Rusiyanın Çeçenistan Respublikasının başçısı, II Çeçen müharibəsində Rusiyanın tərəfində döyüşmüş Ramzan Kadırov Türkiyənin Kocaeli rayonunda Cövhər Dudayev Parkının açılmasına etirazını bildirərək, Türkiyəyə qarşı çirkin təhdidlər edib. Cövhər Dudayev Çeçenistanın ilk prezidenti və ölkəsinin Rusiyadan ayrılması uğrunda həyatını qurban vermiş şəhiddir.
Kadırov sosial şəbəkələrdə açıqlama verərək, Türkiyə dövlətini və onun Prezidenti R.T.Ərdoğanı “terrorçuları dəstəkləməkdə” ittiham edib.
Kadırov buna cavab olaraq, Ərdoğanı PKK terrorçularının başçısı, hazırda həbsdə olan A.Öcalana heykəl qoymaqla təhdid edib: “Türkiyə həbsxanalarından birində ömürlük həbs cəzası çəkən Abdullah Öcalanın adını Qroznıda əbədiləşdirmək bizim tərəfimizdən çox məntiqli və siyasi cavab olardı”.
1994-cü il dekabrın 11-də Rusiyanın Çeçenstana qarşı hərbi əməliyyatına cavab olaraq cihad elan edən və 1996-cı il aprelin 21-də cəbhədə şəhid olan Dudayev Türkiyəni türk dünyasının və islam aləminin ümid işığı adlandırmışdı: “Yaddan çıxarmayın ki, Türkiyə həm türk dünyasının, həm də islam aləminin ümid işığıdır. Bu işığın sönməsi həm islam aləminin, həm də türk dünyasının qaranlıqda qalması demək olar”.
Ramzan Kadırovun Öcalanla Dudayevə eyni gözdə baxması nə dərəcədə məntiqli görünə bilər?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, Türkiyədə Çeçenistan azadlıq lideri adına parkın açılması rəsmi Moskvanı qəzəbləndirib: ”Rusiya Xarici İşlər Nazirliyinin rəsmi nümayəndəsi Mariya Zaxarova Türkiyəni “Çeçenistandakı separatçı hərəkatın lideri”nə abidə qoyulması, yerli hakimiyyətin Dudayevi azadlıq uğrunda mübarizənin simvolu adlandırmasına görə qınayıb”. Rusiya rəsmisi terrorçuların abidələri ilə bağlı Rusiyanın prinsipial mövqe tutduğunu vurğulayıb. Maraqlıdır, Rusiya rəsmiləri Ermənistanda və Qarabağın Xocavənd rayonunda SSRİ-yə qarşı vuruşmuş faşist cəlladı Qaregin Njdenin ucaldılan heykəllərinə və eləcə də onu ucaldanlara qarşı niyə belə mövqe sərgiləmədi? Kadırov özünün deyil, Rusiyanın mövqeyini ifadə edir. Rusiya görür ki, Türkiyə get-gedə Cənubi Qafqazda öz mövqeyini gücləndirir. Artıq Ermənistanla da sərhədlərin açıla biləcəyinə dair söhbətlər gedir. Bundan sonra Türkiyənin Orta Asiyaya yolu açılır. Eyni zamanda Rusiyanın daxilində yaşayan bir çox türkdilli toplumlarla əlaqə yaxınlaşır. Bunu Rusiya dərk edir. Bu səbəbdən də Kadırovun dili ilə Türkiyəni şantaj edir. Əslində həmin parkı Türkiyə hökuməti deyil, yerli bələdiyyə açıb. Türkiyədə bələdiyyələr çox sərbəstdir. Ancaq Rusiya bunu özünə qarşı bir təxribat cəhdi kimi qiymətləndirir. Türkiyənin özündə çeçen mənşəli güclü diaspor var. Ola bilər ki, bu məsələ onların təşəbbüsü ilə baş tutub. Kadırovun bu məsələyə reaksiyanı Öcalan amili ilə verməsini Rusiyanın konkret mövqeyinin ifadəsi saya bilərik. Putinlə görüşdə bir rejissor dedi ki, Rusiya Şimali Qafqazdan əlini çəkməlidir. Rusiyanın öz daxilindən belə fikirlər səslənirsə, deməli, yeni bir dalğa gəlir. Hesab edirəm ki, Kadırov dediyinə əməl etmək gücündə olan adam deyil. Türkiyə sıradan bir ölkə deyil. Hər halda bu məsələ dəqiqləşdiriləcək. Krımı Rusiya ilhaq etdi. Həmin istiqamətdə olan narazı qüvvələrin çoxu Türkiyədə yerləşir. Dövlətlərarası münasibətlərdə emosiyalara yol vermək olmaz. Rusiya Kadırovu yerinə oturtmalı, ona soyuqqanlı olmağı tövsiyə etməlidir. Əks təqdirdə, Türkiyə də adekvat addımlar ata bilər. Tarixi dəyərləndirmə baxımından da, Dudayevlə Öcalan eyni tərəziyə qoyulası adamlar deyil”.
Məhəmmədəli QƏRİBLİ
