44 günlük müharibə dövründə Ermənistanın qanunsuz ianə kampaniyaları beynəlxalq konfransda ifşa edildi. Belə ki, 13-17 dekabr 2021-ci il tarixlərində Misirin Şarm Əl Şeyx şəhərində BMT-nin Korrupsiya əleyhinə Konvensiyasına tərəf dövlətlərin Konfransının 9-cu sessiyası keçirilir və Ermənistanın növbəti dəfə ifşa edilməsi hadisəsi də burada baş verib.
Xarici İşlər Nazirliyindən baki-xeber.com-a verilən məlumata görə, sessiya çərçivəsində 14 dekabr 2021-ci il tarixində Azərbaycan nümayəndə heyətinin təşkilatçılığı ilə “İanə toplanması fəaliyyətlərinin korrupsiya və digər cinayətkarlıq məqsədləri üçün sui-istifadəsi” adlı xüsusi tədbir baş tutub.
Panel müzakirə formatında hibrid əsasda keçirilən tədbirdə Azərbaycan Respublikasının Baş Prokuroru Kamran Əliyev və BMT-nin Narkotiklər və Cinayətkarlıq üzrə İdarəsinin (UNODC) yüksək vəzifəli rəsmisi Tim Steele açılış nitqi ilə çıxış edib. Baş prokuror Kamran Əliyev öz çıxışında qeyri-kommersiya təşkilatları və xeyriyyə fondları tərəfindən həyata keçirilən ianə toplanması fəaliyyətinin böhran vəziyyətlərində olan insanlara humanitar dəstək istiqamətində əhəmiyyətli rol oynadığını, bununla belə, bu cür fəaliyyətlərə məhdud nəzarətin yekunda onların bəzilərinin korrupsiya, çirkli pulların yuyulması və terrorçuluğun maliyyələşdirilməsi kimi cinayətkarlıq məqsədləri üçün sui-istifadə edildiyini qeyd edib. Bu xüsusda Baş prokuror Azərbaycanın bu problemdən əziyyət çəkdiyini qeyd edərək, iştirakçıların diqqətini ötən il Vətən müharibəsi dövründə erməni diaspor təşkilatları tərəfindən təşkil edilmiş qanunsuz ianə toplanması kampaniyalarına diqqət yönəldib.
Tədbirdə BMT-nin Narkotiklər və Cinayətkarlıq İdarəsinin, Avropa Qeyri-Kommersiya Hüququ Mərkəzinin, Böyük Britaniyanın "Greenacre" Qeyri Hökumət Təşkilatının və Azərbaycan Respublikasının Maliyyə Monitorinqi Xidmətinin (MMX) mütəxəssislərinin təqdimatları dinlənilib və interaktiv müzakirələr aparılıb.
Çıxışçılar öz təqdimatlarında xeyriyyə fondları tərəfindən təşkil olunan ianə toplanması kampaniyalarından sui-istifadənin qarşısının alınması məqsədilə xüsusi qaydaların hazırlanmalı olduğunu, bəzi xeyriyyə təşkilatları tərəfindən cinayətkarlıq əməllərinin maliyyələşdirilməsi məqsədilə virtual valyutalardan və internetin nəzarətsiz seqmentindən istifadə edildiyini, bəzi bank və digər maliyyə qurumlarının bu cür fəaliyyətlərə vasitəçi olaraq alət edildiyi və digər məqamları xüsusi vurğulayıblar.
Tədbirdə çıxış edən MMX-nin nümayəndəsi Ermənistan və Azərbaycan arasında baş vermiş 44 günlük müharibə dövründə xaricdə fəaliyyət göstərən erməni diaspor təşkilatları tərəfindən 170 milyon ABŞ dolları məbləğində vəsait toplandığını və bunun 110 milyon ABŞ dolları məbləğində hissəsinin qanunsuz olaraq Ermənistan büdcəsinə köçürüldüyünü qeyd edib. Bu faktın Ermənistanın yüksək səviyyəli rəsmiləri, o cümlədən baş naziri tərəfindən də etiraf edildiyini və müxtəlif ölkələrin vətəndaşlarından humanitar yardım adı altında aldadılaraq toplanmış və Ermənistanın dövlət büdcəsinə köçürülmüş bu vəsaitin Azərbaycanın işğaldan azad edilmiş ərazilərində əvvəllər yerləşdirilmiş qanunsuz silahlı birləşmələrin silahlanmasına sərf olunduğunu qeyd edib...
