AXCP fəalı Saleh Rüstəmovun həbsxanada aclıq aksiyasını davam etdirdiyi bildirilir. Onun təmsilçisi olduğu radikal müxalif düşərgə hakimiyyətdən bu şəxsin dərhal azad edilməsini tələb edir. Hətta bu kampaniyaya beynəlxalq dairələri də qoşublar. 29 il bundan əvvəl bir neçə ay icra başçısı işləyən, sonra isə xırda ticarətlə məşğul olan şəxslə bağlı kampaniya kiminsə azadlığa buraxılmağından daha çox hakimiyyətə təzyiq metodu kimi görünür.
Maraqlıdır ki, 2019-cu ilin 27 fevralında cəza alan bu şəxs 2021-ci ilin noyabrında aclıq aksiyası keçirib azad olunmasını istəyir. Bəs, cəza alanda niyə etiraz etmirdi? Nə baş verdi ki, 2,8 ildən sonra qəfil aclıq etmək qərarına gəldi? Nə baş verdi ki, ölkədən xaricdə mənzillənənlər onun müdafiəsi üçün bu qədər “böyük kampaniya” qurdular, ATƏT-ə, Dövlət Departamentinə qədər bu məsələ uzandı? Tiflisdən Saakaşvilinin azad olunmasını tələb etməyən bəzi dairələr necə olur Azərbaycandan konkret cinayətə görə həbs edilən, cəmi iki cüt-bir tək adamın "aksiya ilə dəstəklədiyi" şəxsin azad olunmasını istəyir? Əslində Saleh Rüstəmov kimi dünənə qədər tanımadığımız və sabah dərhal unudacağımız bir şəxsin türmədə qalması və bunu kimlərinsə əlində bəhanə etməsinə qətiyyən ehtiyac yoxdur. Ancaq bunun üçün hakimiyyətdən humanizm istənilməlidir, onunla ultimativ dildə danışmaqla kiminsə azadlığına nail olmaq mümkün deyil. Bu adamdan milli qəhrəman düzəltmək və ondan kimlərinsə istifadə etməsinə şans tanımaq qətiyyən dövlət maraqlarımıza cavab vermir. Ancaq aparılan kampaniyadan görünən budur ki, Saleh Rüstəmovun həbsdə saxlanmasına elə onun silahdaşları səbəb olur. “Dərhal azad edilməlidir!” tələbi ilə onun azad olunması taktikası doğrudurmu?
Hüquqşunas Mehman Muradlı “Bakı-Xəbər”ə bildirdi ki, bu düzgün taktika deyil: “Söhbət hüquqi prosesdən gedirsə, mütləq mənada hüquqi prosedurlara uyğun tələblər irəli sürülməlidir. Saleh Rüstəmovun günahı sübuta yetirildiyi üçün onun barəsində ittiham hökmü çıxarılıb və o müəyyən müddətə azadlıqdan məhrum olunub. Bu kateqoriyadan olan şəxsin cəzadan azad edilməsi üçün bir neçə hüquqi prosedur var. Məsələn, şəxs hökmdən daha yuxarı instansiya məhkəmələrinə müraciət edə bilər. Həmçinin Prokurorluq protest verib, işə yenidən baxılmasını tələb edə bilər. Eyni zamanda, həmin şəxsin əfv ərizəsilə Prezidentə müraciət etməsi mümkündür. Bütün bu sadalanan hüquqi prosedurların sonu şəxsin cəzasının azadılması və ya başqa cəza növü ilə əvəz edilib, azadlığa çıxması ilə nəticələnə bilər. Amma maraqlıdır ki, Saleh Rüstəmovun tərəfdarları yalnız siyasi təzyiq və ultimatum yolunu seçirlər. Dövlətlə belə dildə danışmağın isə effekti olan deyil. Çünki hər hədəyə və ya aclıq aksiyasına görə adamları həbsdən buraxsalar, türmədə adam qalmaz ki. Hesab edirəm, bu cür səhv taktika ilə tərəfdarları Saleh Rüstəmovun həbsdəki günlərinin sayını daha da artırırlar”.
Məhəmmədəli QƏRİBLİ
