüsusi vurğulamaq istəyirəm. Ermənistanın Baş naziri Nikol Paşinyan da son müsahibəsində deyib ki, bizim sülh müqaviləsi imzalamaqdan başqa çıxış yolumuz yoxdur. Eyni zamanda Paşinyan bildirib ki, BMT Dağlıq Qarabağı ermənilər və azərbaycanlılar yaşayan Azərbaycan ərazisi kimi tanıyır, bu vacib məqamdır, əgər Dağlıq Qarabağın statusu ilə hər hansı bir qərar verilərsə, o zaman yekun status Azərbaycan konstitusiyasına uyğun dəqiqləşdirilməlidir. Bu da o deməkdir ki, çox qısa zamanda Qarabağ Azərbaycanın yuridisiyasına keçəcək, hadisələr də onu göstərir. Əgər sabah orada “hərbçilər”in qiyamı baş verərsə, sizi inandırım ki, digər profillərdə çalışan ermənilər də bu qiyamlara qoşulacaq. Bu gözləniləndir. Çox yaxın vaxtlarda biz Xankəndidə ciddi çaxnaşmaların şahidi ola biləcəyik. Çaxnaşmalar elə şəkildə ola bilər ki, hətta orada onlara qayğı göstərən Rusiya sülhməramlıları belə bu qiyamların qarşısını ala bilməz. Yəni bu faktdır”.
R.Rəsulovun sözlərinə görə, baş verən bu hadisə də onu göstərir ki, yaxın gələcəkdə Qarabağdakı ermənilər könüllü şəkildə separatçılarla vidalaşıb Azərbaycan vətəndaşı kimi yaşayacaqlar.
İradə SARIYEVA
