44 günlük müharibədə erməni zabit və generalların ağır cinayətləri öz blogerləri tərəfindən ifşa edilir...

Tərlan Eyvazov: “Baqdasaryanın dedikləri tamamilə düzdür və o, ermənilərə övladlarının gerçək qatillərini bir-bir göstərir”

img

Son günlər 44 günlük müharibə zamanı bir sıra erməni generalların və zabitlərin törətdiyi cinayətlərin üstü bir-bir açılır. Onlar arasında separatçı qalıqlarının “general” və “zabit”ləri də var.

“Sputnik Ermənistan”ın yaydığı məlumata görə, Roman Baqdasaryan adlı bloger video paylaşaraq, Azərbaycanın Qarabağ bölgəsində separatçı rejimin qalıqlarının “generalları” barədə bir neçə qalmaqallı fikir səsləndirib. Blogerin sözlərinə görə, 44 günlük müharibə zamanı separatçı rejimin “zabitləri” və “generalları” qətllər törədib və onların verdikləri əmrlərin icrası nəticəsində yüzlərlə-minlərlə erməni əsgər ölüb. Baqdasaryan bildirib ki, təkcə Maqadis istiqamətində bu cür cinayətkar əmrlər nəticəsində 250 hərbçi öldürülüb. O vurğulayıb ki, onların ölümündə yüksək rütbəli hərbçilər günahkardır.

Rejimin qalıqlarının “prokurorluğu” isə blogerin videosunu “araşdırmaq” üçün “Milli Təhlükəsizlik Xidmətinə” göndərib.

Erməni general və zabitlərinin Ermənistan əsgərlərinə qarşı törətdiyi cinayətləri erməni bloger faktlarla ifşa edir.

  • “Separatçıların “general” və “zabitlər”inin terrorçu, qatil olduğunu ifşa edən bloger bununla həm erməni cəmiyyətinə, həm də dünyaya çox ciddi mesajlar verməyə çalışır”

Tanınmış hərbi ekspert Tərlan Eyvazov “Bakı-Xəbər”ə bildirdi ki, onların törətdiyi cinayətlərin sayı çoxdur, amma bunların üstü tədricən açılır. T.Eyvazov deyir ki, uzun müddətdir erməni bloger Baqdasaryanın çıxışlarını yaxından izləyir: “Başqa erməni blogerlər hiyləgər və məkrli, çirkin niyyətlərini hər zaman ortaya qoyur. Amma Baqdasaryan o məkrli, hiyləgər erməni blogerlərindən fərqli olaraq obyektiv fikirlər səsləndirir. Qeyd edim ki, Hadrutda və digər yerlərdən gedən ermənilərin evlərinin, var-dövlətlərinin erməni əsgərləri, zabitləri tərəfindən yağmalandığını, talandığını, pay-püş edildiyini ilk dəfə Baqdasaryan çəkib və onları ifşa edib. Eyni zamanda separatçı tör-töküntüsünün “müqəddəs atasının” cinayətkar davranışlarını da bu adam üzə çıxarıb, “müqəddəs atanı” ciddi tənqid edib. Bundan başqa, o, separatçı qalıqlarının “liderləri”nin Rusiya və başqa ölkələrlə əlaqə qurmasını, “liderlər”in o vaxt gəlib Şuşada eyş-işrət məclisi qurmalarını yayaraq onları qamçılayıb.  Özüm də məəttəl qalıram ki, bu cür tənqidi fikirlər səsləndirən, onların bütün cinayətlərini ifşa edən bir adam hələ də orada salamat qalıb”.

T.Eyvazovun sözlərinə görə, çünki o ərazilərdə də, Ermənistanın içində də terrorçular var və bu terrorçuların da əməlləri hər kəsə məlumdur. T.Eyvazovun fikrincə, blogerin terrorçu erməni zabit və generallarının erməni əsgərlərinə qarşı işlədiyi cinayətləri ifşa etməsi təsadüfi deyil. O deyir ki, Baqdasaryan bu faktları bilir və onları geniş ictimaiyyətlə bölüşür, erməni cəmiyyətinə övladlarının gerçək qatillərini göstərir: “Hesab edirəm ki, erməni blogerinin açıqlamalarını tamamilə ciddiyə almaq lazımdır. Ona görə ki, bu iddia deyil, çox ciddi əsaslara söykənən reallıqdır. Baqdasaryanın dedikləri tamamilə düzdür və o, ermənilərə övladlarının gerçək qatillərini bir-bir göstərir. Separatçıların “general” və “zabitlər”inin terrorçu, qatil olduğunu ifşa edən bloger bununla həm erməni cəmiyyətinə, həm də dünyaya çox ciddi mesajlar verməyə çalışır.

...Bu erməni xislətindən irəli gələn bir haldır. 44  günlük savaş zamanı da onlar tamamən məğlub olacaqlarını göz önünə almışdılar və hamı qaçhaqaçda idi. Etiraf etmək lazımdır ki, son anda rus hərbçiləri ermənilərin qanının arasına girdi. Amma Rusiya bu məsələyə baş qoşana qədər Qarabağda yaşayan ermənilərdə və Ermənistan cəmiyyətində belə bir fikir vardı ki, artıq hər şey bitdi, Qarabağda yaşayan ermənilərin hamısı oradan köçüb getməlidir. Yəni “canlarını xilas etmək” üçün qaçmalıdırlar.

İradə SARIYEVA

Son xəbərlər