Fransa prezidentliyinə namizəd Valeri Pekressin Azərbaycanın Qarabağ bölgəsinə gizli səfəri Rusiya sülhməramlı kontingentinin fəaliyyəti ilə bağlı sualların ortaya çıxmasına səbəb olub. Həmin qanunsuz səfəri tənqid edənlər hesab edirlər ki, bunun başlıca məsuliyyəti Rusiya sülhməramlılarının üzərinə düşür.
Səfərə etiraz edənlərin sırasında Milli Məclisin Azərbaycan-Fransa Parlamentlərarası əlaqələr üzrə işçi qrupunun rəhbəri, deputat Soltan Məmmədov da var. Ancaq bu deputatın etdiyi etirazın mızmununda çox maraqlı detala rast gəldik.
Onun sözlərinə görə, V.Pekressin Rusiya sülhməramlılarının müvəqqəti yerləşdirildiyi Azərbaycan ərazilərinə qanunsuz səfəri regionda sülhün və təhlükəsizliyin təmin olunması istiqamətində beynəlxalq birliyin göstərdiyi təşəbbüslərin ruhuna ziddir: "Bu fakt bir daha onu göstərir ki, Fransada bəzi siyasətçilər erməni lobbisinin təsiri altında qərarlar qəbul edir".
Fransanın ATƏT-in Minsk Qrupunun həmsədri olduğunu xatırladan deputat vurğulayıb ki, Vətən müharibəsi dövründə bu ölkənin nümayiş etdirdiyi mövqe Azərbaycan-Fransa münasibətlərində etimadın xeyli dərəcədə sarsılmasına səbəb olmuşdu: “Biz həm müharibə dövründə, həm də müharibədən sonra Fransada atılan addımların, Milli Assambleyada və Senatda qəbul edilən qərəzli qətnamalərin iki ölkə arasında münasibətlərə nə qədər ciddi təsir göstərdiyinin şahidi olduq. Müharibədən sonra da, təəssüf ki, Fransanın bəzi siyasətçiləri kifayət qədər qeyri-obyektiv, ədalətsiz mövqe nümayiş etdirməyə davam etdilər. Lakin son dövrlərdə müəyyən pozitiv məqamlar nəzərə çarpırdı. Bu həm Fransa Prezidentinin Azərbaycan və Ermənistan rəhbərləri arasında qeyri-formal görüşün təşkili ilə bağlı təşəbbüsündə, həm də Fransa hökumətinin işğaldan azad olunmuş ərazilərin minalardan təmizlənməsi prosesinə töhfə vermək səylərində özünü göstərirdi”.
S.Məmmədov V.Pekressin səfərinin qeyri-rəsmi şəkildə həyata keçirildiyini qeyd edib: "Bu addım ilk növbədə Fransada erməni lobbisi və diasporunun dəstəyini almağa hesablanıb. Fransada prezidentliyə namizədlər erməni icmasından maksimum faydalanmağa çalışır. Lakin istənilən halda, heç bir namizədin seçki kampaniyası başqa dövlətlərin ərazi bütövlüyünə, suverenliyinə, beynəlxalq hüquqa, öz ölkəsinin üzərinə götürdüyü öhdəliklərə hörmətsizlik elementləri daşıyan motivlərə əsaslanmamalıdır”.
Əslində Milli Məclisin Azərbaycan-Fransa Parlamentlərarası əlaqələr üzrə işçi qrupunun rəhbəri kimi Soltan Məmmədov daha sərt danışmalıydı. Çünki Fransanın açıq ermənipərəst siyasətini ifşa etmək ilk növbədə onun vəzifə borcudur. Ancaq biz görürük ku, Soltan Məmmədov sanki Makrondan ehtiyat edən kimi davranır. Hardasa Fransanı malalamağa çalışır. Səfərin Fransanın rəsmi dairələrinə heç bir aidiyyətinin olmadığını deyir. Sonra Fransanın Aərbaycana yönəlik siyasətində pozitiv məqamların nəzərə çarpdığını deyir və bu xüsusda iki faktoru qabardır. Həmin amillər Fransanın bizə qarşı nisbətən obyektiv davrandığını söyləmək üçün heç bir ciddi əsasa malik deyil. Yox, əgər Soltan Məmmədov Makronun Azərbaycan dilində yazdığı tviti əsas götürürsə, bu da yersiz arqumentdir. Çünki ardınca Makron bir dənə də ermənicə tvit yazdı və ermənilərə olan rəğbətini açıq ifadə etdi. Hətta erməni olduğunu və həmin milləti tək buraxmayacağını da dedi. Belə olan halda Soltan Məmmədov niyə Azərbaycan cəmiyyətini, onun ictimai rəyini aldatmağa cəhd edir?
Fransa ermənilərin Qarabağla bağlı mövqeyində açıq dəstəkçi bir ölkə kimi görsənir: “SSRİ dönəmində Qorbaçovun erməni əsilli müşaviri gedib Fransada Qarabağın Ermənistana birləşdirilməsi təklifini irəli sürdü. Bununla da Qarabağ konflikti başladı. Son 30 ildə Fransanın mövqeyi heç vaxt pozitiv olmayıb, hər zaman ermənipərəstliyi ilə seçilib. Həm də sülh və stabilliyə təhdid olub. Parisin Ermənistanı bu şəkildə dəstəkləməsi heç İrəvanın özünə də müsbət nəsə vəd etməyib. Bundan sonra da nəsə qazana bilməyəcəklər. Fransa Azərbaycana münasibətdə hər zaman qərəzli olub. Heç son vaxtlar da Fransanın Azərbatcana yönəlik heç bir pozitiv mesajı olmayıb. Qarabağla bağlı məsələdə Fransa Ermənistanı açıq dəstəklədiyini heç vaxt gizlətməyib. Minalanmış ərazilərlə bağlı mövqeyi də səmimi deyil. Onlar bunu həm də Qarabağda ermənilərin yaşadığı ərazilərdə həyata keçirmək istəyirlər. Fransa Minsk Qrupunun həmsədri kimi müharibədən əvvəl, onun gedişində və ümumilikdə postmüharibə dönəmində hər zaman qeyri-obyektiv olub. Hər zaman Ermənistan təbliğat maşınının hazırladığı tezisləri səsləndirib. Biz Fransanı birmənalı olaraq beynəlxalq hüquqa hörmət etməyə dəvət etməliyik”.
Məhəmmədəli QƏRİBLİ
