Ermənistan Azərbaycanla sülh sazişi imzalamağa hazırdır. Bu sözləri Ermənistan Baş naziri Nikol Paşinyan onlayn rejimdə baş tutan mətbuat konfransında deyib: “Əlbəttə, biz bu mövzuda danışıqlara başlamağa və sülh müqaviləsini imzalamağa hazırıq. Bu yaxınlarda ATƏT-in Minsk Qrupunun həmsədrləri danışıqlar üçün gündəlik təklif etmişdilər ki, onun bəndlərindən biri də hərtərəfli sülh yolu ilə nizamlanma məsələsi idi. Bəli, biz bunda maraqlıyıq”.
Xatırladaq ki, Rusiya prezidenti Vladimir Putinin təşəbbüsü ilə dekabrın 28-də Sankt-Peterburqda Müstəqil Dövlətlər Birliyinə üzv dövlətlərin rəhbərlərinin ənənəvi qeyri-rəsmi görüşü keçiriləcək. Onlayn mətbuat konfransı zamanı jurnalistin, sammit zamanı Ermənistan və Azərbaycan liderlərinin görüşünün baş tutub-tutmayacağı sualına Paşinyanın cavabı belə olub:
“Bəli, iştirak edəcəm. Amma hazırda rəsmi ikitərəfli görüş təklifi yoxdur, lakin Azərbaycan prezidenti ilə mütləq təmas olacaq. Sammit qeyri-rəsmi olduğu üçün bütün təmaslar qeyri-rəsmi olacaq, lakin ünsiyyət mütləq olacaq”.
Paşinyanın bu açıqlamasında da dərin ziddiyyət var. Bir tərəfdən deyir ki, sülh sazişini imzalamağa hazırdır. Digər tərəfdən isə Minsk qrupunun şərtlərindən danışır. Həmsədrlərin başlıca şərti Qarabağdakı ermənilərə statusun verilməsilə bağlıdır. Bu təklifi də Azərbaycan birmənalı olaraq rədd edir. Onda Paşinyan bu ziddiyyətin fonunda hansı sülh sazişindən danışır?
Politoloq Rəşad Bayramov “Bakı-Xəbər”ə açıqlamasında bildirdi ki, sülh sazişinin imzalanması haqda danışmaq asandır, amma ona imza atmaq elə də asan deyil:
“Ermənistanda da bu barədə çox danışılır - həm Paşinyan tərəfdarları, həm onun əleyhdarları saziş haqda öz mənafelərinə uyğun şərhlər verirlər.
İki ölkə rəhbərliyinin artan təmasları, intensivləşən görüşləri müəyyən ümid verir, amma qarşıda hələ uzun bir yol olduğunu bilməliyik.
Sülh sazişi sadə bir sənəd deyil. Müəyyənləşməyən, həllini gözləyən o qədər məsələlər var ki, bunları oturub danışmaq, razılaşdırmaq uzun müddət apara bilər. Sərhədlərin delimitasiyası və demarkasiyası asan deyil. Ermənistan-Azərbaycan arasında müharibə Qarabağa görə başlayıb. Bu səbəbdən də Paşinyan həmin mövzuda tam da geriyə addım ata bilmir.
Sülh sazişini təkcə erməni ictimai rəyi həll etmir, bunun üçün dünya erməni lobbisinin, hətta erməni terror təşkilatlarının razılığını almaq lazım gələcək. 100 illik torpaq iddialarının üstündən xətt çəkəcək. Bu səbəbdən də Paşinyan belə bəhanələri ortaya ataraq, prosesi uzadır. Çıxış yolları da qalmayıb. İmzalayacaqlar, ancaq ictimai rəyi buna hazırlaya-hazırlaya. Bu da bir qədər vaxt aparacaq. O səbəbdən Paşinyan sülh sazişinə doğru addım-addım getmək xəttini seçib. Bu məsələ zatən ağır danışıqlar, zəhmət tələb edən işdir”.
Məhəmmədəli QƏRİBLİ
