Ermənistanda nəşr olunan “168 saat” qəzeti hökumətdəki mənbələrə əsasən məlumat yayıb ki, Rusiya sülhməramlılarının müvəqqəti nəzarətində olan Azərbaycana məxsus ərazilərdə separatçı rejimin və Ermənistanın atributları yığışdırılır. Bildirilir ki, prosesə noyabrın 30-dan start verilib.
Məlumata görə, Şuşa şəhəri yaxınlığında, Qırmızı Bazar qəsəbəsində, habelə separatçıların silahlı dəstələrinin dayandığı mövqelərdə qaldırılmış erməni bayraqlarının yığışdırılması barədə göstəriş verilib. Qəzet yazır ki, Şuşa şəhəri yaxınlığında yerləşən yaşayış məntəqələrində isə separatçılar öncə bu addımı atmaqdan imtina ediblər. Lakin Azərbaycan tərəfinin qısa müdaxiləsindən sonra “bayraqlar” yığışdırılıb. Ermənistan hökumətindəki mənbələr bildirib ki, belə bir tələb Azərbaycan tərəfindən qoyulub. Soçidə keçirilən görüşdə Azərbaycan Prezidenti İlham Əliyev tələb edib ki, Qarabağ ərazisindəki bütün Ermənistan bayraqları və separatçıların “atributları” yığışdırılmalıdır. Əks təqdirdə həmin mövqelərə müdaxilə ediləcək və “bayraqlar” oradan zorla çıxarılacaq.
Həmin görüşdən dərhal sonra rəsmi İrəvanın göstərişi ilə Ermənistan bayraqları və separatçıların “dövlət atributları” Qarabağdakı mövqelərdən endirilib.
Qeyd etdiyimiz kimi, bu barədə Ermənistanda nəşr olunan “168 saat” qəzeti hökumətdəki mənbələrə istinadən məlumat yayıb və hadisənin Azərbaycan Prezidentinin tələbi əsasında baş verdiyini yazıb.
“Bu, Azərbaycan Prezidentinin düzgün siyasi xəttinin göstəricisidir”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, baş verən proseslər bizim üçün arzuolunan proseslərdir. “Arzu edirdik ki, bu istiqamətdə işlər getsin və müvəqqəti olaraq Rusiya sülhməramlılarının nəzarətində olan ərazilərimizdə Azərbaycan hakimiyyəti bərqərar olsun. Biz həmişə əsas məsələ kimi qoymuşuq ki, istənilən situasiyada əsas və köməkçi məsələlər müəyyənləşməlidir. İndiki situasiyada biz hesab edirik ki, Xankəndi, Ağdərə, Xocalı və hələ də Rusiya sülhməramlılarının nəzarətində olan digər ərazilərimizdə Azərbaycan hakimiyyəti bərqərar olmalıdır. Əsas məsələ bu qoyulmalıdır, geridə qalan məsələlər bu məsələdən asılı vəziyyətdə olmalıdır. O cümlədən də dəhliz və digər məsələlər. Ona görə də, biz görürük ki, o istiqamətdə də müəyyən işlər gedir, Azərbaycan addımlarını o yöndə atır. Bu da əsas istiqamət kimi götürülməlidir. Burada onların hər hansı bir silahlı birləşmələrinin, separatçıların varlığı aradan qaldırılmalıdır, onların dırnaqarası hakimiyyətinə son qoyulmalıdır. Qarabağdan Ermənistan bayraqlarının, separatçı tör-töküntülərinin “bayraq” dediyi əski parçası və digər “atributlar”ı yığışdırılırsa, bu, orada Azərbaycan hakimiyyətinin bərpa olunması istiqamətində gedən proseslərdən xəbər verir. Bu çox vacib istiqamətdir, diqqətdə saxlanılmalıdır və bu istiqamətdə davamlı addımlar atılmalıdır”.
A.Nağının sözlərinə görə, bu barədə verilən məlumatlar hələlik qeyri-rəsmi məlumatlardır, bu məlumatlar ciddi yoxlanılmalı, araşdırılmalıdır. A.Nağı hesab edir ki, Ermənistan mətbuatının yaydığı bu məlumatlar rəsmən təsdiq olunarsa, bu, Azərbaycan tərəfin atdığı düzgün addımın göstəricisdir. “Bu, Azərbaycan Prezidentinin düzgün siyasi xəttinin göstəricisdir. Bu xətt bütün cəmiyyət tərəfindən, o cümlədən də QAT tərəfindən birmənalı olaraq dəstəklənməlidir və dəstəklənir də. Bunun digər tərəfi odur ki, demək, Rusiya da Azərbaycanın mövqeyi ilə hesablaşır, Azərbaycanın haqlı tələblərini yerinə yetirir. Yəni bu da çox vacib məsələdir. Öz tərəfindən Rusiya da Ermənistana təzyiq göstərir ki, Ermənistan da Azərbaycanın mövqeyi, haqlı tələbləri ilə hesablaşsın. Fikrimcə, bu müsbət bir tendensiya kimi dəyərləndirilməlidir, davamlı şəkildə olmalıdır, heç kəs də buna mane olmamalıdır. O məlumatda da aydın şəkildə göstərilir ki, Qarabağdakı tör-töküntülər, separatçılar, əslində hərbi canilər müqavimət göstərmək istəyirlər ki, filan yerdən “bayrağı” çıxara bilərik, başqa yerdən çıxara bilmərik və sair. Bu onların arzusu ilə olmamalıdır. Azərbaycan tərəfi öz iradəsini ortaya qoymalıdır və doğrudan da o hərəkətlər göstərir ki, Azərbaycan tərəfin haqlı tələbləri yerinə yetirilmədiyi halda Azərbaycan güc tətbiq etməlidir. Ermənilər də bunu çox gözəl bilirlər ki, hansı ərazidə olurlar-olsunlar, hansı mağaraya, meşəyə çəkilirlərsə-çəkilsinlər, Azərbaycan əsgərinin onlara əli çatacaq. Azərbaycan ordusu istənilən nöqtədə öz fəaliyyətini həyata keçirər və məqsədlərinə nail ola bilər. Bunu ermənilər artıq anlamalıdır”.
A.Nağı hesab edir ki, ermənilər birdəfəlik Azərbaycanın zarafat etmədiyini, dediklərini etdiyini dərk etməlidir. Yayılan məlumatların müsbət bir tendensiya kimi dəyərləndirilməli olduğunu deyən A.Nağının sözlərinə görə, bu istiqamətdə ləngimədən digər addımlar atılmalı, həmin ərazilərdə Azərbaycan hakimiyyəti bərqərar olunmalı, suveren hüquqlarının bərpası sürətləndirilməlidir.
İradə SARIYEVA