“Azərbaycan rəsmi səviyyədə beynəlxalq tədbirdə Ermənistanın növbəti bir cinayətini də ifşa etdi, indi beynəlxalq təşkilatlar susmasın, bu ölkənin əməllərinə qiymət versin”
44 günlük müharibə dövründə xaricdən Ermənistana yığılan 170 milyon dollar ianəni sonradan Ermənistanın öz cinayət əməllərinə yönəltməsi faktına beynəlxalq hüquq müstəvisində qiymət verilməli olduğunu deyən “Müasir İnkişaf” Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, Ermənistanın qanunsuz ianə kampaniyalarının beynəlxalq konfransda ifşa edilməsi bu ölkənin terrorçu və cinayətkar sifətlərinin ifşa edilməsi deməkdir. “Bu faktın özünün beynəlxalq konfransda üzə çıxarılıb ifşa edilməsi Ermənistanın terrorçu mahiyyətini bir daha göstərir. Zatən, bütün fəaliyyət istiqamətləri, çalışmaları terrorla, qanunsuz mənimsəmələrlə bağlıdır, belə bir dövlətin təməlinin qoyulması özü də terrorla bağlıdır. Ermənistan bir terror dövlətidir və bunu rəsmi siyasətə çevirib. Bu baxımdan 44 günlük müharibə dövründə erməni diaspor təşkilatları tərəfindən toplanan 170 milyon ABŞ dollarının 110 milyonun Ermənistan dövlətinin terror cinayətləri naminə mənimsədiyi təəccüblü görsənmir. Təsadifi deyil ki, xaricdəki erməni diasporunun son yüz ildə diləndiyi ianələr əsasən Ermənistanın, ermənilərin terror cinayətlərinin həyata keçirilməsinə yönəlib. Ermənistan 44 günlük müharibədə də xaricdən diləndikləri vəsaiti məhz növbəti cinayətləri həyata keçirməyə yönəlib. “Daşnaksütyun”, eləcə də xaricdəki və daxildəki erməni terror təşkilatı bu cinayətləri edir. Azərbaycan rəsmi səviyyədə beynəlxalq tədbirdə Ermənistanın növbəti bir cinayətini də ifşa etdi, indi beynəlxalq təşkilatlar susmasın, bu ölkənin əməllərinə qiymət versin. İndi beynəlxalq təşkilatlar hesabat hazırlayıb orada Ermənistanın 170 milyon ABŞ dollar həcmində ianəni mənimsədiyini və onu cinayət əməllərə yönəltdiyini əks etdirsinlər. Bu çox ciddi bir rəqəmdir və çox ilginc bir hadisədir”.
M.Göyüşlü hesab edir ki, beynəlxalq təşkilatlar ikili yanaşmanı buraxıb Ermənistan dövlətinin ianələri mənimsəmə və onu cinayətlərə, terrora yönəltməsi faktlarını ciddi araşdırmalı, hesabat yaymalıdır: “Ermənistan ianə və “humanitar məqsəd”lər adı ilə toplanan pulları silah almağa, təxribatlara, terror cinayətlərinə xərcləyir. Ermənistanın terrorçu mahiyyəti hər kəsə bəllidir. Bunu Avropada, Qərbdə də yaxşı bilirlər. Çox da uzaq illərdə baş verməyən türk diplomatlarına qarşı terror aktlarını, Xocalıda həyata keçirdikləri soyqırım cinayətlərini xartırlada bilərik. Bunu ayrı-ayrı dövrlərdə Azərbaycana qarşı törətdikləri təxribat, diversiya, terror aktları da sübut edir. Ermənilər 44 günlük müharibədə “humanitar yük gətirilir” adı ilə humanitar yük daşıyan təyyarələr vasitəsilə silah daşıyıblar”.
M.Göyüşlünün sözlərinə görə, 44 günlük müharibə dövründə Ermənistanın həmin mənimsədiyi vəsait hesabına xaricdən muzdlu döyüşçüləri Qarabağa gətirib və onları müxtəlif terror əməllərinə cəlb edib. Ekspert deyir ki, indi-indi Ermənistanın o terrorçu qrupları döyüşmək üçün Azərbaycan ərazisinə hansı vəsait hesabına gətirdiyi üzə çıxır: “Düzdür, bunların heç bir nəticəsi olmadı, Azərbaycanın bir zərbəsi ilə darmadağın oldular”.
M.Göyüşlünün sözlərinə görə, beynəlxalq təşkilatlar Azərbaycanın ortaya çıxardığı faktları dəyərləndirib Ermənistana qarşı tədbir görməlidir və onu terrordan çəkindirməlidir.
İradə SARIYEVA
