Tofiq Yaqubluya qarşı vəhşilik əslində polisə qarşı qurulmuş oyundur - DİN araşdırmalarda ən maraqlı tərəfə çevrilir…

Şəmsəddin Əliyev: “Əgər hansısa polisin bunu etdiyi üzə çıxarsa, onda mütləq mənada onun cəzalanması olacaq”

img

Bakıda şəhərin mərkəzində keçirilən icazəsiz aksiyada saxlanılan müxalif mövqeli siyasətçi Tofiq Yaqublunun döyülməsini əks etdirən fotolar yayılıb. Həmin fotolardan görünür ki, müxalif siyasətçiyə qarşı ciddi zor tətbiq olunub. Hətta hakimiyyətin mövqeyini dəstəkləyən şəxslər belə, Yaqublunun bu hala salınmasını kəskin tənqid edib.

Tofiq Yaqublu isə müsahibəsində polis tərəfindən döyüldüyünə dair açıqlama verib. DİN Tofiq Yaqubluya polis tərəfindən xəsarət yetirilməsi ilə bağlı iddialara münasibət bildirib. DİN Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev bildirib ki, Tofiq Yaqublunun bölmədə döyülməsi, xüsusi təzyiqə məruz qalması ilə bağlı iddialar əsassızdır: “Amma bütün bunlara baxmayaraq, qeyd olunan iddialar müvafiq qaydada araşdırılacaq”.

DİN rəsmisi onu da əlavə edib ki, həmin gün şəhərin mərkəzində razılaşdırılmayan aksiyada saxlanılanlar arasında qadın və azyaşlı yoxdur: "Saxlanılan şəxslərin bir qismi xəbərdarlıq edilərək sərbəst buraxılıb, digərləri barəsində araşdırmalar davam etdirilir".

Qeyd edək ki, dekabrın 1-də bir qrup şəxs paytaxtın Nizami küçəsi və Fəvvarələr bağında icazəsiz aksiya keçirməyə cəhd edib.

Doğrudan da maraqlıdır, polis hansısa tanınmış siyasətçini niyə bu vəziyyətə salıb, sonra kameralar önünə çıxarmaqda maraqlı olsun?  Sanki belə təəssurat yaranır ki, bu addımı atanlar əslində dövləti və polisin nüfuzunu zərbə altında qoymaq istəyib. Belə bir addımın polis tərəfindən atıla bilməsi mümkündürmü?

Uzun müddət polis orqanlarında rəhbər vəzifələrdə çalışan hüquqşunas Şəmsəddin Əliyev “Bakı-Xəbər”ə açıqlamasında bildirdi ki, 30 ildən artıq çalışdığı orqanın təcrübəsindən çıxış edərək bu məsələyə bir qədər fərqli aspektdən yanaşacaq: “İnsan hüquq və azadlıqlarının təmin olunması bütün qurumlar üçün prioritet vəzifə sayılır. Azərbaycan DİN də bu istiqamətdə lazımi addımlar atır. Polisin işi əslində çox ağırdı. Təəssüflər olsun ki, bütün proseslərdə ilk olaraq qınanan, hədəfə alınan polis olur. Çünki bir çox sahələrdə məhz həmin qurum insanlarla üz-üzə gəlir. Təbiidir ki, polis bütün davranışlarını qanun əsasında qurmalıdır. Heç bir halda, cinayət törədən şəxsə qarşı zorakılıq və ya işgəncə tətbiq oluna bilməz. Cinayətkarlıqla mübarizə bir qədər fərqli fəaliyyətdir. Bu səbəbdən də burada müəyyən anlaşılmazlıqların üzə çıxa bilməsi də istisna deyil. Bəzən polisin davranışları ilə bağlı məlumatlar şişirdilərək cəmiyyətə çatdırılır. Tofiq Yaqublu ilə bağlı məsələdə bir qədər anlaşılmazlıq var. Şəxsən mən inamıram ki, hansısa polis insanı bu vəziyyətə salsın. Əgər hansısa polisin bunu etdiyi üzə çıxarsa, onda mütləq mənada onun cəzalanması olacaq. Buna əmin olun. Həm Nazirliyin özündə, həm də prokurorluqda bununla bağlı araşdırmalar gedəcək. Daxili İşlər Nazirliyi bu cür hallarla bağlı sərt davranır. Polisin hansısa vətəndaşa işgəncə verdiyinə dair fakt öz təsdiqini tapırsa, həmin əməkdaşla bağlı ciddi ölçü götürülür. Çünki bu, Azərbaycan dövlətinin imicinə aid olan məsələdir. Hesab edirəm ki, hansısa polisin gücə əl atması onun təcrübəsizliyindən irəli gələ bilər. Çünki qanunun imkan verdiyi hədlər çərçivəsində qanunu pozanla bağlı istənilən hüquqi ölçünün götürülməsi mümkündür. Biz tez nəticə çıxarmamalıyıq. Yəqin ki, araşıdırmanın sonunda bu əməli kimlərin törətdiyi məlum olacaq və həmin şəxslər layiqli cəzalarını alacaqlar”.

Məhəmmədəli QƏRİBLİ

Son xəbərlər