“Ölkə hüdudlarından kənarda olsa da, əgər bu təhdidi biz görsək, heç kim bizi dayandıra bilməz”. Bu barədə Prezident İlham Əliyev Hadrutda yeni hərbi hissənin açılışında çıxış edərkən bildirib.
Ölkə başçısı qeyd edib ki, Ermənistan yenidən bizim üçün təhlükə mənbəyi olmağa cəhd edərsə, onların axırı İkinci Qarabağ müharibəsindəki kimi olacaq: “Biz heç vaxt imkan verə bilmərik ki, xalqımıza, dövlətimizə, ərazi bütövlüyümüzə hər hansı bir təhdid yaradılsın. Ölkə hüdudlarından kənarda olsa da, əgər bu təhdidi biz görsək, heç kim bizi dayandıra bilməz. Necə ki, 44 gün ərzində nə qədər bizi dayandırmağa çalışdılar, nə qədər bizi hədələdilər, təzyiq etdilər, təhdid etdilər, heç kim bizi dayandıra bilmədi. Mən bütün bu 44 gün ərzində deyirdim ki, heç kim bizi dayandıra bilməz, Ermənistan rəhbərliyi bizə tarix versin nə vaxt bizim torpağımızdan rədd olur, ondan sonra biz müharibəni dayandıracağıq. Elə də etdik, sözümüzə əməl etdik. İndi də Ermənistanda əgər kimsə revanş haqqında düşünürsə, əgər kimsə düşünür ki, bir neçə ildən sonra vəziyyət dəyişəcək, nəsə baş verəcək və yenidən onların hərbi imkanı yaranacaq və onlar yenidən bizə ərazi iddiası ilə çıxış edəcəklər, bəri başdan bilsinlər, biz heç nəyi gözləməyəcəyik, heç kim bizi dayandıra bilməz, heç nəyə baxmadan lazımi addımları atacağıq. Bunu etmək üçün siyasi iradəmiz də var, gücümüz də var”.
Bütün bunlar Ermənistana çox ciddi xəbərdarlığı özündə ehtiva edir. Çünki bu o deməkdir ki, Ermənistan ərazisindən belə hər hansı təxribat və ya hücum cəhdi olarsa, cavabı sərt olacaq. Ermənistanın məlum hərbi blokda təmsil olunması o demək deyil ki, Azərbaycan hüdudları kənarından gələn təhdid cavabsız qalacaq.
Məsələyə münasibət bildirən millət vəkili, politoloq Elman Nəsirov hesab edir ki, Prezidentin məlum fikirləri Ermənistana çox ciddi mesajdır: “Prezident İlham Əliyev Hadrutda səfərdə olarkən bir sıra çox önəmli tezislərlə çıxış etdi. Bunların içində ən çox diqqəti cəlb edən məqamlardan biri də onunla bağlı idi ki, ölkə hüdudları xaricindən təhdid olarsa, dərhal bunun qarşısı alınacaq. 30 illik işğal dövrü göstərdi ki, Ermənistanın arxasında müəyyən havadarları var. Ermənistan onlara arxayın olaraq işğalçılıq siyasətini davam etdirirdi. Eyni zamanda həmin dairələr Azərbaycana eyham vururdular ki, məsələnin hərbi həlli yolu yoxdur. Ancaq cənab Prezident deyirdi və sonra bunu sübut etdi ki, məsələnin hərb yolu ilə həlli mümkündür. Müharibə zamanı mane olmağa çalışsalar da bacarmadılar. Minsk Qrupunun həmsədri olan Fransanın prezidenti açıq şəkildə Ermənistanı müdafiə etdi. ABŞ Konqresinin bir sıra üzvlərinin Ermənistanı dəstəklədiyini gördük. Ancaq bütün bu təzyiqlər heç bir nəticə vermədi. Çünki Ali Baş Komandan son dərəcə qətiyyətli, prinsipial şəxsiyyətdir və arxasında xalq dayanır. O cümlədən, yenilməz orduya malikdir. Prezident söylədi ki, Ermənistanda yenə də revanşist qüvvələr var. Onları beynəlxalq aləmdə dəstəkləyənlər var. Ancaq necə ki, İkinci Qarabağ müharibəsi zamanı bu dəstək heç bir nəticə vermədi, bundan sonra da bunun hansısa effekti olmayacaq. Çünki Azərbaycanın işi haqq işidir. Azərbaycan öz ərazi bütövlüyünü bərpa edib. Bundan sonra regionda əməkdaşlıq mühitinin formalaşdırılmasını istəyir. O baxımdan heç bir xarici təhdid bizi dayandıra bilməz. Ölkə hüdudları kənarından təhdid olarsa, Ermənistana daha sərt cavab veriləcək. İrəvan KTMT üzvü olması ilə öyünməsin. Çünki bu təşkilatın üzvlərinin mütləq əksəriyyəti Azərbaycanla dost dövlətlərdir. Vətən müharibəsi gedişatında bunu bir daha gördük. Yəni, KTMT neytral mövqedə dayandı və Ermənistanın ümidləri puç oldu”.
Bu baxımdan millət vəkili hesab edir ki, Ermənistan ciddi nəticə çıxarmalıdır.
Vidadi ORDAHALLI
