ATƏT-dən sensasiyalı dürüstlük - Qarabağ kontekstində həll olunmamış məsələlər… Status adı çəkilmədi…

img

ATƏT Cənubi Qafqaz ölkələrinin münasibətlərinin mümkün inkişafını tam dəstəkləyir. Bunu ATƏT-in hazırkı sədri Ann Linde üzv ölkələrin xarici işlər nazirlərinin görüşü zamanı deyib.

Onun sözlərinə görə, Qarabağ kontekstində həll olunmamış məsələlər qalıb ki, bu da Azərbaycanla Ermənistan sərhədindəki insidentlərdə əks olunur:

"ATƏT Cənubi Qafqazda uzunmüddətli sülhün qurulmasını dəstəkləyir. Biz həm də hesab edirik ki, regionun üç ölkəsi, Azərbaycan, Ermənistan və Gürcüstan münasibətlərin inkişafı üçün böyük potensiala malikdir və mənim xüsusi nümayəndəm ölkələrin bunda maraqlı olacağı təqdirdə öz köməyini göstərməyə hazırdır", - deyə ATƏT sədri bildirib.

ABŞ Azərbaycan və Ermənistanı sərhədin delimitasiyası və demarkasiyası məsələsini həll etməyə çağırır. Bunu ABŞ-ın dövlət katibi Entoni Blinken ATƏT üzv ölkələrinin xarici işlər nazirlərinin görüşü zamanı deyib.

O qeyd edib ki, ABŞ Cənubi Qafqazda sülhün əldə olunmasını alqışlayır, amma eyni zamanda bir sıra həll olunmamış məsələlər qalır.

"Bu, ilk növbədə sərhədlərin delimitasiyası və demarkasiyası, eləcə də region ölkələrinin inkişafı üçün nəqliyyat kommunikasiyalarının açılması məsələsidir. Ümid edirəm ki, birgə iş, o cümlədən Rusiya ilə əməkdaşlıqda bu məsələlərdə irəliləyiş əldə oluna bilər", - deyə o bildirib.

Avropa İttifaqı (Aİ) Cənubi Qafqaza uzunmüddətli sülhün qurulması üzrə tədbirləri dəstəkləyir. Bunu Aİ-nin xarici işlər və təhlükəsizlik məsələləri üzrə ali nümayəndəsi Jozep Borrel deyib.

"Biz Azərbaycanı və Ermənistanı atəşkəs barədə razılaşmalara əməl etməyə çağırırıq və regionda sülh quruculuğu üçün mövcud tədbirlərə kömək göstərməyə hazırıq", - deyə o, bildirib.

Hazırda Cənubi Qafqazda sülh üçün misli görünməmiş imkanlar mövcuddur. Bunu Türkiyənin xarici işlər naziri Mövlud Çavuşoğlu Stokholmda ATƏT Xarici İşlər Nazirləri Şurasının iclasında çıxışı zamanı deyib.

Onun sözlərinə görə, bu gün ATƏT 44 günlük müharibədən sonra yaranmış yeni reallığı nəzərə alaraq, əvvəl olmadığı qədər regionda sülhü dəstəkləyə bilər.

Kanada Azərbaycan-Ermənistan sərhədində bir müddət əvvəl baş vermiş toqquşmalardan narahatdır.

Bunu Kanadanın xarici işlər naziri Melani Joli ATƏT üzv ölkələrinin xarici işlər nazirlərinin görüşü zamanı deyib.

O, ümidvar olduğunu bildirib ki, ölkələr arasında uzunmüddətli, dayanıqlı sülhün əldə olunması üçün zəruri tədbirlər görüləcək.

Gürcüstan Azərbaycan və Ermənistanla üçtərəfli dialoqun keçirilməsi üçün platforma olmağa hazırdır. Bunu Gürcüstanın xarici işlər naziri David Zalkaliani ATƏT üzv ölkələrinin xarici işlər nazirlərinin görüşü zamanı deyib.

Onun sözlərinə görə, dünya ictimaiyyəti Cənubi Qafqazda uzunmüddətli sülhün qurulmasında maraqlıdır.

"Bu baxımdan, biz Azərbaycan, Gürcüstan və Ermənistanın aktual məsələləri müzakirə edəcəyi və müxtəlif səviyyədə görüşlər keçirə biləcəyi üçtərəfli dialoq platforması təşəbbüsünü təqdim etmişik", - deyə D.Zalkaliani bildirib.

“Azərbaycan, Rusiya və Ermənistan başçılarının Soçidə keçirilən görüşü irəliyə doğru atılan böyük addımdır”. Bunu isə Azərbaycanın xarici işlər naziri Ceyhun Bayramov deyib.

“30 ilə yaxındır davam edən Qarabağ münaqişəsi başa çatıb” deyən nazirin sözlərinə görə, münaqişə başa çatdıqdan dərhal sonra Azərbaycan işğaldan azad edilmiş ərazilərin bərpası üçün genişmiqyaslı fəaliyyətə başlayıb.

"Təkcə bu il dövlət büdcəsindən 1,3 milyard vəsait ayrılıb. Nəqliyyat infrastrukturu tikilir, işğal zamanı Ermənistan tərəfindən dağıdılmış mədəniyyət və dini obyektlər bərpa olunur", - Bayramov bildirib.

O vurğulayıb ki, bu ərazilərdə işğalın bütün izləri aradan qaldırılır və normal həyata qayıtmaq üçün tədbirlər görülür.

C.Bayramov deyib ki, Ermənistan hələ də noyabrın 10-da imzalanan üçtərəfli bəyanatdan irəli gələn bütün öhdəlikləri yerinə yetirmir.

“Azərbaycan ATƏT-ə müharibədən sonrakı dövrdə əməkdaşlıq üçün tədbirlər təklif edib və hələ də cavab gözləyir” deyən XİN başçısı qeyd edib ki, işğaldan azad edilmiş ərazilərin bərpasında ATƏT Azərbaycana kömək edə bilər.

"Biz ATƏT-ə bu məsələ ilə bağlı əməkdaşlıq təklifi irəli sürmüşük və hələ də cavab gözləyirik. Münaqişənin başa çatması Azərbaycan və Ermənistanın bir-birinə qarşılıqlı hörməti, o cümlədən ərazi bütövlüyünə əsaslanan mehriban qonşuluq münasibətlərinin inkişafı üçün böyük imkan yaradır”, - nazir vurğulayıb.

C.Bayramov əlavə edib ki, Azərbaycan hadisələrin bu cür inkişafına hazır olduğunu dəfələrlə bəyan edib və bu istiqamətdə bir sıra birtərəfli addımlar atıb, lakin Ermənistan adekvat addımlar atmır. Bu kontekstdə Ermənistanın üçtərəfli bəyanatı çərçivəsində razılaşmaların pozulmasının davam etməsi ciddi narahatlıq doğurur.

Niderlandın xarici işlər naziri Ben Knalen isə deyib ki, Azərbaycanla Ermənistan arasında sərhədin delimitasiyası və demarkasiyası məsələsində irəliləyişə nail olmaq lazımdır.

Onun sözlərinə görə, sərhəddə bir müddət əvvəl baş vermiş toqquşmalar narahatlıq doğurur və bir sıra həll olunmamış məqamların qaldığını göstərir.

"Bu, həm də iki ölkə arasında sərhədin delimitasiyası və demarkasiyası məsələsidir. Bu məsələdə irəliləyişə nail olmaq lazımdır", - deyə nazir bildirib.

Son xəbərlər