Son günlər Avropa qurumlarında ermənilərin maraqlarına yönəlik fəaliyyətlər müşahidə edilir. Məsələn, Avropa İnsan Hüquqları Məhkəməsi (AİHM) rəsmi Bakıya noyabrın 16-da Ermənistanın sərhədyanı Sünik (Zəngəzur) vilayəti zonasında gedən döyüşlər zamanı əsir götürülmüş erməni hərbi qulluqçular barədə məlumat təqdim etməsi üçün dekabrın 1-dək vaxt verib.
Bundan başqa, Avropa Parlamentinin sədr müavini Fabio Massimo Kastaldo bildirib ki, ərazi mübahisələrinin həlli erməni xalqına dərin iztirablar yaradıb. Kastaldo bir az da irəli gedərək ritorikanı sərtləşdirib: “Əmin olun ki, erməni icmalarının səsi bütün dünyada eşidilir, biz heç bir halda insan haqlarının növbəti dəfə pozulmasına dözməyəcəyik, gücün və hərbi gücün qanunun aliliyi və demokratiyadan üstün olmasını qəbul edə bilmərik”.
Göründüyü kimi, AİHM diversantların qeydinə qalır, Avroparlament təmsilçisi də üstüörtülü hədələyir. Məsələnin maraqlı tərəfi həm də odur ki, bütün bunlar 15-16 dekabrda Brüsseldə keçiriləcək Şərq Tərəfdaşlığı sammiti ərəfəsində baş verir.
Maraqlıdır, Avropa İttifaqı təsisatları niyə Azərbaycana yönəlik aqressiv mövqedən çıxış edir? Bütün bunlar təsadüfdürmü?
“44 günlük müharibədə qələbəmizi Avropadakı müəyyən dairələr həzm etmək istəmir”
Məsələyə münasibət bildirən politoloq Tural İsmayılov bütün bunlara bir neçə prizmadan yanaşdı: “Təəssüflər olsun ki, Avropa Parlamentində və Qərbin bir sıra siyasi institutlarında təmsil olunan bəzi siyasilər erməni lobbisinin güclü təsiri altındadır. Bütün dünyaya demokratiyadan danışan, insan haqlarının aliliyindən dəm vuran həmin deputatlar, nədənsə, Azərbaycanın başına gətirilən müsibətlərdən danışmırlar. Avropa Parlamentinin, ATƏT-in kürsülərindən Xocalıda törədilən qətliamdan və digər buna mənzər soyqırımlardan danışmırlar. O cümlədən, torpaqlarımızın 30 ilə yaxın işğal altında olduğu dövrdə necə vandalcasına yaşayış məntəqələrinin məhv edilməsindən söz açmırlar. Halbuki, bununla bağlı çoxsaylı faktlar ortadadır. Bütövlükdə, tarix boyu Ermənistanın Azərbaycana qarşı həyata keçirdiyi siyasət barədə bir cümlə də deyilmir. Yəni oxumadan, araşdırmadan, təhlil aparmadan Azərbaycana qarşı birtərəfli mövqe sərgiləyirlər. Avropa təsisatlarında bir nəfər soruşmur ki, Ermənistan ordusunun Qarabağda nə işi var? Yalnız erməni lobbisinin maliyyə dəstəyindən bəhrələnməklə Azərbaycan əleyhinə təbliğat aparırlar. Ortada hər hansı fakt isə yoxdur. Belə yanaşmalar ümumilikdə Avropa İttifaqının qurumlarını hörmətdən salır, onların ciddiliyini şübhə altında qoyur. Avropanın bəzi ölkələri, təsisatları təkcə Azərbaycana qarşı yox, Türkiyəyə qarşı də aqressiv mövqedən çıxış edirlər. Bütün bunlar erməni lobbisinin Qərbdə küclü formada təşkilatlanması və bir sıra siyasətçiləri ələ almaları ilə əlaqədardır. 15-16 dekabrda Brüsseldə keçiriləcək məlum görüş ərəfəsində bunların baş verməsi Azərbaycana hansısa təzyiq göstərmək məqsədi daşıyır. Məsələ ondadır ki, ötən il 44 günlük müharibə zamanı Azərbaycan qələbə qazanaraq Ermənistanı kamitulyasiyaya məcbur etdi. Bunu Avropadakı müəyyən dairələr həzm etmək istəmir. Aİ Soçi görüşündən sonra Brüssel görüşünün effektiv olmasını arzulayırsa, ilk növbədə Ermənistandan mina xəritələrinin alınıb Azərbaycana verilməsində fəallıq göstərməlidir. Əks halda Avropa qurumlarının müxtəlif deputatlarının proses barəsində birtərəfli bəyanatlar səsləndirməyi dünyada Qərb siyasi təsisatlarını daha da nüfuzdan salacaq”.
Bu baxımdan politoloq hesab edir ki, Avropa təsisatları birtərəfli yanaşmalardan əl çəkməlidir.
Vidadi ORDAHALLI
