“Regional nəqliyyat əlaqələrinin inteqrasiyası həqiqətən də region üçün böyük imkandır”. Bunu Prezident İlham Əliyev Brüsseldə NATO-nun baş katibi Yens Stoltenberqlə birgə mətbuat konfransı zamanı deyib.
Ölkə başçısının sözlərinə görə, Zəngəzur dəhlizi təkcə bizim Naxçıvan Muxtar Respublikasına çıxış əldə etməyimiz üçün deyil: “Həm də Ermənistanın Naxçıvan Muxtar Respublikası vasitəsilə İranla dəmir yolu əlaqəsi üçündür. Bununla, həmçinin Ermənistan da Naxçıvan Muxtar Respublikası vasitəsilə İranla dəmir yolu əlaqəsi əldə edir. Ermənistan Azərbaycan ərazisindən Rusiya ilə dəmir yolu əlaqəsi əldə edir. Bu gün onların belə bir dəmir yolu əlaqəsi yoxdur. Bu, regionda həqiqətən müsbət ab-hava yarada bilər və bu hər kəsin xeyrinə olacaqdır. Hesab edirəm ki, bu imkanların düzgün dəyərləndirilməsi dinc gələcəyimizin planlaşdırılması baxımından olduqca vacibdir. Bir daha qeyd edirəm, biz hazırıq. Biz artıq bir neçə dəfə ictimai şəkildə bəyanatlar vermişik ki, biz düşmənçilik səhifəsini çevirərək sülh sazişi üzərində çalışmaq istəyirik”.
Görünən odur ki, Brüsseldə bir daha Ermənistana vəziyyətdən ən optimal çıxış yolu göstərildi. İndi əsas məsələ odur ki, qarşı tərəf bunu düzgün dəyərləndirsin.
“Bu baxımdan çıxış yolu Azərbaycanla razılaşmaqdan keçir”
Məsələyə münasibət bildirən ekspert Rəsul Cahangirlinin fikrincə, bir sıra məsələlər bir-biri ilə sıx bağlı olduğuna görə Ermənistan ortaya siyasi iradə qoymalıdır: “Yolların, nəqliyyat dəhlizlərinin açılması ilə əlaqədar ilk növbədə tərəflər arasında sülh bərqərar olunmalıdır. Azərbaycan və Ermənistan arasında sülh şifahi razılaşmalarla deyil, müvafiq sənədlərlə tənzimlənməlidir. Prezident doğru olaraq qeyd etdi ki, nəqliyyat əlaqələrinin qurulması bütün tərəflərin xeyrinə olacaq. Nə İranın, nə də Ermənistanın Gürcüstan vasitəsilə yeni dəmir yolu tikmək imkanı var. İran Şimal-Cənub Nəqliyyat Dəhlizi ilə əlaqədar Azərbaycandan böyük həcmdə kredit götürüb. Deməyim odur ki, sözügedən dəmir yolu var ikən hansısa tərəf Ermənistan üzərindən dəmir yolunun çəkilməsinə maraq göstərməz. Maliyyə imkanları böyük olan Avropa İttifaqı belə buna getməz. Ən azından ona görə ki, Azərbaycandan yan keçəcək dəmir yolu rentabelli olmayacaq. Ermənistanın həm əhalisi azdır, həm də bu ölkənin bazarı kiçikdir. Bu baxımdan Ermənistan üçün ən sərfəli variant Azərbaycan vasitəsilə İran və Rusiya ilə dəmir yolu əlaqəsi qurmaqdır. Cənubi Qafqazda daşıma xərclərinin böyük olduğu ölkə Ermənistandır. Ermənistanda daşıma xərcləri məhsulun maya dəyərinin hardasa 30 faizini təşkil edir. Bu kifayət qədər böyük rəqəmdir”.
Bu baxımdan ekspert hesab edir ki, Ermənistanın çıxış yolu Azərbaycanla razılaşmaqdan keçir.
Vidadi ORDAHALLI
