Erməni separatçılarına həsr olunan iki filmin “Oskar”ın siyahısına daxil edilməməsi erməniləri və onların havadarlarını möhkəm pərişan edib.
Məlumatlara görə, Azərbaycanın Qarabağ bölgəsindəki erməni separatçı-terrorçu rejiminin tör-töküntülərindən bəhs edən iki filmin Amerika Kino Akademiyasının “Oskar” mükafatına namizədlər siyahısına daxil edilməsi üçün göstərilən cəhdlər tamamilə uğursuzluğa düçar olub, komissiya filmləri qəbul etməyib. “Novosti Armeniya”nın yaydığı məlumata görə, müsabiqədə nominasiyalar üzrə mübarizə aparacaq ekran əsərləri arasında ermənilərdən həbs edən kinolar olmayacaq.
Qeyd edək ki, “Oskar”a namizəd olan filmlərdən birinin rejissoru erməni əsilli Nora Martirosyandır, onun çəkdiyi “Külək sakitləşəndə” adlı film yarışmadan kənarda qalıb. “Oskar”a daxil edilməsindən imtina edilən ikinci film isə britaniyalı jurnalist Emil Qessenin lentə aldığı məlum “45 gün: Millət uğrunda mübarizə” adlı sənədli “film”idir ki, bu barədə də “Bakı-Xəbər”in keçən saylarından birində bəhs etmişik.
Ermənişünas Aynur Əzimzadə bizimlə söhbətində bldirdi ki, əslində Amerika Kino Akademiyasının belə bir addım atacağı istisna edilmirdi. Ekspertin sözlərinə görə, bu onunla bağlıdır ki, artıq dünya ermənilərin saxtakarlıqlarından bezib. Onun dediyinə görə, bir neçə il əvvəl də erməni lobbisinin dəstəyi ilə amerikalı erməni əsilli rejissor Atom Eqoyanın çəkdiyi qondarma “erməni soyqırımı”ndan bəhs edən “Ararat” filmi “Oskar”a namizədlər siyahısından çıxarılmışdı. O deyir ki, illər əvvəl Eqoyan tərəfindən qondarma “soyqırımı” mövzusunda Kanada studiyalarında çəkilən və təbliğat baxımından böyük ümid bəslənilən “Ararat” bədii filminin erməniləri məyus etməsi faktdır və indi də daha iki film rədd edilib, qapıdan çölə atılıb. “Ermənilər çox ümid edirdilər ki, Azərbaycanın Qarabağ bölgəsində yaşayan separatçı tör-töküntüsünün “mübarizə”sindən bəhs edən filmlərini, xahiş-minnətlə də olsa, Amerika Kino Akademiyasının “Oskar” mükafatına namizədlər siyahısına daxil etməyə nail olacaqlar. Amma gördüyünüz kimi, onlar buna nail ola bilmədilər. Ermənilərin bu qondarma məsələlərlə bağlı çəkdiyi filmlər indiyə qədər heç bir yüksək kateqoriyalı film festivalına gedib çıxa bilməyib. Sadəcə, namizəd kimi göstərilib, ətrafında süni ajiotaj yaradılıb, sonda isə film festivallara qəbul edilməyib. Qarabağda yaşayan separatçılardan bəhs edən “film”lər əsasən erməni lobbisinin təsiri altında olan kiçik və məhəlli xarakter daşıyan festivallarda yer tutur, yoxsa böyük kino festivallarında onlara yer verilmir”.
Sonuncu iki filmin kənarda qalmasının səbəblərini şərh edərkən mütəxəssis dedi ki, burda bir neçə məqam var. Bu məqamlardan biri odur ki, dünya həqiqəti qəbul edir və Azərbaycanın öz ərazilərini işğaldan azad etdiyi faktını tanıyır. “Ermənilər son 30 ildə Qarabağın “erməni ərazisi” olduğunu “sübut” etmək üçün saysız sənədli və bədii film çəkiblər. Özü də ki, bu filmlərin çəkilişlərinə əsasən xarici rejissor və kinokompaniyaları cəlb ediblər. Səbəb də bu olub ki, ABŞ, Avropa rejissorlarının, kino kompaniyalarının vasitəsilə öz yalanlarını kino vasitəsilə insanların beyninə yeritsinlər. Amma görürsünüz ki, heç nəyə nail ola bilmirlər. Erməni kinosunun “Oskar”ın qapısından qovulmasının səbəblərindən biri də odur ki, dünya artıq həqiqəti bilir. Dünya yaxşı dərk edir ki, Azərbaycanın Qarabağ bölgəsinin müəyyən bir hissəsində yaşayan ermənilər orada nə işlə məşğul olurlar. Separatçı tör-töküntülərinin əməllərini bilənlər artıq ermənilərə qarşı bu cür davranırlar. Azərbaycanın haqq işini müdafiə edənlər də çoxdur, dünyada dövlətimizin qələbəsini tanıyan, mövqeyini dəstəkləyənlərin sayı yetərincədir. Bu səbəbdən də artıq ermənilər öz yalanlarını çox da irəliyə apara bilmirlər. Sözsüz ki, sepatçı tör-töküntülərindən bəhs edən iki filmin “Oskar”a namizədlər siyahısına daxil edilməməsi faktı ermənilərə böyük zərbə oldu. Fikrimcə, bu həm də onlara bir dərs olmalıdır ki, Azərbaycan ərazisi ilə bağlı təxribatlarını yığışdırsınlar. Əlbəttə, bir müddət əvvəl britaniyalı jurnalistin filminin “Oskar”ın namizədləri sırasına salınacağı ilə bağlı xəbər bizi ciddi narahat etmişdi və bundan çox narazı idik. Amma gördüyümüz kimi, ermənilərin niyyəti baş tutmadı. Bu onu göstərir ki, beynəlxalq kino ictimaiyyəti daha ermənilərin uydurmalarına, nağıllarına qulaq asmır” - deyə ekspert bildirdi.
İradə SARIYEVA
