Ermənistan rəhbərliyi bir tərəfdən Türkiyə ilə münasibətlərin normallaşmasının, sərhədlərin, yolların açılmasının vacibliyindən danışır, o biri tərəfdən prezident Armen Sarkisyan prosesi baltalayan açıqlamalarla çıxış edib.
Məsələ ondadır ki, prezident A.Sarkisyan “Asia Times” qəzetinə müsahibəsində çox ziddiyətli fikirlər səsləndirib. Türkiyəni bir sıra məsələlərdə ittiham edib. Həmçinin qeyd edib ki, Ermənistanla Türkiyə arasında münasibətlərin normallaşması mürəkkəb məsələdir: “Ermənistan və Türkiyənin əlaqələrinin böyük tarixi yoxdur. Osmanlı İmperiyasında olan ermənilərlə, Türkiyədəki ermənilərlə uzun tariximiz var, amma Ermənistan-Türkiyə əlaələrinin tarixi qısadır. 1920-ci ildə birinci Ermənistan Respublikası ilə Türkiyə arasında müharibə olub. Münasibətlərin ikinci hissəsi SSRİ dağılandan sonra üçüncü Ermənistan Respublikasının elan edildiyi 1991-ci ilə aiddir. Bu gün iki ölkə arasında heç bir münasibət yoxdur”
Daha sonra A.Sarkisyan dozanı bir qədər də artıraraq bunları deyib: “Qarabağ problemi tam həll olunmamış Türkiyə və Ermənistan yaxınlaşmağa başladı. Ermənistanla Azərbaycan arasında müharibə davam edərkən, Azərbaycan və Türkiyə qardaş xalq olduqlarını bəyan edərkən Türkiyə Ermənistanla münasibətlərini necə normallaşdıra bilər, kimsə bunu sübut edə və ya mənə izah edə bilər? Ermənistanla Azərbaycan arasında münasibətlər normallaşmadığı halda Azərbaycan niyə Ermənistan və Türkiyə arasında münasibətlərin normallaşmasına razı olsun? Bu prosesdə dördüncü oyunçu var, o dördüncü oyunçu isə erməni millətidir. 1915-ci ildə baş verənlərdən sonra heç bir prezident bu insanların, öldürülən və ya sağ qalan nənə və babaların adından danışıqları davam etdirə bilməz. Ona görə də Türkiyə ilə danışıqlara başlamazdan əvvəl Ermənistan dövləti ilə diaspor arasında dialoq olmalıdı”.
Bütün bunlar onu göstərir ki, Ermənistanın son vaxtlar Türkiyə ilə bağlı sərgilədiyi siyasət səmimi deyil. O baxımdan bunu ekspertlər necə dəyərləndirir?
“Ermənistanda siyasi idarəetmə stabil deyil və mərkəzdənqaçma meylləri yüksəkdir”
Məsələyə münasibət bildirən politoloq Tural İsmayılov hesab edir ki, bu cür ziddiyətli açıqlamalar səslənsə də, Ermənistanın Türkiyə ilə münasibətləri normallaşdırmaqdan başqa yolu qalmayıb: “Ermənistan hakimiyyətində təmsil olunan siyasi qüvvələr də tək çıxış yolunun Azərbaycan və Türkiyə ilə münasibətləri normallaşdırmaqdan keçdiyini çox yaxşı bilirlər. Ancaq iş ondadır ki, Ermənistan daxilində ikitirəlik hökm sürür. Ölkədə prezidentlə baş nazirə bağlı olan kadrlar arasında ixtilaflar var. O cümlədən, Ermənistanda klanlararası mübarizə gedir. İndiki şəraitdə, konstitusiyaya görə, danışıqları baş nazir və onun komandası aparmaq səlahiyyətinə malikdir. Məlum olduğu kimi, prezident Armen Sarkisyan Paşinyana qarşı olan bir şəxsdir. Ancaq səlahiyyətləri məhdud olduğuna görə çox şey edə bilmir. Buna rəğmən, A.Sarkisyan ziddiyətli açıqlamalar verməklə, narazı elektorat hesabına özünə divident toplamağa çalışır. Çünki yaxşı bilir ki, proses uğurla gedərsə, bu, Paşinyanın xeyrinə işləyəcək. Nəticədə revanşistlərin planları pozulacaq. O üzdən, A.Sarkisyan Ermənistan-Türkiyə münasibətlərinin düzəlməsini idbarcasına hədəf alır. Ancaq düşünmürəm ki, A.Sarkistanın ziddiyətli açıqlamaları prosesi tormozlaya bilsin. Ümumilikdə, A.Sarkisyanla Paşinyan arasında münasibətlər hər zaman kəskin olub. Hətta 44 günlük müharibə dövründə belə, bir-birini təkzib edən açıqlamalarla çıxış edirdilər”.
Politoloqun fikrincə, bütün bunlar onu göstərir ki, Ermənistanda siyasi idarəetmə stabil deyil və mərkəzdənqaçma meylləri yüksəkdir.
Vidadi ORDAHALLI
