Bu gün Azərbaycan Prezidenti İlham Əliyevin doğum günüdür. Prezident eyni zamanda 60 illik yubileyini qeyd edir. Bu ömrün 18 ilini o, Azərbaycana rəhbərliyə sərf edib. Bu illər ərzində Prezident, bütün sahələrdə olduğu kimi, ictimai və dövlət maraqlarının qorunması istiqamətində də olduqca ciddi addımlar atlb. Müxtəlif sahələr üzrə əldə olunan bu nailiyyətlərə verilən toplu qiymət Prezidentin mükəmməl bir liderlik obrazını gözümüzün önündə cəmləşdirir.
Prezident İlham Əliyev ictimai və dövlət maraqlarını münasibətləri yüksək peşəkarlıqla tənzimləmək, idarə etmək qabiliyyətinə malikdir və qəbul etdiyi qərarların, yerinə yetirdiyi vəzifələrin əhəmiyyəti ona həm yerli, həm də beynəlxalq ictimai rəydə böyük nüfuz qazandırır. Azərbaycan Prezidenti yeniliyin, ümumbəşəri dəyərlərin və təcrübənin ictimai həyatda tətbiqinin fəal tərəfdarı kimi çıxış edən islahatçı Liderdir. Onun apardığı məqsədyönlü siyasətin nəticəsində Azərbaycan davamlı inkişaf yolu ilə irəliləyir. Son 18 il ərzində Azərbaycan dövlətinin bütün sahələrində əldə olunan tarixi nailiyyətlərinin əsasında Prezident İlham Əliyevin yüksək liderlik keyfiyyətləri dayanır.
Azərbaycan xalqının öz liderinə böyük inam və etimadı var
Tarixi təcrübələrə görə, ictimai proseslərə ciddi təsir göstərən amillər içərisində şəxsiyyətin fəaliyyəti mühüm tutur və xalqın maraqları onun vasitəsilə təcəssüm edir. Mütərəqqi şəxsiyyətlə tarix arasındakı qarşılıqlı əlaqə, onların bir-birinə təsiri cəmiyyətin inkişafına təkan verir. Eyni zamanda, ictimai-siyasi qüvvənin aparıcı mövqe tutması ona rəhbərlik edən şəxsiyyətin yüksək liderlik keyfiyyətlərindən irəli gəlir. Bu aspektdən yanaşsaq görərik ki, Azərbaycan dövlətinin tərəqqisinin əsasında Prezident İlham Əliyevin görkəmli şəxsiyyət və lider kimi ümummilli maraqlara söykənən vəzifələri uğurla yerinə yetirməsi dayanır. Müxtəlif illərdə keçirilmiş prezident seçkilərində Prezident İlham Əliyevin böyük səs çoxluğu ilə qələbə qazanması Azərbaycan xalqının öz liderinə böyük inam və etimadından irəli gəlir.
Əhalinin sosial müdafiəsinin təmin olunması və insan kapitalının inkişafı Prezident İlham Əliyevin apardığı siyasətin prioritet istiqamətlərindən birini təşkil edir. Bundan irəli gələrək, ölkə vətəndaşlarının layiqli həyat səviyyəsinin təmin edilməsi və əhalinin azgəlirli təbəqəsinin sosial-iqtisadi rifahının yüksəldilməsi istiqamətində mühüm addımlar atılır. Əhalinin gəlirlərinin artırılması və minimum əməkhaqqının ölkə üzrə yaşayış minimumuna çatdırılması istiqamətində məqsədyönlü dövlət siyasəti həyata keçirilir.
Xalqın tərəqqisi ona rəhbərlik edən şəxsiyyətin bilik və bacarığından çox asılıdır
Prezident İlham Əliyevin siyasətinin əsas istiqamətlərindən birini xalqımızın qədim və zəngin milli-mənəvi dəyərlərinin qorunub saxlanılaraq gələcək nəsillərə ötürülməsi təşkil edir. Ölkəmizdə mövcud olan tolerant və multikultural mühit dini-mədəni müxtəlifliyin qorunması, dünyəvi dövlət-din modelinin möhkəmlənməsi üçün əlverişli şərait yaradır. Azərbaycanın dünyaya multikulturalizmin inkişaf etdiyi dövlət kimi tanıdılması sahəsində mühüm işlər görülür.
Dövlət başçısının yüksək liderlik və hərbi sərkərdəlik keyfiyyətləri Vətən müharibəsində bir daha özünü göstərdi. Müharibədə xalqımız Prezident İlham Əliyevin Müzəffər Ali Baş Komandan kimi prinsipial mövqeyinin, uzaqgörən diplomatiya yürütdüyünün şahidi oldu. Prezident İlham Əliyevin rəhbərliyi ilə Azərbaycanın əldə etdiyi nailiyyətlər və beynəlxalq arenadakı böyük nüfuzu, xalq-iqtidar birliyi Vətən müharibəsində qələbəni şərtləndirən vacib amillərdən oldu.
Azərbaycan Prezidenti İlham Əliyev bütün dünya azərbaycanlılarının lideri olduğunu onların ən böyük arzusunu həyata keçirməklə təsdiq etdi. Hakimiyyətdə olduğu illərdə dövlətimizin başçısı nəinki Azərbaycanı regionun liderinə çevirdi, həmçinin işğal altında olan torpaqları düşmən tapdağından azad etdi.
Göstərilənlərin ümumiləşdirilməsi sübut edir ki, Azərbaycanın tərəqqisi, xalqımızın sülh və əminamanlıq şəraitində yaşaması Prezident İlham Əliyevin fenomenal şəxsiyyət kimi yüksək liderlik keyfiyyətləri ilə bağlıdır.
Yaxın tariximizin-XX əsrin son onilliyinin acı təcrübəsi göstərdi ki, xalqın tərəqqisi ona rəhbərlik edən şəxsiyyətin bilik və bacarığından, siyasi gedişlərindən, diplomatik manevrlərindən, ən əsası isə-böyük Vətən sevgisindən çox asılıdır. Ulu öndər Heydər Əliyevin 1993-cü ilin 15 iyununda ölkə rəhbərliyinə təkrar qayıdışı ölkəni xaos və qarmaqarışıqlıqdan, parçalanmadan, separatizm caynağından xilas etdi. Onun müdrik siyasətinin layiqli davamçısı isə oğlu İlham Əliyev oldu. Fürsətdən istifadə edib, cənab Prezidenti 60 illik yubileyi münasibətilə ürəkdən təbrik edirik.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
